Македонија
МЗШВ: Почнуваме нов проект, решаваме децениски проблем на земјоделски семејства од пелагонискиот регион
Министерот за земјоделство, шумарство и водостопанство Љупчо Николовски, беше во работна посета на Битола и оствари средба со земјоделци од пелагонискиот регион.
На средбата Николовски го најави почетокот на новиот проект со кој ќе решиме децениски проблем за 2000 земјоделски семејства од пелагонискиот регион.
Дваесет години наназад, земјоделците не беа во можност да ги користат нивните парцели вратени со денационализација, бидејќи се заглавени во средина, помеѓу парцелите кои се дадени на долгогодишен закуп на ЗК Пелагонија.
Со вакавата поставеност на парцелите, тие имаа отежнат или никаков пристап до површините и немаа услови за непречено да ги обработуваат и да остваруваат профит од земјоделско производство, велат од министерството.
„Денеска можам да најавам дека на иницијатива на Министерството за земјоделство, шумарство и водостопанство, обезбедена е донација од меѓународна институција и веќе од април, стартуваме со проект кој ќе овозможи разрешување на статусот на сопственост на 2000 сопственици на земјоделско земјиште, со вкупна површина од 1300 хектари во 52 населани места во Пелагонискиот регион. Проблемот ќе биде решаван со примена на постапки за консолидација на земјоделско земјиште, на начин што ќе се определи земјоделско земјиште во државна сопственост со иста вредност и квалитет како и земјоделското земјиште во приватна сопственост кое било вратено со денационализација и со парцелизирање на тоа државно земјиште на толку делови колку што има засегнати сопственици во тој регион. Во согласност со сите сопственици, наместо земјиштето кое е вратено со денационализација ќе се додели во сопственост ново земјиште со иста вредност и квалитет, со правилна форма и со овозможен пристап за обработка, бидејќи сегашните парцели ќе бидат извадени надвор од средишните блокови на ЗК Пелагонија. Новото земјиште ќе биде запишано со право на сопственост во катастар, сите ќе добијат нов имотен лист“ изјави Николовски.
Според него, на овој начин, нивните парцели не само што ќе бидат ослободени од средишните делови на ЗК Пелагонија, туку ќе станат функционални. Ќе можат да ги обработуваат и да аплицираат за финансиска поддршка по разни мерки од Програмите на министерството.
„Министерстсвото веќе има позитивно искуство од процесот на консолидација и тоа токму со акцент на Пелагонискиот регион, кој е најсилно поддржан во активностите за консолидација на земјоделското земјиште и тоа во Егри, Логоварди, Оптичари, Трн и Дабјани. Овие консолидациони подрачја, опфаќаат околу 2000 хектари земјоделско земјиште во сопственост на околу 1000 земјоделци, чии парцели сега имаат правилна форма, пристапни патишта до површините и канали за наводнување. За ова бевме пофалени од Европската комисија дека сме земја лидер во регионот по реализација на консолидационен процес“ потенцираше Николовски.
Нагласи дека консолидацијата е процес кој носи огромни придобивки за сите и затоа како министерство горди сме на тоа што земјоделците од пелагонискиот регион искажаа огромна доверба и активно учествуваваа во процесот на консолидација.
Министерството ќе продолжи да работи за што поскоро да ги ослободиме новите парцели, а земјоделците потоа да ја обработуваат земјата, да остваруваат профит и да придонесуваат кон домашната економија и кон раст на земјоделското производство на домашна македонска храна, велат од ресорното министерство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Циривири: ЗНАМ со реформите во здравството ќе овозможи граѓаните да добијат подобри третмани, во современи регионални центри, со реални цени на услугите
Движењето ЗНАМ – За наша Македонија денеска одржа прес конференција на
која професор доктор Јасмин Циривири ги претстави клучните прашања од
областа на здравството во изборната програма „Проглас за достоинствена
Македонија“ на Движењето, за претстојните парламентарни избори.
Професор Циривири рече дека Движењето ЗНАМ – За наша Македонија нуди
конкретни мерки за идните реформи во областа на здравството, а тие во
основа подразбираат максимално и професионално залагање од страна на
секој чинител во здравствената сфера. Целта е, како што рече, тој
пристоен и достоинствен живот на секој граѓанин во државата, со еднаков
пристап до потребните услуги. Циривири додаде дека ЗНАМ сака да покаже
дека може да се создадат услови граѓаните да бидат здрави,
работоспособни и да придонесуваат за општата благосостојба. Тој посочи
дека за да се направи тоа е потребно:
„Реконструкција на постојните и доизградба на започнатите медицински
установи на територијата на Македонија, со акцент на формирање на три
здравствени центри во Штип, Битола и Тетово, по примерот на ГОБ „8ми
Септември“. Тоа е од стратешко значење, бидејќи ќе овозможи брз пристап
и услуги на граѓаните, како и подигање на нивото на третманите со
софистицирани дијагностички методи“.
Истовремено, како што рече тој, граѓаните нема да бидат изложени на
дополнителни материјални трошоци и стресови при добивањето на
здравствените услуги, кои им следуваат по сите морални и здравствени
норми во едно современо општество. Циривири додаде дека при тоа ќе се
направи итно пополнување на дефицитарниот специјалистички кадар во овие
установи со упатување на млади лекари на специјализација, вклучувајќи ги
и приватните специјализанти. Исто така ќе се направи и привремено
дополнување на медицинскиот кадар по принципот на ротација во
регионалните центри со кадар од болниците во главниот град, до моментот
на оспособување на доктори од дефицитарните специјалности во истите.
