Македонија
Маричиќ: Франција има голема шанса да го врати во живот процесот на проширување на ЕУ

Вицепремиерот задолжен за европски прашања Бојан Маричиќ се обрати на Годишната меѓународна конференција „Стратешки текови 2022“ на тема Европа по претседателските избори во Франција, велејќи дека нашата држава очекува пробив во процесот на пристапување во ЕУ за време на француското претседателство со ЕУ.
„Истовремено, тесно и интензивно работиме со нашиот сосед Бугарија за изнаоѓање заемно прифатливо решение за отворените прашања. Ние го направивме нашиот дел, направивме и повеќе отколку што се очекуваше досега, сега е време ЕУ да го направи својот чекор напред“, порача вицепремиерот.
Тој во своето обраќање посочи дека тековната агресија на Русија над Украина јасно покажа колку е важно да се заврши обединувањето на европскиот континент, да се направи посилен и поотпорен на какви било сегашни или идни закани.
„Ова е ставот што ние како земја го промовираме во последните неколку децении. Ова беше ставот и на актуелната Европска комисија при лансирањето на геополитичките приоритети за овој мандат“, истакна Маричиќ изразувајќи жалење што токму кризата испрати порака дека проширувањето и целосното обединување на Стариот Континент со Западен Балкан се клучни за стабилноста и безбедноста не само на регионот, туку и на целата Европа.
Според него, ЕУ е крајно време да го одржи своето ветување за земјава и да остане кредибилна и да ја потврди својата улога како глобален актер со забрзување на процесот на проширување и признавање на штетата од одржувањето статус кво, посочувајќи дека Франција има голема шанса да го врати во живот процесот на проширување преку обезбедување на одлуката за почеток на пристапните преговори со Северна Македонија и Албанија, со одржување на првата меѓувладина конференција со двете земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Таравари не излезе од Владата поради грижа за правата на Албанците, одговорите нека ги побараат во обврските преземани за инвестицијата Ѓока“, реагира ВМРО-ДПМНЕ

„Алијанса на Албанците на Арбен Таравари треба да научи дека кога неосновано критикуваат и измислуваат, притоа ставаат зборови во уста кои не биле кажани од премиерот Мицкоски, ќе добијат аргументиран и издржан одговор“, реагира ВМРО-ДПМНЕ на соопштението на Алијансата за Албанците.
„А вистината зошто излегоа од Владата не се крие во грижата на Таравари за Албанците ниту пак борбата за некакво подобрување на нивните права.
Вистината е многу едноставна и болна.
Членовите и заинтересираните за вистината одговорите нека ги побараат во една инвестиција на Таравари што се вика Ѓока. Какви обврски превземал и какви услови прифатил. Тоа не е наш проблем. Оставаме сами да си ги решат“, се додава во реакцијата на ВМРО-ДПМНЕ.
Македонија
Времето утре сончево и топло, за викендот локален пороен дожд и грмежи

Времето утре ќе биде претежно сончево и топло. Ќе дува слаб до умерен ветер од јужен правец. Минималната температура ќе биде во интервал од 6 до 14, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува слаб ветер од јужен правец. Минималната температура ќе се спушти до 12, а максималната ќе достигне до 36 степени.
Времето во наредните денови
Во следните два дена ќе се задржи претежно сончево и топло време со постепен пораст на дневните температури. Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен југозападен, а во недела северен ветер, кој ќе услови опаѓање на дневните температури. Потоа следува период на стабилно и потопло време.
Македонија
Шукова: Негрижата на ДПМНЕ и Арсовска го оставија во заборав булеварот Борис Трајковски

„Булеварот Борис Трајковски како витална сообраќајница за жителите на Кисела Вода и Драчево, е слика на целокупното 4 годишно владеење на ДПМНЕ и Данела Арсовска. Тоа е одраз на целосна незаинтересираност, темелна негрижа и хаос“, рече денеска Каја Шукова кандидатката за градоначалник на Град Скопје од СДСМ која беше на оваа сообраќајница која ги поврзува Кисела Вода и Драчево.
„Четири години ДПМНЕ и нивната избраничка Данела не мрднаа со прст за да ги довршат преостанатите 2,5 км од булеварот Борис Трајковски. Барем Орце Ѓоргиевски, додека пиеја кафиња со Данела Арсовска, да ја посетеше за еден од најгорливите проблеми во неговата општина. По 4 години од актуелната власт, булеварот Борис Трајковски остана ветен, недовршен и небезбеден за над 50.000 граѓани од овој дел на градот“, порача Шукова.
Притоа таа истакна дека ваквото неодговорно однесување наскоро ќе заврши најавувајќи негово целосно завршување.
„Не поради политички маркетинг, не поради пи-ар, туку поради тоа што ова е базична потреба на граѓаните од овој дел на Скопје, нешто што нужно им следи и што е обврска на секој кој ја добил довербата да управува со градот. Булевар како што доликува на Скопје, по сите стандарди, безбеден и ефикасен за надминување на сообраќајниот метеж“, рече Шукова.
Од Булеварот Борис Трајковски Шукова сподели дека нејзината визија за Скопје, е метропола со модерна сообраќајна инфраструктура, логично поврзана со современ јавен превоз, и сообраќајни решенија кои гарантираат ефикасност и безбедност за граѓаните.