Вакцинацијата е единствен начин да се спречи ширењето на делта-сојот во земјата, а со тоа да се спречи и евентуален нов силен бран на вирусот.

„По детектирањето 7 пациенти кај кои е утврдено присуство на индиската варијанта, се утврди дека тие не биле вакцинирани, што уште еднаш го потврдува фактот колку е потребно граѓаните што побргу да се вакцинираат“, велат од Министерството за здравство.

Од таму нагласуваат дека делта-сојот е присутен во 100-ина земји во светот, па затоа, како што велат, и ние како држава не може да бидеме изземени тој да се рашири и кај нас.

„Состојбата во нашата земја, гледано од епидемиолошки аспект, засега е мирна, секојдневно се следи ситуацијата и се прават анализи. Сепак, делта-сојот има висока трансибилност, па оттука важно е граѓаните масовно да се вакцинираат. Сите официјални информации од меѓународните здравствени институции, домашни анализи на експерти и стручњаци во областа на вирусологијата и епидемиологијата укажуваат на тоа дека единствен начин да се спречи ширењето на делта-сојот или другите соеви на SarsCov2 е вакцинацијата“, велат од Здравство.

Од таму додаваат дека сите вакцини што ги има кај нас се безбедни, признаени од СЗО и од националните институти на земјите што ги произведуваат.
Надлежните потенцираат дека секоја вакцина е ефикасна и штити од тешка форма на болеста, компликации или смртен исход.

Министерството за здравство апелира до граѓаните дека е важно да се спрoведе брза и ефиксна вакцинација и затоа упатуваат повик до сите граѓани што досега не се пријавиле за вакцинација или се двоумат – да се вакцинираат што побргу.

„Вакцините се безбедни, ефикасни и единствен начин да ја одржиме состојбата стабилна. Веќе од понеделник, 12 јули, вакцинацијата во државата ќе се одвива и без закажан термин, а ќе почне и теренската вакцинација, така што вакцините ќе бидат достапни до секого и секаде“, нагласуваат од Министерството.