Македонија
Мицкоски: Во периодот кој што следи очекувам зголемување на економската соработка и трговска размена со Хрватска

Премиерот Христијан Мицкоски рече дека очекува во следниот период Македонија и Хрватска да ги надградуваат братските односи, особено во делот на трговската размена.
„Најпрвин голем поздрав до нашите гледачи, до Македонија, до македонските граѓани од овде од Загреб. Денеска е втор ден од мојата прва билатерална посета, прва билатерална посета веднаш овде во Загреб. Можам да кажам дека пречекот од страна на домаќините беше исклучително на високо ниво, повеќе од пријателски би рекол и двете држави имаат исклучително добри, пријателски, би рекол братски односи. Во периодот којшто следи истите и ќе ги надградуваме уште повеќе и уште повеќе, мислам дека има простор да се надградуваат, посебно во делот на трговската размена којашто е сега некаде над 300 милиони долари годишно, ценам дека може да биде барем најмалку двапати поголема.
Тоа го кажав и на прес конференцијата зошто македонските и хрватските компании заеднички да не настапуваат на трети пазари и тоа е мислам добра можност и на тој начин ќе имаме уште поголемо поврзување помеѓу двете држави.
Исклучително ја ценам поддршката којашто Хрватска, хрватската Влада, но и претседателот на Хрватска ја даваат на Македонија и македонските граѓани и силно ја поздравувам онаа порака којашто двајцата државници и Андреј Пленковиќ и претседателот Милановиќ упатија, а тоа е дека македонските граѓани направија премногу, како ниту едни граѓани во Европа, во името на реализирање на нашата втора стратешка цел а тоа е полноправно членство во рамките на ЕУ дека на тој пат досега направивме премногу отстапки и дека сега е конечно време сето тоа да се забрза сето тоа да се динамизира за да можеме да не бидеме жртви на непринципиелни барања и препреки, коишто изминативе скоро две и пол децении откако беше потпишан оној Договор за стабилизација и асоцијација ни се случуваа“, посочи Мицкоски и додаде:
„Кога еднашка исклучокот станува пракса тогаш тоа е проблем и за самата ЕУ. Јас очекувам да сите наши пријатели во рамките на ЕУ конечно разговараат со сите оние коишто поставуваат непринципиелни препреки да можеме да го отпочнеме процесот на преговори, тогаш веќе зависи од нас и нашите капацитети, колку сме ние подготвени за да одговориме позитивно на тие предизвици и да го забрзаме или забавивме тој преговарачки процес до полноправно членство во рамките на ЕУ.
Се на се да сумирам, исклучително пријателска посета, благодарност до домаќините, до мојот драг пријател, примерот на Хрватска Андреј Пленковиќ на исклучително високото гостопримство од претседателот на хрватскиот Сабор, од хрватскиот претседател и навистина вчера и денеска овде во Загреб се чувствуваме како дома“, рече Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сообраќајот низ државата се одвива непречено, по влажни коловози

Сообраќајот на државните патишта се одвива непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Отворени избирачките места, право на глас имаат 1,83 милиони граѓани

Во 7 часот денеска започна гласањето на осмите Локални избори од осамостојувањето на државата.
На Локалните избори 2025 во Северна Македонија право на глас имаат 1.832.415 граѓани.
Меѓу вкупниот број државјани со право на глас се и 112 илјади запишани во посебниот Избирачки список со лица во странство, како и 2.162 лица во затвор односно притвор и 450 гласачи од домовите за стари лица.
Локалните избори се одржуваат во сите 80 општини во државата и во Град Скопје.
Се гласа на 3.474 избирачки места.
На Локалните избори 2025 има вкупно 309 кандидати за градоначалници и 576 листи за членови на општинските совети со вкупно 10 490 кандидати.
Македонија
Попладнево во Кочани се одржа 27. „Марш за ангелите“

Попладнево во Кочани се одржа 27. „Марш за ангелите“ по дождливо време и според вообичаената маршрута, но без давање официјална изјава од нив, што досега беше начин на комуникацијата на родителите на починатите со јавноста.
Преку испишаните пораки на транспарентите, тие и денеска за трагедијата во „Пулс“ ги обвинија институциите, од кои бараат правда и праведно судење. Десетина минути беше блокиран сообраќајот на улицата „Стево Теодосиевски“, кај двојниот мост на Кочанска Река.
Маршот за нивните ангели родителите го почнаа од „Паркот на Револуцијата“, од каде се упатија кон Трговскиот центар. Марширањето продолжи кон Основниот суд со кратки запирања пред зградата на УЈП и Полициската станица.
27. „Марш за ангелите“ во Кочани денеска заврши каде и што почна – во „Паркот на Револуцијата“.