Македонија
Маричиќ: Имаме препознаен напредок од ЕК и ни претстојат нови можности
Вицепремиерот задолжен за европски прашања, Бојан Маричиќ, на денешната заедничка прес-конференција со шефот на Делегацијата на ЕУ во земјата, Гир, рече дека Северна Македонија доби позитивен годишен извештај на Европската комисија за 2022, прв по отворањето на преговорите во јули оваа година и дека според него имаме одржливи реформи, имаме препознаен напредок и ни претстојат нови можности.
„Од аспект на вкупната подготвеност, Северна Македонија сè уште стои најдобро во регионот во кластерот фундаментални вредности, кој е најважен за динамиката на преговорите, но и во кластерот ресурси, земјоделство и кохезија. Во кластерот конкурентност и инклузивен раст и во кластерот зелена агенда и одржлив развој сме веднаш зад Црна Гора и Србија, кои веќе една деценија преговараат, а кај кластерот внатрешен пазар и кај кластерот надворешни односи сме приближно на исто ниво со овие две земји“, посочи Маричиќ.
Во извештајот за 2022 стои дека Европската комисија го поздравува почетокот на преговарачкиот процес, што беше потврдено и од страна на комесарот Вархељ за време на вчерашната прес-конференција, на која изјави дека: „Одржувањето на меѓувладината конференција на 19 јули 2022 година е нова пресвртница во односите меѓу Северна Македонија и ЕУ бидејќи пристапните преговори почнаа“.
Според вицепремиерот Маричиќ, ова е признание за континуираната посветеност на Северна Македонија и постигнувањата во спроведувањето на реформите, особено во кластерот фундаментални вредности, каде што се оценува дека напредокот во правосудството расте и се бара да продолжи трендот на независно и самостојно работење.
Во продолжение на прес-конференцијата Маричиќ се осврна на кластерите преку анализа на извештајот, кој, како што вели вицепремиерот, секогаш дава објективен пресек на состојбите и напредокот во реформите и ги идентификува областите во кои треба да ги зголемат напорите и да испорачаат повеќе резултати.
„Од аспект на остварениот напредок, задржано е темпото на напредок или има подобрување во 23 од вкупно 43 области/поглавја, а во другите 20 области има ограничен или помал напредок. Од аспект на подготвеноста, во речиси 90 % од областите имаме делумна или добра подготвеност, потенцира Маричиќ, додавајќи оти тоа е показател дека и покрај сите внатрешни, но и надворешни предизвици со кои се соочуваме, сепак имаме стабилен континуитет во вкупната подготвеност на земјата, што треба да биде поттик повеќе за сите.
– Во Извештајот на Европската комисија стои дека Северна Македонија недвосмислено ја потврди стратешката определба кон Унијата, меѓу другото и со фактот што беше прва земја од регионот која се придружи кон сите осуди, санкции и рестриктивни мерки поврзани со руската агресија на Украина со постигнување на 100% усогласеност со Заедничката надворешна и безбедносна политика на ЕУ, за што имаме и највисока оценка досега. Овој чекор на дело покажува дека Северна Македонија е партнер на Унијата и имајќи ги предвид тековните предизвици со кои се соочуваме сите, би ја искористил можноста да дадам апел дека очекуваме земјата и регионот да бидат вклучени во механизмите на ЕУ за снабдување со енергија и храна, рече вицепремиерот Маричиќ.
На крајот вицепремиерот и главен преговарач со ЕУ рече дека остануваат посветени на реформите и дека треба обединување за оваа национална задача за што е потребно заеднички да се работи за надминување на слабостите нотирани во извештајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денес свечено примопредавање на претседателската функција
Во Кабинетот на претседателот денес ќе се одржи официјална церемонија на примопредавање на функцијата Претседател со највисоки државни и воени почести.
По свечената церемонија новоизбраната претседателка Гордана Силјановска Давкова и досегашниот претседател Стево Пендаровски чијшто мандат истекува денес, предвидено е да остварат тет-а-тет средба.
Државната изборна комисија вчера и’ го издаде уверението за избран претседател на Гордана Силјановска-Давкова. Во текот на денешниот ден таа пред пратениците во Собранието ќе даде свечена изјава.
Скопје
Посебен режим на сообраќај во Скопје
СВР Скопје ги известува граѓаните на Скопје дека од 08.30 часот до 10.30 часот, поради одржување на улична трка, од страна на Единицата за безбедност на патниот сообраќај при СВР Скопје ќе бидат преземени мерки за посебен режим на сообраќај и тоа по сообраќајниците по кои ќе се движат натпреварувачите, кои имаат стартна позиција на бул.„Илинден“–локација Фонтана, ќе се движат по бул.„Илинден“ до крстосница со ул.„Никола Парапунов“, потоа до крстосница со бул.„Партизански одреди“, десно (кон населба Ѓорче Петров) до мостот Влајко, каде што вртат полукружно и назад по истиот коловоз до крстосницата со ул.„Љубљанска“, каде вртат полукружно и по истиот коловоз се враќаат назад на ул.„Никола Парапунов“ и по бул.„Илинден“ до целта на локација Фонтана на бул.„Илинден“.
СВР Скопје апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвива настанот.
Македонија
Сончево време, попладне со зголемена облачност и температура до 26 степени
Времето претпладне ќе биде сончево со умерена облачност. Попладне наместа ќе има зголемена облачност со краткотраен пороен дожд и услови за ретки грмежи. Ќе дува слаб до умерен ветер од северозападен правец. Минималната температура ќе биде во интервал од 5 до 11, а максималната ќе достигне од 19 до 26 степени.
Во Скопје сончево со умерена, а попладне зголемена облачност. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 24 степени, јавува УХМР.
Во следните денови времето ќе биде променливо облачно со сончеви периоди. Во попладневните часови ќе има локална појава на нестабилна облачност со пороен дожд и грмежи, особено во вторник, кога дневните температури ќе опаднат за неколку степени.