Македонија
Меџити: По 9 години, ги ажурираме упатствата за практикување медицина заснована на докази

Министерот за здравство, д-р Фатмир Меџити, денеска оствари средба со работната група, која ќе работи на ажурирање на упатствата за практикување медицина заснована на докази (МЗД). Министерот оваа група ја формира со цел да им се овозможи на лекарите и на здравствените работници ажурирани и независно прегледани медицински содржини засновани на докази како еден од начините да се унапредат квалитетот и ефикасноста на грижата за пациентите.
„Ја формирав оваа работна група со цел да им овозможиме на лекарите и на здравствените работници ажурирани и независно прегледани медицински содржини засновани на докази како еден од начините да се унапредат квалитетот и ефикасноста на грижата за пациентите. Упатствата за практикување медицина заснована на докази ќе им бидат поддршка на здравствените работници во критичните моменти во текот на работата бидејќи ќе им овозможат брз и сеопфатен пристап до најновите и најдобри научни докази на едно место. Со тоа не само што ќе им заштедиме во време на лекарите туку очекуваме и дека ќе го подобриме исходот од лекувањето и ефикасноста на третманот. Проектот всушност претставува целосна надградба на веќе постојниот проект за обезбедување упатства за практикување медицина базирана на докази од Министерството за здравство, кои не се ажурирани од 2014 година“, рече министерот Меџити на состанокот.
Како што истакна, со помош на работната група ќе се надградат неажурираните упатства со целосно нови упатства и тие ќе се ажурираат на една до две години сѐ со цел да бидат во тек со научните новини.
„Почетокот на проектот за преведување и стручна редактура на овие упатства е најдобар доказ дека нашето здравство има лекари ентузијасти, кои се вложуваат за подобар здравствен систем“, рече министерот.
Медицината заснована на докази подразбира употреба на докази добиени со помош на научни методи во одредени делови на медицинската практична дејност. МЗД има цел добивање квалитетни докази, кои информираат за ризиците и бенефитите од медицинскиот третман. МЗД подразбира разумна, експлицитна, издржана употреба на моментно најдобрите докази во донесувањето одлуки за грижата на секој пациент.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од следната недела забрана за камиони над 15 тона на државните патишта за време на викенди и во денови со екстремно високи температури

Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури,извести Авто-мото сојузот на Македонја (АМСМ).
Збраната ќе важи во термините:
петок од 17:00 – 22:00 часот,
сабота од 09:00 до 18:00 часот и
недела од 09:00 до 22:00 часот.
Во деновите со екстремно високи температури, определени од Министерство зa здравство, забранaта ќе важи и од понеделник до четврток во период од 11:00 до 17:00 часот.
Ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со Јавното претпријатие за државни патишта.
На магистралниот пат А2 делница: Скопје – Охрид – Скопје (со важност до 01 септември) се забранува движење на тешки товарни возила чија вкупна маса преминува 7,5 тони за време на викендите, во следните интервали:
петок од 15:00 – 22:00 часот,
сабота од 07:00 до 12:00 и од 18:00 до 24:00 часот и
недела од 07:00 до 22:00 часот.
Од АМСМ велат дека овој посебен режим на сообраќај се воведува во текот на летото со цел избегнување на застојот во сообраќајот на патната делница кон најпосетуваното туристичко место во Република Македонија, намалување на застоите на пунктовите за наплата на патна такса и воопшто побрз проток на возилата и непречено движење на туристите.
И ова ограничувањето не се однесува на возила кои превезуваат живи животни, цвеќе, хуманитарна помош, жито и житни култури и леснорасиплива стока.
Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.