„Очекуваме, рече доктор Циривири, – Со ова да се намалат листите на
чекање за софистицирани дијагностички процедури и особено елективните
оперативни третмани“.
Како втора мерка се предвидува формирање на реални цени на здравствените
услуги од страна на Фондот за здравствено осигурување со цел исплата
според извршените услуги кон здравствените установи, со што ќе се
овозможи самоодржливост на истите.
„Структурата на реалните цени подразбира режиски трошоци, дневниците на
персоналот неопходен за оптимално функционирање на основна единица – на
ниво на одделение, потрошниот санитетски материјал, како и
амортизацијата за одржување на непотрошниот санитетски материјал. Со
овој систем се зголемува мотивираноста на установите да ја зголемат
ефикасноста и постојано да го подобруваат квалитетот во пружањето на
здравствена нега. Овој принцип на економско делување овозможува
непосреден увид во финансиската состојба на установата и активно
учествуво во планирањето и трошењето на потрошниот и непотрошниот
медицински материјал и опрема, како и во одржувањето на болничките
капацитети“, рече Циривири.
Формирањето на диспечерски податаочен центар во Министерството за
здравство, е третата мерка што се предвидува.
„Со неа ќе се овоможи постојан увид во исполнетоста на капацитетите на
сите здравствени установи во државата.Оваа централизација на
логистичките податоци овозможува навремен транспорт и прием на итните
пациенти, за да се надмине беспотребното лутање на болничките возила по
здравствените установи без точна информација за слободно место за прием
на итните пациенти. Овој центар, исто така, ќе има клучна улога особено
при згрижувањето на пациентите при масовни незгоди,
железнички,автобуски, какон и поплави, земјотреси итн“, нагласи доктор
Циривири.
Една од мерките за подоборување на состојбите во здравството е и
креирањето на реални, конкурентни плати во сите сектори и нивоа на
здравството.
„Во ставките за плати, додатоци и надоместоци на плати во Буџетот, ќе се
зголеми масата на средства за најмалку 15 проценти, и на тој начин ќе се
обезбеди соодветно зголемување, како на докторските, така и на платите
на медицинските сестри и помошниот персонал. Порастот на платите ќе се
усогласува со порастот на минималната плата“, рече доктор Циривири.
Тој нагласи дека медицинскиот персонал ќе биде во процес на континуирана
медицинска едукација во соработка со здравствени установи кои се
движечки центри во развојот на современата медицина, а Министерството за
здравство ќе го координира развојот, овозможувајќи доостручување, по
предлог на непосредните носители на стручната дејност, во согласност со
потребите на установите.
Македонија
Левица: Бранителите и нивните семејства се заборавени, а терористите на УЧК се амнестирани и во институциите
Левица во Битола оддаде почит на загинатите бранители во Вејце.
„На денешен ден пред 23 години се случи најкрвав и најбрутален масакр во поновата историја на Македонија. Од заседа масакрирани, а потоа живи запалени и ѕверски биле убиени осуммина специјалци и полицајци припадници на специјалните единици „Волци“ и на „Посебната единица на СВР Битола“. Во нивна чест, денес во Битола беше посетен Споменикот на Бранителите, од Генералниот секретар и Носител во ИЕ5 Јована Мојсоска, Советникот Горан Велевски и Секретарот на ЛО Битола Бранислава Стојановиќ. Положено беше свежо цвеќе и беше оддадена почит на загинатите“, велат од Левица.
Членови на ЛО Битола го посетија и родното место на загинатиот бранител Илче Стојановски, Породин. Положија свежо цвеќе на спомен обележјето на загинатите од Вејце и присуствуваа на настанот оджржан во чест на Бранителот Илче Стојановски.
„И после 23 години, бранителите и нивните семејства се заборавени, а терористите на УЧК се амнестирани и во институциите. Воени злосторства не застаруваат и правда за македонските херои кои го положија животот за Македонија мора да има“, пишуваат од партијата.
Македонија
(Видео) Лукаревска: СДСМ е одговорна партија, ние не манипулираме
“Прогресивните граѓани знаат дека со СДСМ има слобода, има демократија и сигурна иднина, и токму тие граѓани се и наши најдобронамерни критичари, затоа што се демократи и затоа што имаат изградено граѓанска свест, за да биде подобро. Но во суштина тоа сме НИЕ, истите тие, што ја сакаме државата слободна, демократска, отворена, модерна, развиена. Исти вредности споделуваме, тие вредности секогаш не обединувале, и кога било најтешко и кога е најважно. Да не го потцениме моментот, сега е најважно. Важно е на 8 мај да покажеме дека сме обединети и дека заедно и подобро ќе продолжиме да работиме”, рече Сања Лукаревска, носителка во третата изборна единица.
СДСМ е одговорна партија. Ние не манипулираме, не продаваме бесперспективни илузии кои ја разградуваат државата од внатре, и и ја ослабуваат позицијата надвор. Тоа нема да го дозволиме и затоа ја бараме вашата поддршка на 8 мај, рече Лукаревска.
“Да не дозволиме она што го изградивме заедно, да се урне за само еден ден, да се вратиме назад – на поделбите на наши и ваши, на привилегирани и на казнети, на поттикнати внатрешни конфликти, а всушност сите изманипулирани, зашто тој концепт не нуди иднина. Се е јасно, се е веќе видено и чуено и тоа ни дава уште поголема верба дека сме на исправниот пат. И затоа не се откажуваме, веруваме во социјалдемократските вредности, веруваме во погресивните граѓани и веруваме дека на 8 мај можеме да продолжиме заедно”.