Македонија
Милошоски: Османи лаже дека Собранието има мандат да одлучува за протоколот

Лага е дека Собранието има мандат да одлучува за протоколот. Ова е ставот на пратеникот Антонијо Милошоски на изјавата на министерот Бујар Османи кој рече дека треба насоки од Собранието пред го објават протоколот. Тој посочува дека Владата до Собранието доставила еден лист хартија. Милошоски го повика Османи да го достави протоколот до Комисијата за надворешна доколку сака да добие забелешки.
„Министерот Османи и премиерот Ковачевски прво почнаа со нетранспарентност и манипулации, за сега да влезат во зоната на лаги. Чиста лага е дека Собранието има мандат да одлучува за протоколот, особено не во ситуација кога протоколот никој го нема. Бујар Османи изјави дека протоколот е усогласен. Министерката од Бугарија, Генчовска, потврди дека е заеднички усогласен за после тоа, министерот Маричиќ да каже дека истиот сè уште не е формализиран. Во Собранието стигна само еден лист хартија како сублимирана информација за францускиот предлог од кој што ништо не може да се види ниту да се утврди, а камоли да се расправа. Но доколку министерот Османи сака да добие од Собранието став за македонско-бугарскиот протокол, за кој сигурни сме дека е усогласен, нека ни го достави и Комисијата за надворешна политика веднаш ќе закаже седница и ќе му дадеме сто забелешки“, вели Милошоски.
Пратеникот е дециден дека Владата го третира Собранието како место каде ќе може да ги оправда веќе донесените одлуки и да ги формализира.
„Затоа сметам дека одлучувачка улога во овој процес можат да имаат помалите коалициски партии како ЛДП, ДОМ, ДК, кои доколку се одважат и посериозно го разберат овој народен револт и го искажат своето мислење, јасно и гласно, дека не треба да дозволиме Македонија да биде земја во која уште еднаш ќе се прават преседани со ЕУ и нашето зачленување кое во овој случај е сведено на она што го кажа амбасадорот Фуере, еден бугарски уценувачки предлог за кој клучот го има официјална Софија“, додава Милошоски.
Тој гледа загриженост кај Владата, за која смета дека чека народот да отиде по одмори, па да го протурка протоколот и францускиот предлог со прифаќање.
„Моето мислење е дека Владата калкулира со францускиот предлог и македонско-бугарскиот протокол. Загрижени се поради отпорот на кај јавноста, кај граѓаните, кој е оправдан и станува сè помасовен. Сметам дека играат на картата време, летото да го направи своето, градот да биде попразен и така на тој начин во некое поповолно за нив време, со помалку присутни граѓани во главниот град и во цела Македонија да го протуркаат протоколот и францускиот предлог кој го имаат со Бугарија“, посочува Милошоски.
За извештајот објавен на бугарски медиум во кој се наведува дека нема да ги почне преговорите додека не ги смени учебниците и написите на спомениците, но и да ги исполни другите услови од протоколот, Милошоски кажа дека е жално што информации добиваме од Бугарија.
„Ние, за жал, во Македонија добиваме повеќе информации од Бугарија за тоа што одлучила нашата Влада во некои преговори отколку од македонската влада. И денеска гледаме дека во Бугарија поради нивни внатрешнополитички дискусии протече извештај од бугарското МНР во кој се тврди дека доколку се прифати францускиот предлог, реално Албанија ќе започне преговори за членство со ЕУ, Македонија ќе има само една фотосесија, но нема да ги започне преговорите, туку ќе започне една тешка сизифовска процедура за менување на Устав и исполнување на уцените кои ги наметнува Бугарија во билатералниот протокол кој е сè уште таен за македонската јавност“, додава Милошоски.
ВМРО-ДПМНЕ, нема притисоци од странство да го прифати францускиот предлог.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.