Вицепремиерот задолжен за европски прашања, Бојан Маричиќ, денес се обрати на економскиот форум на „Фајнанс тинк“ истакнувајќи ја важноста на реформите и придобивките од процесот на европската интеграција на земјата, со фокус на економијата и економскиот развој.

„Стабилни и демократски институции се почетна точка за економски развој. Процесот на европска интеграција е суштински фактор за успешна трансформација на земјите од регионот. Овој процес ќе даде силен поттик и нова динамика на спроведување на политичките и економските реформи, со цел побргу да се достигнат европските стандарди“, рече Маричиќ потенцирајќи дека Унијата мора да биде похрабра во однос на политиката на проширување, што неминовно ќе доведе до мотивација и импулс и на граѓаните и на економијата, но и на граѓанското општество, да бидат поактивни, па и во бизнис-можностите и искористување на европските пари за развој на економијата.

Вицепремиерот Маричиќ истакна дека сите стандарди не може да се постигнат во ист момент и дека за тоа треба време.

„Токму затоа ни е потребна помош во овој процес и од економските оператори и од граѓанскиот сектор затоа што колку потесно гледаме во остварувањето на потесниот интерес на краток рок, толку потешко ќе ни биде потоа да спроведеме вистински реформи за вистинско интегрирање на заедничкиот пазар“, додаде Маричиќ.

Вицепремиерот Маричиќ говореше и за спроведувањето на ИПА, како и програмирањето на оваа и идната година, но и за приоритетот што го постави Влада во изминатите 5 години, истакнувајќи дека има уште многу за работа во подобрувањето на имплементацијата, која ќе се движи во насока на зајакнување на економијата паралелно со европските интеграции.

​