Македонија
„Македонија блокира“ порача: Ќе се мрзнеме цел ден, промена на име нема да има

Пред Законодавниот дом почна протестот на „Македонија блокира“. Граѓаните кои се против промената на уставното име веќе трети ден паралелно со 75. собраниска седница, на чиј дневен ред се токму уставните измени, се собираат пред Собранието.
„Го повикувам македонскиот народ да излезе и да не дозволиме името да ни го сменат. Ќе останеме на овој студ колку што е доволно и ќе вршиме притисок сè додека не се откажат“, изјави Драган Угриновски од „Македонија блокира“.
На протестите денеска поддршка даде и експратеничката Солза Грчева. Таа изјави дека погазени се и Собранието, и народот и државата, и затоа дава поддршка на протестите. „Собранието оддамна е погазено, уште на 30 септември, а внатре нема народни избраници, туку политички пазарџии. Сме виделе сè и сешто, но ова го достигна врвот“, изјави Грчева.
Во средата на протестите се приклучија и од опозициската ВМРО-ДПМНЕ. Лидерот на партијата, Христијан Мицкоски, посочи дека тие нема да дадат легитимитет за промената на Уставот и дека ќе го искористи своето право на демократски протест, по што со неговите сопартијци се приклучија на протестот на „Македонија блокира“.
Денеска е неизвесно дали од опозицијата ќе се приклучат на протестите имајќи го предвид фактот што претседателот на ВМРО-ДПМНЕ свика седница на Извршниот комитет на партијата поради актуелните случувања поврзани токму со уставните измени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во среда авионско прскање против комарци во Скопје

од Центарот за управување со кризи известуваат дека во Град Скопје во среда ќе се реализира авионско прскање против комарци.
„Авионската дезинсекција на подрачјето на градот Скопје, против ларви од комарци, ќе се реализира на 11.06.2025 година (среда), во раните утрински часови.
Доколку временските услови не го дозволуваат вршењето на дезинсекцијата, истата ќе се изврши првиот нареден ден, кога временските услови ќе бидат поволни, во истите термини“, велат од ЦУК.
Се известуваат пчеларите навремено да ги преземат потребните мерки за заштита на пчелите.
Македонија
(Видео) Тренчевска: Хаосот во здравството не може да го среди министер информатичар

Владата, наместо да гради систем што треба да се грижи за здравјето на граѓаните, создава систем што го става во ризик животот на луѓето, систем кој убива. И овој хаос треба да го среди новиот министер за здравство – Азир Алиу, кој е професионалец во информатиката, но не и во здравството.
Хаосот во здравството не може да го среди министер информатичар. Алиу нема никакво претходно искуство во здравството, и додека да се запознае со областа во која влегува, најверојатно и него ќе го сменат или сам ќе си отиде. И повторно нема да е криво ВМРО-ДПМНЕ, туку ќе бидат криви коалиционите партнери затоа што дале такви кандидати, рече пратеничката на СДСМ, Јована Тренчевска, на денешната собраниска седница.
Тренчевска се осврна на, како што рече, сите пропусти на оваа влада, потсетувајќи и на вчерашната прослава, 34 години од постоењето на Унијата на млади сили на ДПМНЕ, со скандалозно шоу од пиротехнички средства, на неполни три месеци од пожарот во Кочани.
„Како паметот да не им доаѓа, или намерата беше да се испрати јасна порака дека сè им е дозволено. Цехот ќе си го носат родителите, сестрите, браќата, фамилијата, роднините, пријателите, граѓаните, а тие ќе си тераат како сакаат и ќе отвораат телефонски линии за да покажат некаква божемски грижа. Од финансиската поддршка, ништо не обезбедија. Обезбедија граѓаните и компаниите со донации, а на ДПМНЕ им остана фалбата и лажниот ПР, рече Тренчевска.
Таа потсети дека имаме влада која, заради својата неспособност, се соочи со најголемата трагедија во историјата на независна Македонија – кочанската трагедија, каде што згаснаа 62 млади животи, а 200 се повредени.
Влада која не знае како да се справи со здравствените предизвици. Токму во контекст на оваа трагедија, таа, додаде Тренчевска, не прифаќа понудени законски решенија од опозицијата, со кои се нуди вистинска и реална поддршка и помош, потенцираше Тренчевска.
Таа потенцираше дека во моментов ја имаме најнеспособната влада од осамостојувањето на Македонија до денес, која го донесе здравството до степен на „тежок пациент“ на кој му нема спас.
„Секој сектор од здравството е метастазиран од неспособноста и негрижата на власта, а граѓаните го плаќаат цехот со сопственото здравје“.
Македонија
Aлиу нов министер за здравство

Попладнево пратениците во Собранието го избраа Азир Алиу за нов министер за здравство.
Алиу кој доаѓа од редовите на коалицијата „Вреди“ беше избран од присутните 95 пратеници, при што 65 гласаа „за“ Алиу, а 15 беа „против“. Тој доаѓа на местото на Арбен Таравари кој ја напушти Владата и коалицијата.
Алиу според неговата биографија е дипломиран електроинженер и доктор по компјутерски науки, кој моментално ја извршува функцијата редовен професор на Факултетот за компјутерски науки и технологии при факултетот во Тетово.