Македонија
Локалот во кој имаше турканици на настапот на Владо Георгиев е затворен поради пречекорување на работното време

Инспекторите го затвориле скопскиот локал „Мош“ каде вчеравечер на забавата со Владо Георгиев, имаше гужви и турканици меѓу посетители. Но, локалот не е затворен поради непочитување на протоколите, туку затоа што претходната недела, работел и по работното време, односно по 1 часот на полноќ.
Запечатувањето на локалот е направено денеска бидејќи инспекторката која го изготвила решението е во самоизолација поради контакт со нејзина колешка, позитивна на коронавирусот. Инспекторите ќе бараат поголеми ингеренции, најавува Стојко Пауновски, директор на Пазарниот инспекторат.
„Во законот нема превидено затворање доколку не се почитуваат протоколите. Дозволено е само кривична пријава до судот. Затворање е само за прекувремено работно време, односно по 12 во работни денови или по 1 во петок и сабота. Тогаш можеме да ги затвориме од 10 до 15 дена. Тука најголем дел пазат. Но, не пазат во гужвите“, вели директорот на Пазарната инспекција, Стојко Пауновски за „А1он“.
Кривични пријави вчера се поднесени против два угостителски објекти во Струга, каде исто така не е почитувале протоколите за заштита од коронавирусот. Пауновски вели дека инспекторите затекнале маса на луѓе кои биле станати, играле и имало гужва без дистанца.
„Го опоменале газдата, а тој рекол ‘Не можам јас да ги смирам, смирете ги вие’. Ние не смируваме гости, ниту имаме право да се расправаме со нив. Инспекторите веднаш пишале кривична пријава на двете места“, додава Пауновски.
Инаку, досега судот има донесено 25 пресуди за 23 правни субјекти. Дел од казните кои се изречени се веќе наплатени. Меѓу фирмите е и струмичкиот клуб „Аватар“, кој доби парични казни, од кои, едната веќе ја платил.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Карпош и Сарај денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 13.00 часот, корисниците од ул. Пелистерска 4-1/8. (општина Карпош)
– во периодот од 09.00 до 14.00 часот, корисниците од улиците бр. 3 и бр. 5 како и околните објекти во нивна близина во Сарај.(општина Сарај)
Македонија
Без вода дел од Центар

Од ЈП Водовод и Канализација известуваат дека денеска поради дефект на улицата Димитрие Чуповски бр.10 без вода ќе останат корисниците од улицата Никола Вапцаров лоцирани на потегот од Министерство за правда до Плоштад Македонија, општина Центар.
Водоснабдувањето ќе биде прекинато во периодот од 08.00 часот па се до отстранување на дефектот.
Македонија
Променливо облачно со повремени локални врнежи од дожд

Времето денеска ќе биде променливо облачно со повремени локални врнежи од дожд. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 5 до 11, а максималната ќе достигне од 9 до 16 степени.
Во Скопје, променливо облачно со повремен локален дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 9, а максималната ќе достигне до 13 степени.
Времето во наредните денови
До среда ќе преовладува променливо облачно време со повремени локални врнежи од дожд. Ќе дува умерен до засилен северен ветер (локално над 60 km/h), а температурата ќе се задржи под просекот за овој период од годината. Од четврток времето ќе биде стабилно и суво со пораст на дневната температура.