Европа
ЕУ забележува сериозни пропусти во скапиот грчки модел на бегалски кампови
Три неодамна изградени бегалски кампови финансирани од ЕУ на грчките острови во Егејското Море, рекламирани од официјалните претставници на ЕУ како нова генерација објекти со подобрени услови за живеење и процедури за азил, едвај обезбедуваат основни услуги и заштитни мерки, дури и за најранливите баратели на азил, откриваат интерните документи на ЕУ до кои дошла „Ал џезира“.
Според интерната кореспонденција, претставниците на ЕУ, кои ги надгледуваат операциите во камповите на островите Самос, Лерос и Кос, пријавуваат речиси секојдневни проблеми: од недостиг на персонал, кој ги одложува процедурите за азил, до наводи за сексуално и друго насилство, што влијае врз децата.
Т.н. затворени центри со строго контролиран пристап беа создадени за да ги заменат неквалитетните шаторски градови, кои никнаа откога огромен број азиланти пристигнаа во Европа преку грчките острови по 2015 година.
По пожарот од 2020, кој го уништи пренатрупаниот камп „Морија“ на Лезбос, Атина и Брисел ветија дека ќе го реформираат системот за управување со азил и миграција и инвестираа 276 милиони евра од фондовите на ЕУ во пет нови кампа, кои беа рекламирани како модел за другите влади за хумани и безбедни кампови.
Европската комисија се појавува како партнер на Грција и клучен финансиер на експериментот за усогласување на претходно пеколните грчки кампови со стандардите за азил на ЕУ.
Документите од интерната коресподенција, кои го покриваат периодот од март 2022 година до февруари годинава, нудат редок приказ на хроничните проблеми во камповите додека Брисел и Атина ги фалат, а Нова демократија на Мицотакис дури го посочува кампот на Самос – на кој се потрошени од 43 милиони евра – како пример за успесите на неговата администрација за управување со миграцијата.
И покрај големите инвестиции во високотехнолошка опрема за надзор и персонал за обезбедување, претставниците на ЕК на Самос забележале голем број сериозни безбедносни предизвици.
Во логорот на Самос, каде што има повеќе безбедносен персонал отколку азиланти, има недостиг од специјализирани старатели за малолетници без придружба, кои се сместени во одредени т.н. безбедни зони во камповите. Во јуни беше пријавен и случај на сексуален напад врз седумгодишно дете во кампот.
На Лерос се документирани речиси секојдневни проблеми со насилства и вандализам во сместувањето на малолетниците, а 40 деца се оставени без старатели повеќе од една година.
ЕК изразила загриженост поради недостигот од преведувачи, што ги одложува сите процедури – од првичните регистрации до интервјуата за азил – и честопати строго ограничениот пристап до здравствената заштита во камповите поради немање лекари.
Граѓанските организации темелно ги документираа супстандардните услови и недоволните услуги во камповите, што грчките власти ги отфрлаат како политички мотивирани или лажни вести.
Во писмо испратено овој месец неколку невладини организации ги повикаа грчките властите да го затворат кампот на Самос наведувајќи го недостоинственото постапување кон малолетниците без придружба и понатамошното влошување на условите во кампот.
„Постои остар контраст помеѓу начинот на кој овие центри се јавно претставени и реалноста на луѓето што живеат во нив“, напишаа Грчкиот совет за бегалци и „Оксфам“ во неодамнешниот поднесок до европскиот омбудсман заклучувајќи дека објектите ги влошуваат наместо да ги ублажат грижите за основните човекови права.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.
Европа
Во Англија извикал „Алах Акбар“ и убил случаен минувач: „Го направив тоа за луѓето од Газа“
45-годишниот Ахмед Алид вчера беше прогласен за виновен за убиство и обид за убиство. На 15 октомври минатата година, барател на азил од Мароко со нож го уби 70-годишниот Теренс Карни во центарот на англискиот град Хартлпул. Тој претходно го избодел со нож својот заспан цимер Џавед Нури додека викал „Алах Акбар“.
Алид и рекол на полицијата дека сето тоа го направил „за луѓето од Газа“. Само осум дена пред да убие случаен минувач и да го рани својот цимер, милитантите на Хамас го нападнаа Израел. Алид се заколнал дека ќе убиел повеќе луѓе доколку имал митралез и друго оружје, изјави обвинителот Џонатан Сендифорд во Судот во Тесајд.
Алид делел куќа со други баратели на азил во североисточна Англија. Тој бил вознемирен што Нури го прифатил христијанството. Цимерите рекле дека Алид почнал да носи нож откако на телевизија видел прилог за настаните во Газа.
Европа
Крим главна цел: Пентагон откри за што Украина ќе ги користи моќните ракети АТАКМС
Министерството за одбрана на САД ја појасни целта за испорака на ракети со долг дострел во Украина, кои неодамна беа испорачани во тајност. Како што објави „Њујорк тајмс“, целта на испораката на американските ракети АТАКМС е да се зголеми притисокот врз Крим, кој беше анектиран од Русија по референдумот во 2014 година.
Крим го претставува центарот во кој се лоцирани голем број руски воздушни и копнени сили и кој досега, како што пишува американскиот дневен весник, „за нив бил релативно безбедно засолниште“. Ова го тврди анонимен американски функционер. Сепак, Пентагон одби да каже колку точно од овие проектили со дострел од 300 километри се испорачани на украинската страна.
Советникот за национална безбедност на Белата куќа, Џејк Саливан, претходно ја потврди испораката на овие ракети без да прецизира дали тие се модифицирани и имаат зголемен дострел.
Украинските сили веќе употребија АТАКМС, што претседателот Володимир Зеленски го потврди на 17 април, објавувајќи дека бил извршен напад врз воздухопловната база Џанкој, која се наоѓа на 165 километри од линијата на фронтот. Министерството за одбрана на Руската Федерација не ги коментираше овие наводи.
Pentagon reveals Ukraine’s targets for ATACMS missiles – NYT — (the usual baffling lack of retaliation threats from #Putin– instead just the usual bleating that ‘it’s impossible to justify’..Bring Stalin back to life please, Russia) https://t.co/8pi0Lx8tbt #CapeTown #SouthAfrica pic.twitter.com/ZtI5cG3r2m
— Peter Mayson (@theforeverman) April 26, 2024
Американскиот дневен весник потсетува дека Украина првпат добила ракети АТАКМС во септември минатата година, но дека станува збор за верзија со половина дострел. Се шпекулираше дека Украина можеби користела американски ракети за да го урне кримскиот мост, што на почетокот на месецов го потврди и самиот претседател Зеленски, велејќи дека неговата влада „навистина сака да го уништи мостот на Крим“.
Тој е симбол на руската окупација и преку овој мост Русија испорачува воена опрема и ги снабдува војниците во Украина. Во неколку наврати досега мостот беше цел на украински напади.
– Мислам дека е вистинското време, а шефот (Бајден) донесе одлука дека е вистинско време да и го обезбеди на Украина оружјето неопходно за тековната борба. Тоа е добро осмислена и многу конструктивна одлука – изјави адмирал Кристофер Грејди, заменик командант на Здружениот генералштаб на американската армија.
Руската страна го осуди потегот на САД, а рускиот амбасадор во Вашингтон Анатолиј Антонов рече дека тоа „ја зголемува заканата за безбедноста на Крим, вклучително и Севастопол и другите руски градови“.