Македонија
Мицкоски: Владата за 6 години потроши повеќе од 25 милијарди евра, а од ветеното ништо не испорача

Oд 2018 година или за 6 години потрошија повеќе од 25 милијарди евра. Граѓаните треба да ги прашаме што видоа, што е направено со овие пари, колку километри автопат е направен, освен тоа што беше речиси готово и само го финишираа. Гледате што се случува за автопатот во делот Кичево – Охрид, застој целосен, и на отворена сцена имаме политички и криминални калкулантства. Најавија проект, потрошија повеќе од 200 милиони евра, буквално ниту една шајка не заковаа, од ветеното ништо не испорачаа, рече Христијан Мицкоски, претседател на ВМРО-ДПМНЕ, за време на денешната посета на Струмица, која е во рамките на кампањата „Важно е! Од тебе зависат промените!“
Мицкоски се осврна дека не е направено ништо ниту во Струмица каде што многу ветуваа.
„Се сеќавам на индустриската зона Сачево, појдете да видите дали од најавените десетици инвестиции, дали еден темел е ставен. Ние сме подготвени сериозно да ја трансформираме Македонија“, рече Мицкоски.
Претседателот Мицкоски укажа дека партијата има јасен план што да се направи и во овој регион, како и во целата држава.
„Ние имаме јасен план, а тие потрошија многу пари и ништо не испорачаа, сѐ помал е лимитот за изработка на големи суштински проекти. Но, ние треба првин основните да ги реализираме затоа што граѓаните имаат потреба од основни работи“, рече Мицкоски.
Мицкоски заклучи „првин да го завршиме почнатото, а тоа се многу споменици, споменици како проекти, кои се незавршени, тоа да го завршиме и сѐ ќе биде поинаку, граѓаните ќе имаат надеж“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Чулев: Кога службите стануваат политичко оружје, страда демократијата

Кога службите стануваат политичко оружје, страда демократијата. Внатрешните истраги во Агенцијата за разузнавање и Агенцијата за национална безбедност, како и известувањата поднесени до ОЈО за грубо кршење на законот од страна на раководители и вработени во нив, недвосмислено укажуваат на системска злоупотреба на безбедносно-разузнавачките служби, објави на социјалните мрежи поранешниот директор на Агенцијата за разузнавање Наќе Чулев.
Според него, злоупотребата на државни ресурси за следење и прислушување на лидер на опозицијата и истакнати опозициски претставници, новинари, бизнисмени, обвинители, министер и кој ли уште не, не е изолиран инцидент и удар врз поединци, туку удар врз демократијата, слободата, владеењето на правото и довербата во институциите.
„На виделина излегоа и причините за мојата професионална дискредитација, но и дискредитацијата на други колеги, незаконското следење, клевети и координирана манипулативна кампања со цел елиминација на професионални кадри од безбедносниот систем, само поради идеолошки разлики.
Уште од 2020 година, и покрај сите притисоци, измислени оперативни обработки и закани, во континуитет јавно предупредував и укажував на ризиците од незаконското постапување и злоупотребата на службите со цел демонизирање на опозицијата. Тука е и латентната колатерална штета, бидејќи манипулативните и лажни белешки не застануваат кај таргетираната личност, туку отруеното досие со години фрла сенка врз сопружници, браќа/сестри и деца – блокира работни места и сертификати, комплицира визи, работни дозволи и го лимитира пристапот до граѓански права, лепи стигма, го нарушува угледот и достоинството и на тој начин станува колективна казна“.
Денес, како што истакнува, кога е евидентно дека ресурсите на службите брутално се злоупотребувале за политички, бизнис и лични интереси, апелира дека е неопходно да има целосна истрага, декласификација на дел од фабрикуваните материјали и санкционирање на нарачателите и извршителите.
„Ова е битка, но и можност да изградиме модерен, транспарентен и одговорен безбедносно-разузнавачки систем кој ќе ја штити државата и граѓаните, а не ќе се користи за прогон на политички неистомисленици“, нагласува Чулев.
Македонија
„За прв пат во 20 години постоење, во Аеродром истовремено се градат основно училиште, детска градинка и спортска сала“, велат од ВМРО-ДПМНЕ

