Одделот за внатрешна контрола, криминалистички истраги и професионални стандарди при Министерството за внатрешни работи до надлежното Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворска полиција, поднесе кривична пријава против Б.Ј. поради постоење основи на сомнение за сторено кривично дело „злоупотреба на службената положба и овластувања“ по член 353-в од Кривичниот законик.

На 15.12.2024 во 09.06 часот, извршувајќи работни задачи на работно место полициски службеник во Полициската станица за граничен премин Долно Блаце, во кабина на излез од државата, со пропуштање на должен надзор, пријавениот дозволил излез на патничко возило џип „мерцедес“ со конзуларни регистарски ознаки, управувано од А.П. од Скопје, а сопатник бил А.Г. од Скопје, за кого постоела активна мерка „задржи и веднаш извести“, согласно распишана телеграма од Одделот за криминалистичка полиција при МВР.

Со ваквото дејствие, полицискиот службеник Б.Ј. му овозможил на А.Г. да оствари излез од државата и покрај внесената мерка „задржи и веднаш извести“, а исто така, со дејствието нанел штета на угледот на МВР.

Имено, полицискиот службеник Б.Ј. не извршил адекватни проверки за возилото „мерцедес“ при премин на државната граница, не го евидентирал за остварување на излез и патниците од возилото ги завел дека пешки ја поминале границата. Исто така, при граничната проверка не почекал системот да утврди дали за лицата има активна мерка, туку веднаш им ги дал патните исправи, по што тие го напуштиле граничниот премин.

Одделот за внатрешна контрола, криминалистички истраги и професионални стандарди поднесе предлог за поведување на постапка за утврдување на дисциплинска одговорност и изрече задолжителни мерки полицискиот службеник да биде суспендиран од своето работно место до завршување на дисциплинската постапка.

Се проверува начинот на кој Реџеп Мемеди раководи со Детската клиника по неколкуте смртни случаи на деца и бебиња изминативе месеци откако тој е директор. Министерот за здравство Арбен Таравари на прашањето дали ќе го смени директорот откога вчера Државниот санитарен и здравствен инспекторат утврди дека имало пропусти во лекувањето на починатото седуммесечно бебе, одговори резервирано.

„Секако дека како Министерство за неколку директори веќе правиме евалуација за тоа како го водат клиниките, колку стручно и колку компетентно и според тоа и ќе одговориме. Не ни требаат емоции во именување и разрешување, ни требаат податоци. Да видиме и таму каде што има незадоволство, не се функционира како што треба, секако ќе се преземаат чекори. Ги евалуираме повеќето директори. Ни требаат повеќе индикатори, не сакаме емоционално да постапиме. Ни требаат сигурни докази таму каде што гледаме дека директорите не раководат баш како што треба да се заменат со подобри“, рече министерот Таравари.

Тој нагласи дека е забележливо незадоволство не само во Детската клиника туку и во клиниката во Козле. Ги прифатил незадоволните, разговарал со нив, но на разговор ја повикал и директорката за да може да донесе, како што нагласи, коректна и прагматична одлука.

Последниот смртен случај за кој вчера Санитарниот инспекторат утврди пропусти во лекувањето беше во неделата кога почина седуммесечно бебе за кое Детската клиника прво одбила хоспитализација, а откога му се влошила состојбата, два дена подоцна, го примиле на болничко лекување.

На почетокот на минатиот месец во истата клиника по две недели лекување од мозочен удар почина петгодишно девојче примено со силна главоболка.

Министерот за дигитална трансформација Стефан Андоновски се обрати на мултимедијалниот настан: „Национален портал за електронски услуги: нов изглед, нови електронски услуги“, каде што го претстави целосно новиот изглед на Националниот портал за услуги Uslugi.gov.mk

„Наследивме портал, кој, според податоците од Државниот завод за ревизија, просечно испорачуваше помалку од една услуга од корисник, со помалку од 120 илјади активни корисници. Македонија е 84-та според Индексот на ОН за дигитализираност од 190 држави, со пад од 30 места во споредба со 2010 година. Пред нас се Србија, Грција, Црна Гора, Албанија, Белорусија, Монголија, Молдавија“, изјави Андоновски.

„Новиот uslugi.gov.mk е целосно трансформиран за да одговори на потребите на граѓаните. Фактот што успеавме за помалку од три месеци да постигнеме ваква темелна трансформација е доказ дека кога постои јасна визија, професионален пристап и многу напорна работа, можеме да постигнеме резултати“, дополни Андоновски.

Министерот Андоновски ги анализира новите функционалности на редизајнираниот портал, како што се целосното ново корисничко искуство, надграден пребарувач, кој ги прави услугите достапни со еден клик до граѓаните и компаниите, прибирање фидбек од граѓаните за нивното искуство и презентирање на новите услуги кои се достапни на порталот. Андоновски особено се задржа на пристапноста на порталот за лицата со попреченост.

„Следејќи ги најновите правила на Светскиот мрежен конзорциум (W3C) – WCAG 2.2, новите функционалности на порталот додаваат можности за подобрување на изгледот погоден за лица со попреченост, со мапа и полесен и интуитивен изглед. Така гарантираме дека дигиталните услуги се навистина достапни за секој граѓанин., нагласи Андоновски.

На мултимедијалниот настан свое обраќање на панел-дискусија за новите услуги достапни на порталот имаа и претставници на Министерството за култура и туризам, Министерството за внатрешни работи, Фондот на ПИОМ, Агенција за храна и ветеринарство и Регулаторната комисија за енергетика.