Македонија
Лучи се збогува со Алтернатива: Гаши замина од Влада само поради разрешување на неговиот пријател Беким Сали
„Не плачете како жени, кога не сте способни да заштитите како мажи“, пишува во објавата на социјалните мрежи, заменик министерот за култура, Даим Лучи. Тој вели дека Гаши и Сали го игнорирале и бојкотирале и дека барале министерката за култура да му ги одземе ингеренциите за тој во очите на јавноста да изгледа како „пропаднат кадар“ што би се искористило како алиби а потоа да биде разрешен од позицијата заменик-министер за култура. Лучи на социјалните мрежи порача дека повеќе нема да биде дел од Алтернатива додека на нејзино чело е Африм Гаши.
„Со кое право Африм Гаши бара мое разрешување, бидејќи одлуката на Алтернатива за напуштање на Владата е донесена само и само поради разрешување на неговиот пријател Беким Сали од функцијата министер за здравство, а седницата на Централниот одбор во Тетово беше само фарса и лага за гласачкото тело. Во оваа пригода сакам да го истакнам фактот дека сите овие месеци од моето функционирање како заменик-министер бев во служба на граѓаните, но не и на Африм Гаши и неговиот клан. Затоа јавно изјавувам дека додека Африм Гаши, Зеќирија Ибраими и Беким Сали се на чело на партија, јас ќе бидам надвор од сите партиски структури и стојам на иста политичка линија со пратеникот Скендер Реџепи Зејд“, пишува Лучи.
Заменик-министерот оценува дека досега имал успешен мандат и дека направил голем број проекти, а дел од нив почнале да им пречат на поединци во Алтернатива, како што се Гаши и Сали.
„По конгресот на партијата, иако имав политичка функција, бев единствениот функционер кој не беше дел од Централното претседателство, ме отстранија од сите централни партиски форуми и да биде лудилото уште поголемо, на инсистирање на Африм Гаши, а особено на Беким Сали како генерален секретар на партијата, побараа од министерката за култура Бисера Костадиновска-Стојчевска да ми ги одземе сите овластувања што ги има еден заменик-министер со единствена цел – да бидам оштетен и во очите на другите да изгледам како пропаднат кадар за да има алиби за мое разрешување“.
„Стојам на иста политичка линија со пратеникот Скендер Реџепи-Зејди за Алтернатива и за ова немам никаква политичка и морална обврска да одговорам на желбата или повик на некои политички промашени поединци за задоволување на нивното его, а најмалку на кланот на Африм Гаши“, пишува тој на социјалните мрежи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Митева: Скандалот во правосудството покажува дека СДС и ДУИ воспоставиле криминален систем
Последните случувања со големиот скандал за земање мито од 10 илјади евра од страна на судијата Наќе Гроргиев и второсомничениот јавен обвинител Иџет Мемети е само уште еден доказ дека во Македонија власта на СДС и ДУИ, наместо правен, воспостави криминален систем, изјави портпаролката н ВМРО-ДПМНЕ, Марија Митева.
„Колку е огромен овој скандал потврдува и фактот што станува збор за кривично дело земање поткуп од судија и јавен обвинител, а ова противправно дејство е со единствен цел – обезбедување олеснителни околности за кривичен случај, кој се води против поранешниот градоначалник на Ново Село, Боро Стојчев. Додека сите ние чекаме и бараме правда, одговорните за спроведување на правдата се први во криминалот. Не залудно на сите мерења на јавното мислење довербата во судството, Обвинителството и правосудниот систем во целина е на поразителни 1 %, историски најниско ниво на доверба додека токму власта на СДС и ДУИ ги убедуваше граѓаните дека тие се европски фронт. Ова е уште еден доказ зошто во Македонија нема систем, нема функционални институции, нема правда и со сигурност граѓаните немаат мир“, рече Митева.
Како што додаде, по откривањето на скандалот со корупција во највисоките редови во правосудството, логично се поставува прашањето дали овој случај со ексградоначалникот и митото од 10 илјади евра е единствен случај на овие два функционера во правосудството.
Таа праша дали и колку илјадници евра биле барани за случаите со финансиски криминали, трговија со дрога, убиства и слично за кои јавноста е сведок дека не видовме ниту право ниту правда? Дали е точно дека во правосудството само во изминатите неколку години биле рекетирани неколку милиони евра? Колку „накевци“ и „иџетовци“ инсталираа СДС и ДУИ во македонското правосудство? Остана да лебди и прашањето дали и колку длабоко пипалата на судскиот октопод се раширени во системот и дали главата на тој октопод се, всушност, функционери на власта на СДС и ДУИ?
ВМРО-ДПМНЕ ги повика надлежните органи од почеток до крај, од првиот до последниот, темелно да го истражат и овој, но и многу други случаи за кои има основано сомнение.
Македонија
На скопскиот аеродром спречен влез на 1,7 тони медикаменти, кои се штетни за здравјето на граѓаните
Царинските службеници на влез на Меѓународниот аеродром „Скопје“ спречија влез на 1,7 тони медикаменти, „силденафил цитат упс“ и „сибутрамин“, кои се штетни за здравјето на граѓаните.
Лековите не се регистрирани во Агенција за лекови, а фирмата увозник немала ниту дозвола за промет на големо со медицински средства, односно не е впишана во регистарот на правни лица за вршење ваков вид дејност.
По вештачењето, утврдено е дека медикаментите „сибутрамин“ се супстанција што се наоѓа на националните листи на контролирани опојни дроги и психотропни супстанции и таа претставува стимуланс на централниот нервен систем. Уште повеќе, утврдено дека таа предизвикува појава на срцеви и мозочни удари поради што медикаментите што содржат „сибутрамин“ се забранети за продажба од страна на ЕУ од 2010 година.
Медикаментите „силденафил цитат упс“ („вијагра“), пак, претставуваат супстанција што влегува во состав на медикаменти за лекување и таа подлежи на контролирана продажба.
Случајот е преземен од Одделението за истраги при Секторот за контрола и истраги, при што против правното лице ќе биде поднесена кривична пријава до Основното јавно обвинителство.
Македонија
Скопје и Прага со меморандум ќе работат на имплементација на конкретни проекти
Градоначалничката на град Скопје, Данела Арсовска, во рамките на работната посета на Чешка оствари официјална средба со градоначалникот на Прага, Бохуслав Свобода. Градоначалниците разговара на повеќе теми за интензивирање на соработката на двата града и почнување конкретна реализација на проекти од областа на транспортот, животната средина, цивилната заштита, здравството и економијата.
Арсовска и Свобода ја истакнаа потребата од градење нови пријателства, интензивирање на соработката, која истовремено ќе создаде можности за поврзување и работа на заеднички проекти, особено во областа на културата, образованието и туризмот, а во рамките на Скопје – европска претстолнина на културата 2028.
Во Прага градоначалникот Свобода организира работни средби во Градското собрание на Прага за планот за одржлива мобилност, зелениот климатски план 2030 и успешно беа договорени идните мерки и решенија што треба да бидат преземени за подобрување и унапредување во повеќе области во Скопје со соработка со Прага.