Македонија
Мицевски се сретна со евроамбасадорот Гир

Денеска во Собранието координаторот на пратеничката група на ВМРО-ДПМНЕ, Никола Мицевски, се сретна со претставникот на делегацијата на Европската Унија во Република Македонија, амбасадорот Дејвид Гир.
На средбата се разговараше за актуелните случувања, предизвици и проблеми со кои се соочуваме како држава поради лошото владеење на оваа власт, се разговараше за катастрофалната економска состојба и огромната задолженост на Република Македонија, како и за неуспешното справување со пандемијата и решавање на последиците предизвикани од ковид-кризата.
Исто така, на оваа средба се разговараше и за актуелните проблеми и предизвици со коишто пратеничката група на ВМРО-ДПМНЕ и опозицијата во целост се соочува во рамките на Собранието на Република Македонија, конкретно во однос на неговата функционалност и непочитување на процедурите и Деловникот за работа на Собранието. Се разговараше за инклузивноста на опозицијата во процесите внатре во Собранието, за претстојниот попис, како и за ускратувањето на можноста на опозициските пратеници за дебата преку злоупотребата на европското знаменце и скратената постапка при носење законски решенија кои што секојдневно пристигнуваат во Собранието на Република Македонија.
Координаторот на пратеничката група на ВМРО-ДПМНЕ Никола Мицевски, констатираше и посочи дека во овој момент постои желба за соработка и комуникација помеѓу пратениците од власта и опозицијата, но сепак за продолжување на демократските процеси и конкретни реформи со цел приближување и придвижување на Република Македонија кон Европската Унија потребна е целосна соработка и желба за заедничко решавање и надминување на проблемите со коишто се соочуваме како држава во овој момент.
Имено, на средбата од страна на амбасадорот Дејвид Гир беше изразена подготвеност да се помогне во подобрувањето на односите помеѓу политичките субјекти со цел приближување на ставовите на власта и опозицијата во корист на граѓаните, што ќе придонесе за брзо и ефикасно решавање на секојдневните проблеми и предизвици со коишто се соочуваат граѓаните на Република Македонија.
На крајот, Мицевски изрази благодарност за конструктивната и продуктивната средба со амбасадорот на Европската Унија, Дејвид Гир, и посочи дека средбите од ваков карактер се здрави за демократијата и демократските процеси. Само ваков пристап и отворена комуникација помеѓу сите субјекти и чинители на политичката сцена во Република Македонија ќе придонесат за Република Македонија час поскоро да биде дел од семејството на Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Македонецот кој спречи терористички напад во авион: „Реагирав инстинктивно“

На летот од Лондон до Глазгов се случи инцидент, откако еден од патниците извика дека има бомба, со слогани „Смрт за Америка, смрт за Трамп“ и „Алах акбар“. Патникот кој се закани дека ќе постави бомба беше совладан од Зоран Настески, по потекло од Македонија и Србија, кој живее во Велика Британија.
Настески го собори човекот на подот за време на летот и го држеше до слетувањето, кога го презеде шкотската полиција. Во меѓувреме, во Велика Британија е започната истрага за терористичкиот напад. Индискиот „Јутуб“ канал „НДТВ“ објави видео од инцидентот, на кое се гледа моментот кога Настески совладува патник кој извикува дека има бомба и го навредува американскиот претседател Доналд Трамп.
View this post on Instagram
„Вчера наутро тргнав на одмор во Глазгов. Десет минути пред слетувањето, еден човек помина покрај мене држејќи кафе и телефон во рацете. На почетокот се плашев дека ќе ми истури топло кафе, па се засолнив. Потоа почна да вика дека има бомба и дека ќе го собори авионот, за да докаже дека политиката на Трамп е погрешна“, вели Настески, пренесува „Телеграф.рс“.
Патниците паничеа, додаде Настески, децата врескаа, а екипажот беше видливо вознемирен.
„Само реагирав инстинктивно, сакав да ги заштитам другите. Станав, го соборив, му го зедов телефонот и го држев за раце додека не слетавме. Набрзо ми помогна друг патник, не сум сигурен дали беше Англичанец или Шкотланѓанец“, рече Настески.
По слетувањето на аеродромот, пожарникарите и полицијата дојдоа на пистата и уапсија 41-годишен маж. Целиот настан го снимила патничка. Видеото набрзо станало вирално на социјалните мрежи.
По десет години работа во Велика Британија, Настески планира да се пресели со својата партнерка во Србија, каде што има семејни корени. Неговиот татко е Македонец, роден во Скопје, а неговата мајка е Србинка.
„Се селам во Белград затоа што ја запознав најпрекрасната жена на светот, Сандра“, рече Настески.
Авиокомпанијата „Изи џет“ објави дека човекот што го предизвикал инцидентот бил уапсен веднаш по слетувањето во Глазгов и дека персоналот на авионот бил обучен да се справува со вакви ситуации, за да не биде доведена во прашање безбедноста на сите во авионот.
Македонија
Започна изградбата на пречистителната станица за отпадни води во Битола

Во општина Битола, денес беше одржан состанок, со кој се означи почетокот на реализацијата на проектот за изградба на пречистителната станица за отпадни води.
Во присуство на претставници на Министерството за животна средина, Министерството за финансии, изведувачот на пречистителната станица конзорциумот Лантаниа-Стентон градба-Карканиас, избраниот надзор- фирмата Ептиса, претставници на КЈП „Нискоградба“ и претставници на општинската администрација, градоначалникот на општина Битола Тони Коњановски, посочи дека овој стратешки еколошки проект е многу значаен чекор кон заштитата на животната средина.
Основната цел на проектот е да се подобри инфраструктурата за собирање и третман на комунални отпадни води, во согласност со директивата за третман на отпадни води и националниот закон. Според договорот, времетраењето на градба е 2 години и една година гарантен период. Со помош на ЕУ, се гради одржлив систем за отпадни води за идните генерации, преку инвестирање во чиста вода и зелени решенија што ќе обликуваат поздрава и поодржлива иднина.
Македонија
Дожд и грмежи вечерва и во раните утрински часови, јавува УХМР

Времето до крајот на денот ќе биде сончево со мала до умерена локална облачност. Ќе дува слаб до умерен, во западните делови западен, а долж Повардарието северен ветер, кој наместа повремено ќе засилува. Кон крајот на денот во северозападните делови облачноста ќе се зголеми и во текот на ноќта и во раните утрински часови ќе има локален дожд, повремено пороен со појава на грмежи и услови за краткотрајно невреме.
Времето утре ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен, а наместа долж Повардарието повремено засилен ветер од северозападен правец. Минималната температура ќе биде во интервал од 13 до 22, а максималната ќе достигне од 27 до 35 степеним јавува УХМР.
Во Скопје, променливо облачно, во раните утрински и претпладневни часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер. Минималната температура ќе се спушти до 19, а максималната ќе достигне до 33 степени.