„Четиригодишниот мандат на локалната власт предводена од ВМРО-ДПМНЕ беше посветен на решавање на проблемите и хаосот создаден од претходниците, па потоа се премина на развој на општините. Еден од овие примери беше и општина Аеродром, која беше наследена со целосен урбан хаос, во која имаше повеќе кранови за згради, отколку насадени дрвја“, велат од ВМРО-ДПМНЕ.
„И затоа на ова прашање беше посветено посебно и максимално внимание, за да се воведе ред во овој урбан хаос и тоа веќе може да се потврди и статистичките податоци кои покажуваат дека во овој четиригодишен мандат, споредено со претходниот, бројот на издадени одобренија на нови згради е намален за 86%.
Ова значеше многу помалку станови и многу повеќе вложување во инфраструктурата.
Во Аеродром за прв пат во исто време се градат основно училиште, детска градинка и спортска сала, нешто што досега не се случило 20 години откако постои општината.
Во општината се градат проекти коишто не се само железо и бетонска конструкција, туку се градат проекти кои значат радост за децата и проекти од кои ќе произлезат идните македонски спортисти.
Изминатите четири години, во спортската инфраструктура се вложуваше како никогаш до сега. На територија на цела општина Аеродром изградени и реконструирани се повеќе од 20 спортски игралишта, како и над 30 детски игралишта.
Не беше заборавена ниту инфраструктурата, така што реконструирани се повеќе од 40 илјади метри квадратни улици и тротоари, а во моментов се работи на уште дополнителни 20 илјади нови метри квадратни.
Покрај ова, посебно внимание се посвети и на отчетноста и транспарентноста пред граѓаните, така што Аеродром од целосно затворена општина за граѓаните, се претвори во втора најтранспарентна општина во Македонија. Тоа се должи на посветена работа во интерес на граѓаните и решавањето на нивните проблеми“, соопшти ВМРО-ДПМНЕ.
Македонија
Шукова: Георѓиевски манипулира или е целосно некомпетентен па ветува парк во Вардариште

Кандидатот на ВМРО-ДПМНЕ за градоначалник на Скопје, Орце Георѓиевски, ветува „парк“ на локацијата Вардариште – најзагадената и технички најкомплицирана точка во главниот град. Со ова ветување Георѓиевски само потврдува дека или свесно манипулира или воопшто не знае што зборува, што го прави целосно неспособен и некомпетентен за функцијата што ја бара од скопјани.
„Во Вардариште има над 2 милиони кубни метри отпад, одлаган без никаква подлога. Тоа е локација со висок ризик по здравјето и животната средина“, изјави кандидатката за градоначалник на Скопје од СДСМ, Каја Шукова.
„Само процесот на санација и деконтаминација на тоа земјиште би траел со години, пред воопшто да може да се зборува за било каква употреба, а најмалку за парк“, посочи Шукова.
Покрај еколошката загрозеност, постојат и правни и технички пречки за било каква интервенција на теренот.
„Во моментов тече арбитражна постапка во Париз поврзана со проектот ‘Скопски колектор’, кој поминува токму низ Вардариште. До завршување на таа постапка, ниту смее ниту може да се менува намената на тој простор“, предупреди Шукова.
„Уште во 2017 година, со поддршка од ЕУ, е изработена детална техничка документација со која јасно се предвидува: Вардариште треба да биде локација за современа претоварна станица за отпад. Тоа е единствениот стручен и легитимен план. И јас стојам зад тој план“, изјави Шукова.
Во моментов е во тек и јавна набавка за поддршка на целиот регионален систем за управување со отпад во Скопскиот регион. „Секој обид за политичка интервенција на Вардариште пред завршување на оваа постапка е опасен, штетен и спротивен на сите законски и еколошки норми“, додаде Шукова.
СДСМ остро реагира на ваквите лажни ветувања и го повикува Орце Георѓиевски да престане со ширење неосновани фантазии и да одговори за четиригодишната неспособност на неговата партија додека беа на власт во Градот Скопје.
„Георѓиевски не нуди решение. Тој нуди изборна измама. Вардариште, што ВМРО-ДПМНЕ и Данела Арсовска го оставија да гори и да труе, сега се користи за предизборен маркетинг. Но скопјани веќе еднаш беа излажани со 150 автобуси, мега паркови и слични бајки. Време е за сериозен, стручен и државнички пристап“, заклучи Каја Шукова, кандидатка за градоначалничка на Скопје од СДСМ.