Македонија
Млада докторка донира матични клетки за пациент со тешка малигна хематолошка болест

Денеска, на Универзитетската клиника за хематологија во Скопје се реализира несекојдневен чин на храброст и човекољубие кога млад семеен лекар донира хематопоетски матични клетки. со што ќе спаси живот на пациент што се соочува со тешка малигна хематолошка болест, а трансплантацијата на матичните клетки е единствената терапевтска опција.
Министерот за здравство, д-р Фатмир Меџити, ја посети донорката на матични клетки, млада девојка, воедно и докторка, на која ѝ се заблагодари на извонредна храброст и несебична посветеност да спаси туѓ живот.
„Нејзиниот чин на хуманост и солидарност е надеж потсетувајќи нè на моќта на заедницата и љубезноста во моментите кога тоа е најпотребно. Им честитам и на колегите од Клиниката за хематологија, кои ја практикуваат оваа современа метода во медицината, со која еден човек има шанса за нов почеток“, изјави министерот Меџити.
Директорката на Клиниката за хематологија изјави дека станува збор за редок пример, донорот на матични клетки и пациентот што треба да ги прими да не се во роднинска врска, ниту да се познаваат, а нивните клетки да се совпаѓаат.
„Денешниот чин на докторката е уште еден чекор до задоволството да се биде лекар и да се спасуваат животите на луѓето. Младата докторка, која е донор на матичните клетки, во Македонскиот регистар на доброволните дарители на коскена срцевина при Институтот за имунологија и хумана генетика се пријавила уште кога била студент на медицина, а минатиот месец беше идентификувана како евентуален донор. Не се двоумеше ниту миг, веднаш се согласи да му даде шанса за живот на пациент што не го познава, а боледува од акутна леукемија“, изјави д-р Ирина Пановска-Ставридис.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пронајдени двете девојки од Португалија кои се изгубија во реонот на Водно – Матка

Денес околу 17.00 часот од страна на Центарот за управување со кризи бевме известени за две изгубени туристки во реонот од врвот на Водно кон Матка, извести директорот на ДЗС, Стојанче Ангелов.
Како што информираше Ангелов, Дирекцијата за заштита и спасување итно извршила мобилизација на тимот за спасување на планина од Тетово и истиот веднаш бил упатен во пребарување на теренот.
Во 18.40 двете девојки од Португалија беа пронајдени и однесени до ресторанот Матка каде ги пречека Конзулот на Република Португалија, додава Ангелов.
Македонија
Дел од Ѓорче Петров утре без струја

Од ЕВН Македонија АД известуваат дека утре без електрична енергија ќе останат:
– во периодот од 09.00 до 15.00 часот, корисниците од улиците Веле Марков, Ибе Паликуќа, Воин Драшковиќ, Рафаел Батино. (општина Ѓорче Петров)
Македонија
Меџити прими жители од Страчинце: Анализите на експертите јасно покажаа дека отворањето на каменоломот ќе има сериозни последици врз животната средина

Првиот заменик-претседател на Владата и министер за животна средина и просторно планирање, Изет Меџити, денес ги прими во својот кабинет жителите од селото Страчинце, со кои одржа отворен состанок за одлуката за одбивање на барањето за отворање на каменолом во оваа скопско село.
Министерот Меџити ги информираше жителите за професионалните и институционалните причини што доведоа до оваа одлука. Анализите на експертите јасно покажаа дека отворањето на каменоломот ќе има сериозни последици врз животната средина, ризик од поплави и негативно влијание врз јавното здравје, велат од Министерството.
На состанокот беше истакнато дека приоритет е заштитата на животот и благосостојбата на граѓаните над секој економски интерес.
Меџити истакна дека следниот чекор е конечно поништување на концесијата во Влада, со што ова прашање ќе добие трајно решение.
Жителите на Страчинце се заблагодарија за одлуката и за приемот што го оствари министерот Меџити, нагласувајќи дека овој состанок е пример за владеење со отворен дијалог и чесна соработка со граѓаните.