Македонија
Мисајловски на свечената заклетва на 28. класа питомци: Вашиот избор покажува дека ја сакате татковината

„Ви честитам на изборот, вашата работна кариера да ја посветите на Армијата, но првенствено на граѓаните, и на државата. И вие и ние заедно со вас почнуваме ново поглавје во вашите животи“, истакна министерот за одбрана Владо Мисајловски на денешната свечена заклетва на 28. класа питомци во Воената академија „Генерал Михаило Апостолски“, – Скопје, на која присуствуваа Претседателката и врховен командант на Армијата, Гордана Сиљановска Давкова, началникот на Генералштабот на Армијата, генерал-мајот Сашко Лафчиски, заменик министерката за одбрана Елфет Исмаили, деканот на Воената академија, полковник Митко Богдановски и останати гости од воено дипломатскиот кор, од Армијата и Министерството за одбрана и роднини на питомците.
Министерот Мисајловски рече дека питомците новото поглавје во својот живот го започнуваат во институцијата која има најголема доверба меѓу граѓаните. Тој додаде дека нивните први чекори се на Воената академија која е респектабилна високо образовна институција во широки рамки од која се излезени многу квалитетни офицери кои дале и даваат значаен придонес за афирмирање и развој на македонската Армија.
Мисајловски им посaка добредојде на питомците од Црна Гора, и Босна и на сите им порача: Во наредниве четири години заеднички и посветено да ги совладувате тајните на воената професија, да се усовршите, затоа што вие ќе специјализирате во област која е специфична и но карактеристична по стандардите, стручноста, дисциплината и најважно соработката. Заедно во следните 4 години ќе учите, ќе се обучувате и ќе придонесувате за развој на нашата соработката. Денес како питомци, а утре како офицери на Армии кои се грижат за безбедноста на своите сограѓани, пример за успех, пример за подготвеност, беспрекорно да ги совладувате предизвиците кои ни претстојат “, потенцира министерот Мисајловски.
„Вие питомците, сте иднината, вие питомците сте драгоцениот потенцијал на македонската армија. Ве очекуваат тешки, но и интересни студии на една солидна академија. Во изминатите, речиси три децении, Воената академија „Михаило Апостолски“, израсна во почитувана институција, призната во регионални рамки, но и пошироко. Должни сме и понатаму да работиме на нејзиниот развој и напредок“, порача Претседателката и врховен командант на Армијата, Гордана Сиљановска Давкова.
На денешната свеченост свое обраќање имаше и деканот на Воената Академија, полковник Митко Богдановски кој рече: „Вашата заклетва не само што ве обврзува, туку и ви го трасира патот кон живот исполнет со предизвици, но и со непроценливи можности. Воената професија не е лесна, но е благородна и исполнета со достоинство. Ова е пат кој треба да го изодите за да станете лидери, не само во Армијата, туку и лидери на НАТО алијансата“.
Оваа година на воената академија „Генерал Михаило Апостолски“ како дел од 28. класа се запишани 33 питомци од кои 25 од Северна Македонија (19 мажи и 6 жени), 5 питомци од Босна и Херцеговина и 3 питомци од Црна Гора.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Радев до Унгарија: Да ги убедиме нашите браќа во Северна Македонија дека без уставни измени нема ЕУ

Бугарскиот претседател Румен Радев ја повика Унгарија да ги убеди властите во Скопје дека вклучувањето на Бугарите во Уставот на Република Северна Македонија и почитувањето на нивните права се неопходни услови земјата да почне преговори за членство во Европската Унија.
„Ја повикав унгарската страна, која има пријателски односи со нашите браќа во Република Северна Македонија и растечки економски односи со РСМ, да ѝ помогне на оваа земја, со тоа што навистина ќе ги убедиме нашите браќа дека прифаќањето и вклучувањето на Бугарите во Уставот, почитувањето на европскиот консензус и отсуството на притисок и дискриминација врз Бугарите се неопходен услов за почнување преговори за членство во Европската Унија“, изјави Радев по средбата со унгарскиот претседател Тамаш Шујок, пренесе „БНР.бг“.
Радев и Шујок разговарале и за ситуацијата во регионот и за процесот на проширување на ЕУ, при што Радев истакнал дека Софија го поддржува европскиот пат на балканските земји, но напредокот, според него, треба да зависи од индивидуалните заслуги на секоја држава.
Во разговорите меѓу двајцата претседатели биле опфатени и темите за војната во Украина и иницијативата на американскиот претседател Доналд Трамп за средба со Владимир Путин во Будимпешта, која и Радев и Шујок ја оценија како важен чекор кон дипломатско решение на конфликтот.
Македонија
Андоновски на самит на Европската комисија во Подгорица: ќе ги претстави приоритетите на Македонија во дигиталната трансформација

Министерот за дигитална трансформација, Стефан Андоновски ќе учествува на Mинистерскиот самит на Европската комисија за стартапи, истражување и иновации во Подгорица, Црна Гора, на 20 и 21 октомври. Министерскиот самит ќе биде предводен од Еврокомесарката Екатерина Захариева, Комесар за стартапи, истражување и иновации при Европската комисија.
Целта на самитот е зајакнување на стартап-екосистемот на Западен Балкан, продлабочување на политиките за „паметна специјализација“, како и унапредување на истражувачките инфраструктури и примената на вештачката интелигенција во науката.
Во програмата учествуваат: Сигне Ратсо, Заменик-генерален директор на Директоратот за истражување и иновации при Европската комисија; Маида Горчевиќ, Министер за европски прашања на Црна Гора; Анѓела Јакшиќ Стојановиќ, Министер за образование, наука и иновации на Црна Гора; Бартож Марцинковски, претставник на полското претседавање со Советот на Европската комисија; Мартин Керн, Директор на Европскиот институт за иновации и технологии; и Амер Капетановиќ, Генерален секретар на Регионалниот совет за соработка.
Андоновски ќе се обрати на министерската тркалезна маса на тема „Истражувачки инфраструктури и вештачка интелигенција во науката“. Во своето излагање ќе ги претстави приоритетите на Република Македонија во дигиталната трансформација: модернизација на јавните електронски услуги, интероперабилност на системите, отворени податоци и поддршка на иновации и стартапи, како и безбедна и етичка примена на вештачката интелигенција во науката и јавната администрација.
На маргините од самитот Министерот Андоновски, заедно со останатиот дел од Македонската делегација ќе оствари повеќе билатерални средби меѓу кои и со Еврокомесарката Захариева.
Македонија
Kандидатите на „Вреди“ и на ДУИ ќе се соочат во вториот круг во Тетово, Касами е во водство

Кандидатите за градоначалници на Вреди и коалицијата НАИ, преводена од ДУИ, Билал Касами и Бајрм Реџепти ќе се соочат во вториот круг во трката за градоначалник на Тетово.
Според пребројани 100 проценти од гласовите и објавени на страната на Државната изборна комисија (ДИК), Касами од Вреди освоил 45,64 проценти од гласовите или 19.028 гласа, а Реџепти има 36,63 отсто, односно 15.272 гласа. Зад нив е кандидатката од Левица, Катка Божиновска со 7,91 отсто од гласовите.