Македонија
Маричиќ на средба со германски функционери: Имаме перспектива – мора да ја задржиме

Заменик претседателот на Владата задолжен за европски прашања, Бојан Маричиќ, денес во просториите на Секретаријатот за европски прашања оствари средба со учесниците на Федералната академија за безбедносна политика 2022.
На средбата со високите германски функционери, тема за дискусија беше „Влијанието врз европската безбедносна архитектура“, а вицепремиерот Маричиќ во својот поздравен говор истакна дека Балканот и ЕУ имаат заедничка перспектива која мора да се задржи.
„Балканот отсекогаш бил клучен регион за безбедноста на Европа не смееме да дозволиме со ова „статус кво“ почвата на Западен Балкан да ја храниме со национализам, дестабилизација и нови алтернативи. Јасно е дека Европската Унија како лидер на европскиот простор повеќе не е сама. Формулата за задржување на позицијата на ЕУ како лидер на геополитичката карта е проширувањето“, рече Маричиќ.
Тој додаде дека војната во Украина и нејзиниот ефект врз регионот сега останува главна грижа за граѓаните на Балканот и дека ќе мора одговорно да го носат товарот кој го наметнуваат кризите, кој сигурно ќе биде товар во наредните години и за ЕУ и за Западен Балкан.
„Времето на лесни и пријатни дебати за европските политики одамна е минато. Сега ни треба заеднички одговор на глобалните предизвици со кои се соочуваме. Нестабилноста на регионот ќе значи нестабилност на Европа. Сега веќе не станува збор за проширување, сега е прашање на безбедност“, кажа Маричиќ пред гостите од Сојузна Република Германија.
Вицепремиерот на средбата потенцираше дека денес најдобро се разбира суштината и значењето на членството во најмоќниот воено-политички сојуз и дека НАТО е исклучително важен за регионот на Западниот Балкан, за Европа исто така, а особено за стабилноста и идниот просперитет.
На средбата беше присутен и заменик амбасадорот и раководител на економскиот сектор во германската амбасада, Ото Граф.
Курсот за високи функционери се состои од три фази: Во првиот дел од курсот, учесниците ги истражуваат историската, културната, политичката и економската заднина на Западен Балкан и разговараа за актуелните случувања со експерти.
Во вториот дел од курсот ќе ја формираат основата за дискусии со понатамошни експерти и носители на одлуки во регионот и тоа во Сараево, Белград, Скопје и Приштина. Во третиот дел од курсот, учесниците уште еднаш критички ќе размислуваат за нивните позиции и ќе го завршат курсот со дискусија помеѓу учесниците и националните носители на одлуки на високо ниво за тоа кои позиции и стратегии Германија и Европа треба да ги усвојат и да ги следат во однос на Балканот во иднина.
Организациски, Федералната академија за безбедносна политика спаѓа во областа на одговорност на Сојузното Министерство за одбрана. Претседател на Академијата е амбасадорот Екехард Бросе. Федералната академија за безбедносна политика има околу 70 вработени, кои доаѓаат од сите министерства застапени во Федералниот совет за безбедност, и е основана во Бон во 1992 година. Таа е со седиште во просториите на палатата Шенхаузен во Берлин од 2004 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот, Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага која опфаќа повеќе правни и физички лица, а целта е целосно разоткривање на криминална група која дејстувала подолг временски период и имала за цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да се стекнат со противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење на организиран криминал и корупција, во акцијата со асистенција на САЕ “Тигар”од слобода се лишени седум лица и истите се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. Во сабота ќе дува умерен до засилен југозападен, а во недела ветерот ќе го смени правецот во северен.