Македонија
Мицкоски ги алармира и амбасадите: Законите за автопатите се пристигнати со европско знаменце

Лидерот на опозициската ВМРО-ДПМНЕ, Христијан Мицкоски, тврди дека во Собранието веќе се доставени измените на законите за автопатите со европско знаменце. Тој го оспори ваквиот пристап и ги повика амбасадите да реагираат.
„Веќе законите се пристигнати во парламент со европско знаменце. Јас ова нема да го коментирам, ќе оставам од канцеларијата на Европската комисија тоа да биде коментирано. Ако не се случи, ќе отвориме јавна дебата по тоа прашање. Верзиите што ги видовме, во делот пет, кој се користи за објаснување со кој дел од европската регулатива се усогласува овој закон, замислете, во овие предлози е празен. Нема, не стои таму во што се усогласува. Ако до пред неколку минути имаа намера, сега сакам да ве информирам дека добивме информација дека законите се пристигнати со европско знаменце во парламентот. Ги повикувам амбасадите на земјите од ЕУ да се произнесат за ова што денеска го направи Владата на ДУИ и СДСМ“, вели Мицкоски.
Владата усвои измени на пет закони поврзани со изградбата на автопатите на коридорите 8 и 10 д и ги достави до Собранието со европско знаменце. Целта им била да не бидат блокирани од опозицијата. Од Делегацијата на Европската Унија во државава се изјаснија дека тоа не е во согласност со европските стандарди и најавија дека ќе бараат дополнително објаснување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Забрана за камиони на патниот правец Охрид-Битола, кај превој Буково

АМСМ информира дека од 17 часот има забрана за управување со тешки моторни возила на патен правец Охрид-Битола кај превој Буково.
Од 16:20 часот поради врнежи од снег се воведува забрана за сообраќај за тешки товарни возила на патниот правец Битола – Ресен преку планинскиот превој Ѓавато.
Од 15:25 часот поради врнежи од снег е воведена забрана за сообраќај за тешки товарни возила на патниот правец Гостивар – Кичево преку планинскиот премин Стража и на патниот правец крак Маврово – Дебар.
Македонија
ЦУК: Планинар од Скопје поради лошите временски услови изгубил ориентација на Кожуф, за брзо е пронајден

Ефикасно и брзо е пронајдено залутано лице кај Мрежичко на Кожуф, информираат од Центарот за управување со кризи.
Во 13:15 часот денеска на бројот за итни случаи 112 во ЦУК, добиена била пријава за залутано лице на планината Кожуф, во близина на селото Мрежичко.
„Лицето било планинар од Скопје, кое претходната ноќ ја преспало во планината. Поради лошите временски услови и наросувањето од снег, загубило ориентација и решило да побара помош од службите“, велат од ЦУК.
Надлежните веднаш биле информирани.
„Од страна на Центарот за управување со кризи беа известени СВР Велес, ОВР Кавадарци, Гранична Полиција „ЈУГ“ Итна Служба, како и Општина Кавадарци и градоначалникот на Кавадарци, Митко Јанчев. Во 14.00 часот, лице од општината во Кавадарци кое го познавало теренот, стапило во контакт со залутаното лице и по кратко време го пронашол и со теренско возило го однел до безбедна куќарка во близината каде што бил згрижен, Потоа од страна на граничната полиција “ЈУГ“ лицето е транспортирано до градот“, стои во известувањето.
Македонија
Поради врнежи од снег се воведува забрана за сообраќај за тешки товарни возила на патниот правец Битола – Ресен преку планинскиот превој Ѓавато

Од 16:20 часот поради врнежи од снег се воведува забрана за сообраќај за тешки товарни возила на патниот правец Битола – Ресен преку планинскиот превој Ѓавато, информира АМСМ.
Претходно, беше воведена и забрана за сообраќај за тешки товарни возила на патниот правец Гостивар – Кичево преку планинскиот премин Стража.
Како што соопшти АМСМ, забраната важи и за патниот правец крак Маврово – Дебар и е воведена од 15.25 часот.