Македонија
Лефков: Бисера Антоанета со службената картичка во Виена за 4 ноќи изнајмила трособен стан со поглед на градскиот парк од 1200 евра
Бисера не би била вистинска Антоанета, ако своите манири за раскош и луксуз не ги манифестирала во Виена, родното место на историската Антоанета. Бисера Антоанета дословно се потрудила да потсеќа на историскиот оригинал и за само 4 дена во Виена потрошила 3061 евра народни пари, за луксуз и раскош, вели Миле Лефков, пратеник на ВМРО-ДПМНЕ.
„Имено од 07.12.2023 година до 11.12.2023 година, Бисера Антоанета сама престојувала во Виена, со неа немало придружба од Министерството за култура или владата. Бисера Антоанета во Виена се осеќала како вистинска кралица. Наместо да изнајми хотелска соба, таа со службената картичка со народни пари изнајмила трособен стан од 70м2 во центарот на Виена веднаш до Палата Кобург, Виенската Опера, најелитните хотели и седиштето на ОПЕК. Стан од 70м2 е стан во кој во Македонија живеат четиричлени семејства. Во Виена Бисера Антоанета си го приуштила тоа задоволство сама на себе“, посочува Лефков.
Тој тврди дека за само 4 ноќи Бисера Антоанета платила 1213 евра или 74.599 илјади денари за трособниот стан.
„И тоа кога во непосредна близина каде што била сместена има елитни хотели каде ноќевање со доручек чини 9000 денари, а хотел со нормални карактеристики може да се најде и за 6000 денари. Која била потребата на Бисера Антоанета да изнајми трособен стан за 1200 евра за 4 ноќи во Виена со поглед на Виенскиот парк?Бисера Антоанета уживала 4 ноќи во трособен стан со поглед на Виенскиот парк. За да отпатува во Виена Бисера Антоанета си купила повратна авионска карта од Охрид до Виена за 385 евра кои ги платила првo приватно, а потоа од Министерството за култура ги подигнала парите во кеш, како репрезентација. Не јасно е што правела Антоанета во Виена 4 дена? Која била потребата од ова патување и зошто наместо луксузен трособен стан не изнајмила хотелска соба која е и до 4 пати поевтина? Антоанета очекуваме одговори. А за твоите прошетки низ Виена и како си трошела народни пари продолжуваме утре“, завршува Лефков.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Времето утре: Променливо облачно со повремен локален дожд
Променливо облачно со повремен локален дожд претежно во западните и северните делови. Ќе дува умерен до засилен ветер од југозападен правец (наместа над 70км/ч.). Минималната температура ќе биде во интервал од 10 до 18, а максималната ќе достигне од 18 до 26 степени.
Во Скопје променливо облачно со сончеви периоди. Во делови од котлината ќе има услови за повремен слаб дожд. Ќе дува умерен до засилен ветер од југозападен правец. Минималната температура ќе се спушти до 15, а максималната ќе достигне до 23 степени.
Следува период на променливо облачно време со повремени локални врнежи од дожд со променлив интензитет. Од недела температурите ќе бидат во опаѓање.
Македонија
Муцунски за шпанската агенција ЕФЕ: Интеграцијата во ЕУ е главниот надворешно-политички приоритет и клучен национален интерес
Во интервју за шпанската новинска агенција ЕФЕ, министерот за надворешни работи и надворешна трговија, Тимчо Муцунски, зборуваше за прашања поврзани со евроинтегративниот процес, осудувајќи ја „неправедната билатерализација“ и двојните стандарди кои станаа дел од процесот на пристапување во Европската Унија.
Муцунски потсети дека нашата земја има направено „повеќе од која било друга“ за пристапување кон Унијата, а блокадите од нашите соседи ги поврза со интересите на „трети страни“ кои „не сакаат европска иднина за Западен Балкан“.
Тој додаде дека главниот надворешно-политички приоритет на новата македонска влада е целосната интеграција во Европската Унија, оценувајќи го процесот како клучен за остварување на националните интереси. Во однос на блокадата од Бугарија, Муцунски нагласи дека Владата останува на ставот за одложена примена на уставните измени.
„Ние сме земја која доби кандидатски статус во 2005 година и имаме многу позитивни препораки од Европската комисија за отворање на преговорите, но за жал сè уште не сме таму. Ова е нешто што го заслужуваме и се надеваме дека ќе го постигнеме што е можно поскоро“, истакна Муцунски.
Тој додаде дека како држава направивме многу отстапки за исполнување на европските барања, а новата влада е подготвена да ги исполни и останатите услови за приближување кон стандардите на ЕУ.
„Тоа се критериумите по кои сакаме да бидеме оценети. Не е фер да се оценува нашата земја врз основа на субјективни билатерални стандарди кои немаат врска со ЕУ. Кога ќе има историска книга за одлучувањето и проширувањето на ЕУ, ние ќе бидеме поглавје за неправедната билатерализација“, заклучи Муцунски.
Интервјуто беше направено за време на посетата на Муцунски во Мадрид, по повод 30-годишнината од воспоставувањето на дипломатските односи со Шпанија. Тој и неговиот шпански колега ги оценија односите како пријателски, со акцент на силната поддршка од Шпанија за побрза интеграција на земјата во ЕУ.
Македонија
Тошковски: Заштита и подигнувањето на достоинството на полицискиот службеник е пат до професионална полиција
Денеска, во Охрид, министерот за внатрешни работи Панче Тошковски ги отвори 22-те по ред Синдикални спортски игри, во организација на Македонскиот полициски синдикат, на кои присуствуваат претседателот на МПС Зоран Кузмановски, претседателот на Советот на Европски полициски синдикати, Рикардо Валадас, директори на агенции и институции, професори и вработени во МВР. Синдикалните игри се традиционален меѓународен спортски синдикален настан, на кој претставници од 15 полициски синдикати од земји од регионов и од Европа, во седум спортски дисциплини, ќе ги прикажат своите вештини и знаења.
Во рамките на манифестацијата се одржа и панел дискусија „Кривично-правна и прекршочна заштита на вработените во МВР, АНБ, АР и УФП“ на која министерот Тошковски потенцираше дека полицискиот службеник е основната безбедносна клетка на една држава.
„Потребата од поголема заштита на полициските службеници, соодветно нивно место во рамки на општеството, подигнување на достоинството на полицискиот службеник во рамки на државата се клучни аспекти кои треба да ги развиваме, доколку сакаме да имаме полициски службеник на соодветно професионално ниво, којшто се чувствува заштитен во рамки на системот“, нагласи министерот Тошковски.
Министерот Тошковски имаше и средба со претседателот на Советот на Европски полициски синдикати, Рикардо Валадас, на која што разговараа за воспоставување и имплементирање на најдобрите европски практики во полициското работење и заштита на полициските службеници.