Македонија
Левицата: Американската амбасада ја стимулира јазичната федерализација на Македонија
![](https://makfax.com.mk/wp-content/uploads/2024/02/Американската-амбасада-ја-стимулира-јазичната-федерализација-на-Македонија.jpg)
Во време кога македонскиот национален идентитет е под опресија на империјалистички и трибалистичките апетити на соседните држави, додека македонскиот јазик како клучна идентитетска компонента е негиран и погазуван (како на меѓународната политичка сцена, така и од домашните квислинзи) амбасадорката на САД, Анџела П. Агелер, испрати честитка на амнестираниот терорист Талат Џафери САМО на албански јазик, велат од Левицата.
Со овој чин, според нив, амбасадорката на САД директно и недвосмислено ги погази:„ Уставот на Република Македонија (член 7), согласно кој во меѓународни односи службен јазик на Република Македонија е единствено македонскиот јазик и неговото кирилско писмо;
Виенската конвенција за дипломатски односи од 1961 година, која ја обврзува да ги почитува законите и прописите на земјата во која е поставена како амбасадор;
Овој чин на „стратешкиот партнер“, со погазување на македонскиот јазик и устав, најголем дел од македонските граѓани го доживуваат како директна закана по суверенитетот на државата. Воедно, ваквите политики се доживуваат како недвосмислено давање отворена поддршка и фаворизирање на политички партии и личности од страна на амбасадата на САД, кои со децении промовираат иредентистички политики на македонската политичка сцена“, се истакнува во соопштението на Левица .
Дополнително, како што велат, спроведувањето на ваквите нео-империјалистички пракси, покажуваат користење на албанскиот етникум за постојано креирање тензии, недоверба и опасни сценарија, не само во Македонија, туку и во целиот регион на Западен Балкан. Од ваквата политика во Македонија, според Левица, единствениот политички субјект кој добива е ДУИ, додека обичните граѓани, без разлика на нивниот етникум, заради тешките материјални услови, нефункционалната држава и националстички подгревања (кои не будат ништо друго освен етничка нетрпеливост и омраза) се принудени да се иселуваат.
Левица најостро го осудува газењето на македонскиот Устав и јазик.
„Цениме дека за ваквата политичка некоректност во најблага форма треба де следи протестна нота и повикување на амбасадорката од страна на ресорното министерство, за да го образложи овој „непријателски чин“ кон државата. Несомнено, оваа постапка одново подгрева етнички тензии, служи за национал-политички маркетинг и ги поткопува суверенитетот и интегритетот на државата, преку стимулација на јазичната федерализација“, се подвлекува во соопштението на Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Деспотовски: Новиот СДСМ ќе биде гласна, проактивна, критична и конструктивна опозициска партија
![](https://makfax.com.mk/wp-content/uploads/2024/06/VIK_2693.jpg)
Јован Деспотовски, кандидат за претседател на СДСМ продолжува со средбите на терен. Членовите во Крушево и Кичево ја истакнаа потребата од неопходна реформа на партијата и се наметна дебатата за тоа како ќе делува СДСМ како опозиција по изборот на новата Влада. Деспотовски посочи дека новиот СДСМ ќе работи на професионализација на партиските тела и ќе формира и влада во сенка како коректив на Власта и во заштита на граѓаните.
„За да имаме функционална демократија, настапот на опозицијата е форма на лидерство подеднакво важно за заштита и служба на интересите на граѓаните, како што е и кога партијата е дел од мнозинството. Затоа ќе бидеме гласна, проактивна, критична, конструктивна опозиција која ќе работи на заштита на интересот на сите граѓани. Пратениците, во соработка со партиските тела и комисии, после 30.06 ќе мора детално да ги анализираат и потоа коментираат предлозите кои доаѓаат од владејачкото мнозинство, но и активно да предлагаат решенија кои произлегуваат од потребите на граѓаните. Новиот СДСМ станува движечка, основна опозициска сила во Собранието,“ порача Деспотовски и додаде:
„На членовите, граѓаните и на земјава и е потребен силен СДСМ кој ќе се наметне како водечка, но и конструктивна опозициска партија и во Парламентот и на сите други нивоа. Со мудра политика и дефинирани јасни ставови за сите прашања кои не засегаат и како држава, а особено за се она што ги засега граѓаните. За да си го вратиме интегритетот и местото во општеството мора да преземеме храбри и одлучни чекори. И ова не е избор, ова е чин на одговорност што им го должиме на сите наши членови,“ рече Деспотовски.
