Заменик-министерката за здравство, Маја Манолева, денеска беше во посета на Центарот за рехабилитација на патологија на вербалната комуникација, каде што оствари средба со директорката Силвана Филипова и со вработените во установата.

Во овој центар првпат беше имплементирана програма за рехабилитациски третман на децата со нарушување од аутистичен спектар, сензорни дисфункции и други комбинирани развојни нарушувања, со која првпат во државата се почна со структуриран мултидисциплинарен третман на децата со нарушување од аутистичен спектар.

„Како што ме информира директорката Филипова, унапредени се условите со опремени сензорна соба, снузленд-соба, кабинет за ВАТ-терапија, кабинет за АРТ-терапија, а исто така се опремија и четири логопедски кабинети за спроведување на оваа програма, која воедно претставуваше и прв организиран мултидисциплинарен пристап во третманот на децата со нарушување од аутистичен спектар во државата“, рече Манолева.

Центарот работи и според програма за рана интервенција на деца со развојни нарушувања од 0 до 3 години, каде што е реализирана едукација за примена на Hanen program – It takes Two To Talk за родителите на деца со доцнење во говорно јазичниот развој. За таа цел, се опреми кабинет за рана интервенција, кој е структуриран за спроведување индивидуален, групен и советодавен третман, кој може да го следат родителите, без да го нарушат рехабилитацискиот третман.

„Министерството за здравство изминативе години значително вложува во набавка на опрема за здравствените установи, конкретно за овој центар е набавен софтвер за спроведување ЕЕГ неврофидбек-третманот, со кој се подобрува функционирањето на установата. Со донација на Министерството во моментот се реновира и кабинетот за аудиометрија“, истакна Манолева.