Македонија
Милошоски до Јовески: Како може ДЗР во март да ви достави извештај за Онкологија, а вие до ден денешен да немате истрага?

Невообичаено е кога јавен обвинител се однесува како пратеник на власта. Знаејќи го долгото правничко искуство на господинот Јовески ќе си дозволам да го потсетам и коригирам дека не е во право за Анкетната комисија бидејќи член 76 од Уставот го демантира. Членот 76 вели дека Собранието може да формира анкетни комисии за прашања од јавен интерес, изјави пратеникот Антонијо Милошоски на денешната седница на Анкетната комисија за скандалот со Онкологија каде сведочеше јавниот обвинител Љубомир Јовески.
Милошоски нагласи дека ова е прашање од најголем јавен интерес, тука не станува збор само за профит туку и загрозување на уставното право на здравствена заштита на голем дел од пациентите.
Токму заради недостаток на лекови, препродажба на лекови, скапи лекови на црн пазар итн. А тоа се случувало и е потврдено од овластена институција преку извештајот од Државниот завод за ревизија. Како може државниот завод за ревизија вам да ви достави уште во март извештај за сите овие недостатоци, а вие до ден денес да говорите за истрага и да немате истрага? – праша Милошоски.
Милошоски додаде дека разликата помеѓу предистрага и истрага е многу голема и во овластувања и наредби.
– Јавноста цело време говори и има очекувања. Политичката одговорност ќе ја утврдиме. Но нема со тоа да нарушиме во она што е надлежност на други институции, но проблем е што другите институции не дејствуваат и затоа сме дојдени до момент на расправа на анкетна комисија, изјави тој.
Милошоски нагласи дека ако ЈО постапело посериозно и навремено и во март, јуни, јули покренело истрага и веќе дефинирало одредено дејание на кривично дело, осомничени, сега можеби овој предмет ќе беше во друга разрешница
– Очигледно е овде дека вашиот неуспех, вашето неработење неефикасност на ЈО кое се уште има најниска доверба сакате да го покриете со префрлање на одговорноста на анкетната комисија. Имате законска обврска да и кажете на јавноста што имате постапено, изјави Милошоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сијарто: ЕУ применува двојни стандарди кон Македонија и Србија, а Украина се турка на сила

Министерот за надворешни работи на Унгарија, Петер Сијарто, изјави дека Европската унија очигледно применува двојни стандарди кога станува збор за процесот на проширување.
„Европската комисија пред многу години предложи отворање на следниот кластер поглавја со Србија за да продолжат пристапните преговори. А што се случи? Некои земји членки не се согласија и одлуката не беше усвоена. Дали некој тогаш ги обвини дека го нарушуваат европското единство? Се разбира дека не. Грција со години ги блокираше пристапните преговори со Северна Македонија. Дали некој ги обвини Грците? Не. Сега Бугарите имаат предуслови. Дали некој ги критикува? Не, се разбира,“ рече Сијарто за РТС.
Тој додаде дека секогаш како виновна се посочува Унгарија, бидејќи има влада која не е „по вкус на Брисел“.
„Да бидеме искрени, дали било кој што размислува со здрав разум верува дека Украина е во подобра состојба од Србија како кандидат? Дали некој сериозно мисли дека Украина е поспремна за влез во ЕУ од Србија? Дали некој верува дека Украина може да донесе повеќе корист за Унијата од Србија? Србија е многу поспремна, во подобра состојба и би донела повеќе корист ако стане членка. А што се случува? Србија се турка на страна, а Украина се турка напред. Тоа е вистински скандал,“ нагласи Сијарто.
Македонија
Меџити најави нов модерен булевар во Чаир

Кандидатот за градоначалник на Општина Чаир од коалицијата ВЛЕН, Изет Меџити, денеска го претстави еден од приоритетните проекти од неговата програма – трансформација на улицата „Мид’хат Фрашери“ (поранешна „Македонско-Косовска Бригада“) во модерен булевар.
Според најавата, проектот ќе започне во првата година од мандатот и предвидува изградба на булевар со должина од 1.850 метри и профил од 25 метри, во соработка со Град Скопје. Булеварот ќе има четири коловозни ленти, велосипедски и пешачки патеки и зелени површини.
Меџити посочи дека новата сообраќајница ќе биде клучна артерија што ќе го поврзе Чаир со улицата „Џон Кенеди“, олеснувајќи им го пристапот на студентите до универзитетите и зајакнувајќи ја врската меѓу Центар, Чаир и Шуто Оризари.
Во следната фаза, е предвидена целосна трансформација и на улицата „Џон Кенеди“, со што ќе се изгради нов современ урбан прстен.
„Овој проект не е само асфалт и бетон. Тоа е нашата визија за еден поразвиен, побезбеден Чаир, поблиску до европските стандарди,“ изјави Меџити.
Од коалицијата ВЛЕН нагласуваат дека остануваат посветени на реализација на капитални инфраструктурни проекти кои директно ќе го подобрат квалитетот на живот на граѓаните.
Македонија
Поради пад на температурите, грејната сезона почнува две недели порано

АД ЕСМ информира дека од утре, 2 октомври, започнува грејната сезона за потрошувачите приклучени на системот за централно греење во Скопје.
Иако грејната сезона официјално почнува на 15 октомври, регулативата предвидува почеток и порано доколку прогнозата за средна дневна температура е еднаква или пониска од 12˚C. Според Управата за хидрометеоролошки работи, за 2 октомври е најавена средна температура од 10˚C, со што се исполнети условите за производство и испорака на топлинска енергија.
До 15 октомври, на веб-страницата на ЕСМ Снабдување секојдневно ќе се објавува дали има услови за испорака на топлинска енергија за наредниот ден.
Од компанијата апелираат до корисниците да ги завршат потребните поправки на внатрешните грејни инсталации, а заедниците на сопственици да обезбедат пристап до потстаниците, редовно електрично напојување и платени сметки за струја. Завршените интервенции треба да се пријават во Центарот за грижа на потрошувачи.
Сите потрошувачи можат да проверат дали нивниот објект е на списокот на затворени објекти без услови за испорака на топлина на линкот „Затворени објекти – ЕСМ Снабдување“.