Градското претпријатие „Лајка“ затекнало нетретирани кучиња во Аеродром на местото каде што глутницата пред два дена нападна домашен миленик и неговиот сопственик. Самите посочуваат дека обврската да се грижат за уличните кучиња е нивна. Но, сметаат дека проблемот со неконтролираното размножување е кај други институции и посочуваат дека го амортизираат проблемот, кој треба трајно да се реши. Од „Лајка“ за „Макфакс“ потенцираат дека минатата година платиле 10 милиони денари, односно 162.000 евра отштета на граѓани поради каснување од бездомни кучиња. За последниот случај во Аеродром, посочуваат дека сите нетретирани кучиња што се затекнати на местото каде што глутницата нападна домашен миленик, ќе бидат заловени.

„Од посоченото видео не може да се тврди со сигурност дали кучињата имаат обетки или не, нашите вработени во текот на вчерашниот ден излегоа на посочената локација и утврдија дека околу 80 % од кучињата што ги затекнаа се со ушна маркичка и во текот на денешниот ден ќе пристапат кон заловување на секоја единка што не е обележана со ушна маркичка на истата локација“, велат од ЈП „Лајка“.

Според нив, тие не се проблем, туку другите институции за кои посочуваат дека не дејствуваат соодветно.

„Одговорноста за перпетуирањето на проблемот со постоењето на бездомните кучиња е на институциите што ги креираат законите и ги спроведуваат. ЈП ‘Лајка’ е последниот обрач во синџирот за ставање под контрола на овој проблем, но, за жал, во јавноста само нас нè препознаваат како одговорна институција за решавање на проблемот со уличната популација на кучиња. Нашата позиција во моментот е да го амортизираме проблемот што други надлежни институции, како Агенцијата за храна и ветеринарство, Министерството за земјоделство, шумарство и водостопанство, Министерството за внатрешни работи, навремено не го превенираат, но и не дејствуваат соодветно“, додаваат од јавното претпријатие.

Изминатата година „Лајка“ платила 10 милиони денари за отштета во десет скопски општини. Тоа значи дека во секоја општина се платени по 1 милион денари. Сепак, додека граѓаните се жалат од бројот на кучиња на улиците, раководството тврди дека постигнува успеси.

„ЈП ‘Лајка’ во изминатите месеци постигнува нови рекорди во третирани кучиња на месечно ниво. Се доорганизираме и максимално ги користиме нашите ресурси иако финансиската состојба ни е нестабилна и имаме потреба од поголема поддршка“, додаваат од ЈП „Лајка“.

Претходно, глутница кучиња нападнаа домашен миленик и маж што го шеташе на поводник. Од вознемирувачката снимка што ја доби „Макфакс“ се гледа како сопственикот беспомошно се обидува да го спаси своето куче од глутницата додека тие го распарчуваат.