Македонија
Лилиана Танги: Европското подобро утре, им припаѓа на сите граѓани започнувајќи од Стразбур до Скопје
Европската Унија е изградена и се гради на помирување, на мир, на соработка, на взаемна доверба меѓу земјите-членки преку своите вредности, своите права и заедничките аспирации, рече Лилиана Танги, пратеничка, заменик претседателка на Комисијата за европски прашања во Националното Собрание на Франција за време на Регионалната либерална конференција на панелот „Иднината на ЕУ: Во кој правец се движи Европа во 2021?”, цитирајќи го францускиот пратеник за Источна Европа, Фредерик Пети: „Западен Балкан е иднината на Европската Унија“. А на сите нас, европските граѓани, е да ја градиме оваа иднина заедно.
„ Седум децении, унијата на европските држави се продлабочува и се проширува со држави кои на доброволна основа ги споделуваат и ги бранат темелните вредности на ЕУ и кои целосно го имаат интегрирано нејзиното законодавство. Државите од Југоисточна Европа напредуваат на овој пат повеќе од 20 години. Денес постои едногласност дека иднината на Западен Балкан е во Европската Унија. Оваа заедничка иднина останува еден од приоритетите на нашите надворешни политики. Тоа беше потврдено во многу наврати од европските држави, во Софија во 2018 година, во Загреб во 2020 година и во Брдо при Крањ минатиот месец, додава таа.
Според Танги градењето на оваа заедничка иднина не треба да чека, ниту да биде ограничено со проширувањето.
„ Мораме да ги развиваме и продлабочуваме нашите односи преку економски, општествени, политички и културни соработки. Тие мора да ги вклучат сите јавни и приватни актери, како и претставниците на граѓанското општество. Тоа е идеален начин за воспоставување долгорочни и конструктивни односи засновани на доверба, додава Танги.
Според неа за да се постигне ова, вклученоста на младите е од клучно значење бидејќи тие ќе бидат одговорни за обезбедување на континуитет на овие односи.
„ Затоа, треба да ја обликуваме иднината на Европа со тоа што ќе ги слушаме, ќе ги вклучиме и ќе им веруваме. Во мај минатата година ЕУ започна голем процес на консултација со граѓаните за изградба на иднината на Европа. Како дел од овој процес, комисиите за европски прашања на француското национално собрание и австрискиот национален совет одлучија да разговараат со младите луѓе, особено од Западен Балкан. И сигурно не е изненадување дека младите покажаа и инспирација и смелост. Меѓу нивните предлози, постои јасна желба за дополнително образование, обука и информирање и желба да се изградат академски и професионални мостови низ Европа за да се врати перцепцијата на нашиот стар континент во очите на младите кои понекогаш губат надеж, додаде Танги.
Таа заклучува дека европското подобро утре, им припаѓа на сите европски граѓани започнувајќи од Стразбур, Брисел, Луксембург и Франкфурт, но и од Лисабон, Рига и Скопје.
Танги потсети дека во својот говор за Европа во 2017 година, францускиот претседател Емануел Макрон истакна дека „единствениот начин да се обезбеди нашата иднина“ е преку „обнова на суверена, обединета и демократска Европа“. Дека Европа ќе се справи со големите современи предизвици како што се климатските промени, одбраната и безбедноста, големите миграции, дигиталната транзиција, економското закрепнување, како и со пандемијата со која се соочуваме речиси две години.
Танги е во земјава од денеска до 10 декември, при што предвидени се разговори на високо ниво со Министерот за Надворешни работи, Бујар Османи, со Министерката за Труд и социјална политика, Јагода Шахпаска, како и со Александар Николоски, претседател на парламентарната група за пријателство Франција-Северна Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ледени зрна на одделни патни правци: ЦУК апелира на зголемена внимателност поради заледување на патиштата
Центарот за управување со кризи известува дека денес, во попладневните часови, на одделни патни правци е евидентирана појава на врнежи од ледени зрна, кои предизвикуваат брзо и ненадејно заледување на коловозите, особено во повисоките и планинските предели.
Се апелира до сите учесници во сообраќајот да покажат зголемена внимателност, да ја прилагодат брзината според условите на патот, да одржуваат поголемо безбедно растојание и задолжително да користат соодветна зимска опрема.
Македонија
Градоначалникот на Битола им се придружи на младите бадникари во изработката на бадниковите ѕвезди
Пред дестина дена започнаа подготовките за годинашната Бадникова поворкa која ќе се одржи годинава и во Битола, како и во многу други градови и населени места во Македонија.
На младите бадникари-деца од различни возрасти во подготовката, односно изработката на бадниковите ѕвезди, вечерва им се приклучи и градоначалникот на Битола, Тони Коњановски.
Организаторите на поворката велат дека вредните детски раце неуморно и со љубов и верба во традицијата ги изработуваат овие ѕвезди, подготвувајќи се за Бадник.
На 6 јануари на големиот верски празник Бадник, собирно место ќе биде плоштадот „Магнолија“ од каде ќе се упатат кон Соборниот храм „Св. Великомаченик Димитриј“, а потоа и низ Широк Сокак до Офицерскиот дом каде ќе биде завршниот дел на поворката, велат од Општина Битола.
Организаторите упатуваат повик до сите оние кои што сакаат да бидат дел од Бадниковата поворка на големиот празник да им се приклучат.
Македонија
МВР со посебен план за безбедност и сообраќај во Маврово за зимската туристичка сезона, најави Тошковски
Министерот за внатрешни работи Панче Тошковски денеска оствари работна посета на Полициското одделение Маврово, Полициското одделение Ростуше и Полициската станица за граничен надзор Жировница, при што се запозна со тековните активности, условите за работа и конкретните предизвици со кои се соочуваат полициските службеници на терен.
„Во ПО Маврово ќе се изготви посебен план за претстојната зимска туристичка сезона, со цел овозможување подобар проток на сообраќајот, навремено управување со зголемениот број посетители и распоредување на соодветен број полициски службеници за одржување на јавниот ред и мир.“, потенцираше Тошковски.
При посетата на Полициското одделение Ростуше беше разгледана можноста за обука на полициски службеници за вршење увиди на сообраќајни незгоди, што ќе овозможи побрзо и поефикасно завршување на постапките на лице место. Оваа мерка ќе придонесе за намалување на времето на чекање, избегнување подолготрајни блокади на сообраќајниците и зголемување на функционалноста на системот, имајќи предвид дека досега овие увиди ги вршеа екипи од Гостивар.
Во Полициската станица за граничен надзор Жировница беше отворено и прашањето за можност дел од просторот во рамки на станицата да биде отстапен на општината, со цел обезбедување паркинг простор за жителите, како практично и рационално решение во интерес на локалната заедница.

