На денешната прес-конференција претседателот на ВМРО-ДПМНЕ, Христијан Мицкоски, одговарајќи на новинарско прашање во однос на можни коалицирања за локалните избори истакна дека ВМРО-ДПМНЕ е подготвена да преговара за коалиција со сите партии кои се против Заев и коалицијата на власт.

„Ставот на ВМРО-ДПМНЕ го имам јас соопштено неколку пати во минатото и ќе го повторам. Сите оние политички субјекти коишто ценат дека владата, власта во случајот предводена од СДСМ и ДУИ како мнозински партии, водат погрешни политики и водат политики коишто се на штета на мнозинството граѓани, на штета на државата, сите тие политички субјекти коишто ги споделуваат овие чувства, мислење, тврдење се добредојдени во коалиција со ВМРО-ДПМНЕ и ВМРО-ДПМНЕ е подготвена со сите тие да разговара и да преговара за коалиција уште пред одржување на првиот круг на локалните избори. Тоа ги вклучува тука и партиите на Албанците, Турците, Власите, Србите, Бошњаците, Ромите, Египќаните, македонските политички партии сите се добредојдени. Секој оној којшто има чесна намера и секој оној којшто мисли дека оваа власт ја води Македонија во пропаст е добредојден“, нагласи Мицкоски.

Тој истакна дека ВМРО-ДПМНЕ има принципиелен став дека препораките на ОБСЕ/ОДИХР треба да бидат дел од Изборниот законик и тука, како што рече, не постои дилема.

„Што се однесува до процентот утврден во предлог-изборниот законик, а кој го регулира бројот на потписи за независни листи, кои треба да се соберат изнесува 2 проценти според предлогот“, изјави Мицкоски, во однос на бројот на потписи за независни листи.

„Но, ние изразуваме целосно разбирање со помалите партии. И за ВМРО-ДПМНЕ е прифатливо она решение кое власта заедно со нивните коалициски партнери ќе го договори“, рече лидерот на ВМРО-ДПМНЕ.