Македонија
Медицинските сестри: Не е безбедно малолетни ученици да бидат ангажирани во ковид-центрите

Унијата на ЗМСТАС предводена од Здружението на медицински сестри, техничари, акушерки и стоматолошки сестри „За нас“ реагираат на последната изјава и предлог-идеја на министерот за здравство, Венко Филипче, за можно ангажирање на учениците од четврта година од средномедицинските училишта во ковид-центрите како помош на медицинскиот кадар.
Ваквата идеја, според нив, не е безбедна за учениците и реагираат со цел оваа идеја да не прерасне во одлука.
„Сметаме дека во еден ваков период кога се носат мерки за зачувување на здравјето на учениците и се препорачува онлајн-настава со цел да се намали трансмисијата во училишните клупи, не е соодветна идеја малолетни ученици и недоусовршен кадар од средномедицинските училишта да биде впуштен директно во најголемите жаришта на оваа пандемија.
Ние, професионалците од сестринската професија, сметаме дека ризикот е многу голем. Во една за нас исклучително тешка ситуација со две медицински сестри на 30 пациенти, ангажманот на учениците како помош дополнително би ги отежнало работите, пред сè, поради ризикот и нивната безбедност и нашата одговорност за оние што треба да учат – практицираат, а ние треба да ги менторираме. Учениците, ако се заразат, можеби ќе поминат асиптоматски, но што е со нивните најблиски? Ако е ова решение недовршени кадри да нè надополнуваат, ги имаме четирите високообразовни институции за идните дипломирани медицински сестри, кои барем се полнолетни“, изјавуваат од извршниот одбор на Унијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Карпош и Сарај денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 13.00 часот, корисниците од ул. Пелистерска 4-1/8. (општина Карпош)
– во периодот од 09.00 до 14.00 часот, корисниците од улиците бр. 3 и бр. 5 како и околните објекти во нивна близина во Сарај.(општина Сарај)
Македонија
Без вода дел од Центар

Од ЈП Водовод и Канализација известуваат дека денеска поради дефект на улицата Димитрие Чуповски бр.10 без вода ќе останат корисниците од улицата Никола Вапцаров лоцирани на потегот од Министерство за правда до Плоштад Македонија, општина Центар.
Водоснабдувањето ќе биде прекинато во периодот од 08.00 часот па се до отстранување на дефектот.
Македонија
Променливо облачно со повремени локални врнежи од дожд

Времето денеска ќе биде променливо облачно со повремени локални врнежи од дожд. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 5 до 11, а максималната ќе достигне од 9 до 16 степени.
Во Скопје, променливо облачно со повремен локален дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 9, а максималната ќе достигне до 13 степени.
Времето во наредните денови
До среда ќе преовладува променливо облачно време со повремени локални врнежи од дожд. Ќе дува умерен до засилен северен ветер (локално над 60 km/h), а температурата ќе се задржи под просекот за овој период од годината. Од четврток времето ќе биде стабилно и суво со пораст на дневната температура.