Пратеничката група на ВМРО-ДПМНЕ, денес, на Комисијата за образование, наука и спорт побара повлекување на концепцијата за реформи во основното образованието и одржување итна јавна расправа во Собранието.

Според пратеничката на ВМРО-ДПМНЕ, Благица Ласовска, потребна е јавна расправа во Собранието со вклучување на сите релевантни фактори.

„Доста со глумење некаква јавна расправа. Јавна расправа нема. Мила Царовска дозволи пишување писма до неа, но тоа не е и не може да биде јавна расправа. Потребна е вистинска јавна расправа овде во Собранието со вклучување на сите релевантни фактори, со цел оваа реформа навистина да се унапреди и да се подобри квалитетот на образованието во Република Македонија.

Реформите во образованието мора да бидат резултат на изграден национален став, кој што ќе биде создаден од тимови од реномирани и докажани експерти во областа, а не партиски експеримент на министерката Мила Царовска, кој има многу мани и недоследности за кои реагираа речиси сите што се дел од образовниот систем во Македонија.

Негативните критики се сè почести за концептот на интегрирање предмети, особено на предметите историја и географија и со демантите од многубројни здруженија излезе на виделина дека Царовска сака да манипулира со јавноста дека се работи за некаков фински модел, што ќе значи укинување на предметот историја и други предмети, односно нивно интегрирање.

Таа нагласи дека јавната расправа што ја бараат во Собранието треба да биде место каде што ќе може да се слушнат многу забелешки, предлози, концепти и мерки врз кои, како што вели таа, подоцна би се изградила национална стратегија од која ќе произлезат нови реформи и концепти во образовниот систем и тие ќе бидат донесени со консензус од сите политички фактори, но и консензус од сите релевантни институции што ќе учествуваат во нејзиното градење.

Ласовска истакна дека пратеничката група на ВМРО-ДПМНЕ смета оти ваквото самоволие и ваквите експерименти што сака да ги турка оваа Влада преку министерката Мила Царовска се крајно несериозни, понижувачки и дека последиците од сето ова ќе ги трпат учениците и наставниот кадар.

Затоа, доста беше со импровизации, нашите деца заслужуваат најдобро, нашите деца заслужуваат квалитетно образование, а нашите наставници и професори квалитетни наставни програми, заврши Ласовска.