Македонија
Лекарската комисија не дала прецизно мислење од што треба да се лекува Леонид, Фондот за здравство вина гледа и во законот

Вината за случајот со младиот Леонид, Фондот за здравство ја гледа во првостепената лекарска комисија која го донела конзилијарното мислење, но и во непроменетиот закон.
Мислењето на лекарската комисија според надлежните во Фондот не е концизно, или како што велат, е речиси празно, бидеќи не ги содржи конкретните побарувања.
„Во конзилијарното мислење добиено од „ТОАРИЛУЦ“ не е наведена интервенција на која што се упатува детето во странство. Наведено е што се очекува ако се замине во странство. Ова е премногу општо и не може да се заклучи која интервенција ја предлагаат. Во една ваква ситуација со вакво конзилијарно мислење каде што не е наведена конкретната здравствена услуга која се бара да се направи, се остава многу широк простор за шпекулации. Поради тоа колегите се оградија и овие прашања ги поставивме до комисијата“, брифираат од Фондот за здраство.
И покрај тој допис како што информираат, добиле нов одговор од клиниката кој повторно не бил концизен и во кој повторно не биле наведени интервенциите кои треба да се направат.
Од Фондот прецизираат дека треба да контакрираат со претседателката на првостепената лекарска комисија за да добијат објаснување од нејзина страна, што било кочењето и која била пречката во клиничката слика на Леонид, за да не биде одобрено од првостепената лекарска комисија лекување во странство.
„Формално надлежната универзитетска клиника доставува предлог конзилијарно мислење за лекување во странство, и таа клиника, тие експерти, треба конкретно да наведат која интервенција треба да се направи. Ова во конзилијарното мислење изостанува“, повторуваат од Фондот за здравство.
Претседателкта на лекарската комисија иако била повикана да го образложи случајот, денеска не се појави на средбата со новинарите.
На прашањето каква е постапката, младиот Леонид да биде испратен на рехабилитација, првите луѓе од фондот прецизираат дека проблемот лежи во Законот за здравствено осигурување.
„Овде проблемот е што законот не дозволува таква промена. И кога законот го исклучува правото за медицинска рехабилитација и за медицински интервенции кои што се од естетски карактер или можат да бидат предизвикани и поради некоја болест како на пример отстранување на дојка, поради рак на дојка, законот не дозволува ваквите интервенции да се плаќаат од страна на фондот како што е и медицинската рехабилитација“, појаснуваат од фондот.
Додаваат дека со децении кај нас, медицинската рехабилитација не била покривана од страна на Фондот за здравство.
„Законот за здравствено осигурување предвидува дека фондот покрива трошоци само за интервенции кои се засновани на медицински докази каде што се лекува одредена болест. Овие дополнителни т.н права на фондот отвораат нови прашања а тоа се капацитети и можноста на финансиските средства на фондот“, прецизираат првите луѓе во Фондот за здравство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На ГП Табановце се чека 30-ина минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори, се бележи зголемена фрекфенција на возила, на ГП Табановце времето на чекање за излез од државата е 30-ина минути, а на другите граничните премини од македонска страна нема подолги задржувања за влез и излез од државата.
АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
(Видео) Шукова: Преку БРТ-системот јавниот превоз во Скопје ќе го решиме до средината на 2028

Јавниот превоз во Скопје е една од клучните слабости на Градот. ДПМНЕ и Аросвска ветуваа нови еколошки автобуси, бесплатен јавен превоз и ред во јавниот сообраќај. Денес – нема нови автобуси, а постојните се стари, нечисти, доцнат премногу, а некогаш и не доаѓаат воопшто. Дел од приградските линии се укинати или нередовни. Градскиот јавен транспорт е крајно небезбеден и во колапс, вели Каја Шукова, кандидатка за градоначалничка на Скопје и потпретседателка на СДСМ.
Шукова додава дека решавањето на јавниот превоз не смее да доцни ни ден повеќе.
Тоа, како што додава, е услов за квалитетн живот на сите кои живеат во Скопје.
„И на тие што се возат и на тие што не се возат. На сите ни треба помалку метеж, добро поврзани општини, побрз, безбеден и одржлив јавен транспорт, транспорт кој не ги труе граѓаните на Скопје.
Решението за ова постои а јас, заедно со Градот ќе го реализирам. Како Градоначалничка на Скопје, итно ќе започнам со реализација на проектот БРТ, кој ќе обезбеди нова модерна мрежа на урбаниот транспорт во Скопје, преку коридори кои се резервирани само за автобуси. Проектот вклучува и набавка на нови еколошки автобуси и ревитализација на две депоа за автобусите“.
За ова, како што рече, одамна се обезбедени 40 милиони евра од Европската банка за обнова и развој.
„Нема веќе чекање и одлагање! Со силна одлучност, заради потребата на секој граѓанин на Скопје, гарантирам дека до средината на 2028 година, скопјани, од Ѓорче Петров, преку Центар до Ново Лисиче во Аеродром ќе се возат со првата линија на БРТ системот за само половина час, брзо и навреме – без доцнења, без гужви, безбедно. БРТ обезбедува линија од 13 км во една насока, со 21 автобуска постројка и 2 терминали, со 29 автобуси, за неверојатен број од 65.000 патници на ден“.
Шукова нагласи дека ќе се работи и на втората линија север – југ, но и на набавка на нови еколошки автобуси за останатите сообраќајни линии низ Скопје, со што, истакна таа, постојните стари и неефикасни автобуси ќе бидат целосно заменети.
Потенцира дела БРТ е решението позади кое стои и кое драстично ќе ја подобри состојбата со автобускиот превоз во Скопје.
Македонија
Меџити го претстави носителот на листата за советници за Општина Чаир: Мухамед Муртези, активист од граѓанскиот сектор

Кандидатот за градоначалник на Општина Чаир, Изет Меџити, го претстави името на носителот на листата за Општинскиот совет, Мухамед Муртези.
Во видео-обраќање на социјалните мрежи, Меџити напиша: „Денес сакам да го претставам носителот на листата на советници на ВЛЕН за Општина Чаир, докторот, интелектуалецот, активистот на граѓанското општество и човек со високи вредности, Мухамед Муртези. Заедно кон големата победа.
Само за тебе Чаир“, напиша Меџити.
Муртези за локалните избори во октомври за првпат се вклучува во партиско-политичка дејност. Тој е носител на листата на советници на „Вреди“ за Општина Чаир и кандидат за претседател на Советот. Целта, како што појаснуваат на неговото политичко ангажирање е да даде позитивен придонес и да остави добра трага и во оваа област.
„Нашата визија, заедно со идниот градоначалник на Чаир, Изет Меџити, е еден поубав, почист и побезбеден Чаир. Поквалитетно образование и наука, поразвиена култура и спорт, подобар и подостоинствен живот. Затоа што жителите на Чаир го заслужуваат тоа и јас верувам дека ова е остварливо со добра волја, голема посветеност и чесна работа. Затоа ја бараме вашата поддршка на 19 октомври. За нашиот Чаир,“ изјави Муртези.