Здравјето на граѓаните ни е пред сè и затоа едногласно донесовме одлука дека треба да се одложат предвремените избори, рече лидерот на ВМРО-ДПМНЕ, Христијан Мицкоски, по лидерската средба.

„Дилема беше првата основа како да се реализра, она што беше став на ВМРО-ДПМНЕ е да се почитуваат Уставот и законите, имаше предлог да се свика Собранието и според некои други поранешни искуства да донесе одлука, но не постои правна основа за повторно свикување на Собранието. Нашиот став е дека е потребно по лидерската средба, да се формира експертски тим, кој ќе понуди правна основа за одложување на предвремените избори“, истакна Мицкоски.

Она што ВМРО-ДПМНЕ го побара, рече Мицкоски, се разликува – дали да имаме кризна или вонредна состојба.

„Уставот предивдува вонредна, но не и кризна состојба, но вонредна состојба не е регулирана со законот и не се знае кои би биле чекорите. Од друга страна, постои Закон за кризите, кога се формира кризен штаб. Можеби треба експертите што подоцна ќе разговараат да донесат решение, може требада се прогласи кризна состојба на целата територија, а потоа вонредна состојба“, објасни тој.

„Остануваме на ставовите дека приоритет е здравјето на граѓаните, предупредувавме за сериозноста, еве сега да предупредам за мониторирање на она што ни се случува во државата, да не се случува во 13.30 часот да се каже дека нема нови случаи за потоа во 22 часот да се каже дека имаме пет нови случаи“, додаде лидерот на ВМРО-ДПМНЕ.