Тој додаде и дека се предвидува професионализација на партиските тела како и градење на капацитети за да дејствува и како „Влада во сенка”. Ресорите во „Владата во сенка“ ќе работат во состав и со поддршка на тела (комисии) што ќе се формираат во рамките на партијата за одредени области (економија, надворешна политика, здравство, образование, социјална политика, зелена агенда итн.). Нивната задача е тридимензионална: прво, дебатирање и коментирање мерки што ги носи владата во одреден ресор; второ, предлагање мерки што би биле корисни за одреден ресор во државата што ќе бидат новина за владата, или алтернативни решенија на решенијата што ги нуди владата; и трето, постепено формирање личности потенцијални носители на високи функции во иднина и нивно промовирање пред граѓаните. Работењето на „Влада во сенка“ во најголема мера зави од изборот на личностите кои ќе членуваат во неа, а раководството на новиот СДСМ ќе се грижи првенствено за квалитетот и докажаноста на луѓето кои ќе членуваат во телата на владата во сенка. Меѓу останатото, Владата во сенка ќе се користи и како механизам за привлекување нови членови во партијата, пред сè млади луѓе, пишува во програмата на Деспотовски.
Македонија
Таравари почна со разрешување на клиниките: „Очекувам за два месецa повеќе да нема економски директори“
![](https://makfax.com.mk/wp-content/uploads/2023/02/taravari-1.jpg)
Новиот министер за здравство, Арбен Таравари, најави дека почнува со разрешување на економските директори на Клиничкиот центар „Мајка Тереза“, на кои им е истечен мандатот, и дека постапката ќе продолжи и за другите што вршат ваква функција, но откога ќе се направат потребните законски измени.
Таравари очекува за два месеца повеќе да нема економски директори.
„Денеска, ќе бидат разрешени 7-8 директори од вкупно 14, односно оние на кои им е истечен мандатот за в.д. директор. Како ќе им истекува мандатот, сите в.д. и другите ќе бидат разрешни. Имаме и директори што се со решение и за нив ќе треба да се направат законски измени. Но, јас очекувам за два месецa повеќе да нема економски директори“, рече Таравари при посетата на хируршките сали на клиниката за ТОАРИЛУЦ, кои беа затворени поради непознат мирис.
Таравари најави дека како министер ќе се зафати првин со овој проблем.
„При денешната посета ми беше кажано дека во одредени хируршки сали нема мирис, а во одредени има. Јас очекувам да добијам извештај од досегашните испитувања и да видиме како најбргу да го решиме овој проблем. Ми требаат неколку дена за да донесам одлука, дали ќе одиме со решавање на проблемот со отварање нова набавка и инсталирање комплетно нов систем или ќе може овој да се поправи. Се надевам дека до петок ќе имаме одлука“, изјави Таравари.
Тој потврди дека на Клиниката за кардиохирургија на директорското место е вратен докторот Марјан Шокаровски, кој беше разрешен од претходниот министер Илир Демири.
Македонија
Силјановска-Давкова го прими словачкиот амбасадор, Хенрик Маркуш: од особен интерес е интензивирањето на билатералниот политички дијалог
![](https://makfax.com.mk/wp-content/uploads/2024/06/Foto-1-1-1.jpeg)
Претседателката Гордана Силјановска-Давкова денеска го прими амбасадорот на Република Словачка, Хенрик Маркуш.
На средбата се разговараше за севкупните билатерални односи и можностите за унапредување на соработката во разни области од заемен интерес.
Претседателката истакна дека билатералните односи се карактеризираат со пријателство и разбирање оценувајќи дека меѓу двете земји постојат силни културни врски поради наследството на светите браќа Кирил и Методиј.
Нагласувајќи дека годинава се одбележуваат 30 години од воспоставувањето на дипломатските односи со Словачка, претседателката Силјановска-Давкова се заблагодари за принципиелната поддршка од Словачка и од вишеградската група како традиционален поддржувач на македонските евроинтеграции и посветен партнер во НАТО.
Во насока на продлабочување на соработката во области од заемен интерес, претседателката истакна дека е видлив растот на трговската размена за која постои можност во наредниот период да постигне поголеми резултати со заеднички ангажман од двете страни.
Таа нагласи дека од особен интерес е и интензивирањето на билатералниот политички дијалог.