Македонија
Јовески очигледно е извршител на СДСМ и ги прикрива криминалците: Лашкоска за случајот Онкологија

Ревизорите укажуваат на неправилности, но прашањето е колку институциите постапуваат по извештаите, еве и конкретно за извештајот на Клиниката за онкологија, укажа пратеничката Ане Лашкоска од ВМРО-ДПМНЕ на денешната дебата на собраниската седница на Комисијата за финансирање и буџет на која се разгледуваше ревизорскиот извештај за Клиниката за онкологија.
„Една работа не е јасна, ревизорите укажуваат дека се постапува по извештаите. Сепак се поставува прашањето каков е одѕивот на институциите, еве сега конкретно за Онкологија. Дали вие кои ги работите извештаите сте повикани да дадете одговори во јавното обвинителство. Ревизијата може да му помогне на обвинителот но прашање е дали воопшто има интерес за ова кај обвинителството“, кажа Лашкоска.
Лашкоска укажа дека е недозволиво недоаѓањето на јавниот обвинител Љубомир Јовески.
„Јовески вели дека не можел да дојде да биде на Комисијата на која го разгледуваме ревизорскиот извештај за Онкологија. Каква е таа итна работа, каква е таа работа која е поважна од човечкиот живот. На пример, тој утре не треба да се појави на работа, значи треба сите да бараме оставка од него. Редно е некој веќе да сноси одговорност“, вели Лашкоска.
Според пратеничката во јавноста може да излезе вистината ако се тргне од моментот на исклучување на като системот.
„Не можело тоа да се случи без знаење на директорот, министерот за здравство и истите требаше да одговараат, а требаше да има некаков епилог и до сега. Обвинителот Јовески очигледно е извршител на СДСМ и ги прикрива криминалците“, изјави Лашкоска.
Лашкоска заклучи дека одговорноста за човечките животи не може да заврши само на оставка на еден човек, на еден директор на Клиниката.
„Одговорност треба да понесат и министрите за здравство и не само политичка, туку и кривична одговорност. Време е да се стави крај на вакви функционери одговорни за човечките животи“, смета Лашкоска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.