Заменик-претседателот на Владата задолжен за европски прашања, Бојан Маричиќ, се сретна со новоназначената директорка за Западен Балкан во Генералниот директорат за соседство и преговори за проширување на Европската комисија, Валентина Суперти.

На средбата се разговараше за успешно завршениот скрининг-процес, за спроведувањето на планот за раст, одлучноста на двете страни за упорно работење со цел пристапување на државата во ЕУ, реализација на реформската агенда и поддршката што Европската комисија постојано ја дава за Северна Македонија.

Во таа насока, вицепремиерот Маричиќ изрази очекување за натамошна поддршка од европските институции за реформската агенда и процесите што се пред нас на патот кон ЕУ укажувајќи дека тоа ќе придонесе да ги задржиме европскиот курс на државата и стабилноста на целиот регион.

Директорката Суперти истакна дека посветеноста и стратегијата за вклучување на Европската комисија за проширување на Унијата со земјите од Западен Балкан е важна политика за регионот и продолжува со максимално темпо. Планот за раст е инструмент за забрзување на клучните реформи, развој и поддршка на економиите на земјите од Западен Балкан, со цел напредок и реализација на стратешката цел за пристапување во ЕУ.

Вицепремиерот Маричиќ се заблагодари за континуираната поддршка и одличната соработка што ја имаме со европските институции потенцирајќи дека институциите ќе продолжат посветено да работат на евроинтеграциите сè до постигнување на крајнната цел – полноправното членство на државата во ЕУ.

На состанокот присуствуваа државната секретарка на Секретаријатот на европски прашања, Дрита Абдиу Халили, и претставници на Делегацијата на ЕУ во Северна Македонија.