Македонија
Кумановката што го прегази пешакот кај „Гоце Делчев“: Не се чувствувам виновна

Гордана Филиповиќ, која го управуваше возилото „бмв х5“, со кое го прегази и усмрти дедото Слободан Ангеловски на мостот „Гоце Делчев“, пред судот посочи дека не чувствува вина за делото што ѝ се става на товар. Нејзиниот адвокат Љубомир Михајловски посочи дека ќе докажат оти најголем придонес за да се случи несреќата има покојниот. Обвинителството, пак, е децидно дека ќе докаже оти вината е кај возачот Филиповиќ.
„Да, разбирам за што сум обвинета. Според ова обвинение, не се чувствувам виновна“, рече обвинетата Филиповиќ.
Три вештачења има пред судијката Елена Илиевска-Јосифовиќ. Веќе на наредното рочиште ќе треба да има распит на сите тројца вештаци. Според вештачењето на обвинетата, најмногу вина за несреќата има кај покојниот.
„Од доказите што ги добивме произлезе потреба да направиме и наше вештачење, кое го доставивме до судот, бидејќи сметаме дека помеѓу другите докази што се дадени од страна на одбраната, како битен доказ, ќе произлезе дека обвинетата не го сторила делото на начин на кој е опишан во обвинителниот акт. Одбраната ќе докаже дека причина и најголем придонес за сообраќајната незгода е всушност од покојниот, пешакот кој исто така бил учесник во сообраќајот. Предлагаме да биде испрашано и вештото лице за да може во директен распит да се расчистат дилемите. Во однос на вештачењето, кое е дадено од полномошникот на оштетениот, сметам дека не треба да се прифати бидејќи главната расправа е почната“, рече адвокатот Љубомир Михајловски, бранител на Филиповиќ.
Обвинителката Сања Бурјаковска-Китановска е децидна дека ќе го докаже оти обвинетата Филиповиќ го сторила кривичното дело тешки дела против имотот и луѓето во сообраќајот.
„Обвинителството достави поголем број докази со кои планираме да ја докажеме основаноста на обвинението дека обвинетата го сторила делото во време, место и начин јасно и детаљно е опишан во диспозитивот на обвинението. По изведување на сите материјални докази, писмени докази, обезбедени материјални траги од МВР, надополнето со искази на сведоци и изготвено сообраќајно-техничко вештачење, од кое видно ќе се утврди дека генератор и причинител на несреќата е обвинетата Гордана Филиповиќ. Обвинителството ќе предложи обвинетата да биде огласена за виновна и да биде казнета во согласност со законот“, посочи обвинителката.
Несреќата се случи во јануари минатата година кога во пешакот удри автомобилот „бмв“, управуван од обвинетата.
Филиповиќ е мајка на кумановката Јелена, која имаше 17 години, а пред три години исто така загина во сообраќајна несреќа. Возачот што ја прегази доби 7,5 години затвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце и Богородица времето на чекање за влез во државата е околу 1 час

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини Табановце и Богородица времето на чекање за влез во државата изнесува околу 1 час. На останатите гранични премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Претпладне сончево, попладне наместа нестабилно со локален дожд и грмежи

Претпладне сончево со умерена облачност. Попладне наместа ќе биде нестабилно со локален дожд и грмежи. Ќе дува слаб до умерен ветер од југоисточен правец. Минималната температура ќе биде во интервал од 6 до 12, а максималната ќе достигне од 19 до 26 степени.
Во Скопје, сончево со умерена облачност и со слаб до умерен југоисточен ветер. Попладне во делови од котлината ќе има развој на нестабилна облачност со услови за пороен дожд и грмежи. Минималната температура ќе се спушти до 8, а максималната ќе достигне до 26 степени.
Времето во наредните денови
Од среда на повеќе места ќе биде нестабилно со повремени врнежи од дожд, локално поројни, проследени со грмежи. Дневната температура ќе биде во постепено благо опаѓање.
Македонија
Карпош, Ѓорче Петров и Сопиште денеска без струја

Од ЕВН Македонија АД известуваат дека денеска без електрична енергија ќе останат:
· Oд 08:00 до 16:00 часот, дел од корисниците во Стопански Двор. (Општина Ѓорче Петров);
· Oд 09:00 до 13:00 часот,ул.24 с.Сопиште КАЈ ИЦЕ МАК (Општина Сопиште);
· Oд 09:00 до 14:00 часот, дел од корисниците на ул.Ванчо Мицков,во Долно Нерези (Општина Карпош) ;
· Oд 10:00 до 14:30 часот, дел од потрошувачите на ул.Женевска (Општина Карпош).