Македонија
Мицкоски: Заев не треба да се подготвува за предвремени избори, туку за трајна политичка пензија

Лидерот на опозицијата, Христијан Мицкоски, им се заблагодари на граѓаните за резултатот од референдумот. Тој рече дека и покрај заканите, Владата не успеала да го спроведе договорот со Грција, а за малтретирањата – ќе одговараат. Заев не треба да се подготвува за предвремени избори, вели Мицкоски, туку за трајна политичка пензија.
„Бројките јасно го образложуваат расположението на граѓаните. Ова не беше битка за предвремени избори. ВМРО-ДПМНЕ продолжува со активностите за изнаоѓање решенија за проблемите на граѓаните“, рече Мицкоски запрашан дали ќе опозицијата ќе бара предвремени избори.
Претседателот на опозицијата порача дека партијата останува со народот и ќе ја победи власта, а таа си го изгубила идентитетот. Пораката од народот треба да ја почитуваат Владата, Собранието и сите други, рече лидерот на опозицијата.
„Тоа што не успеа овој договор е вина на Заев и Владата. Заев ја лажеше меѓународната заедница. Договорот со Грција доби стоп од народот. Народот на Македонија, кој е сопственик на оваа држава, покажа патриотска свест. Граѓаните што гласаа против договорот и оние што избраа со молчење да кажат што мислат, ја испратија најголемата порака, ова е Македонија“, рече лидерот на опозицијата, Христијан Мицкоски.
Тој додаде дека овде живеат Македонци, идентитетот е македонски, предците се Македонци и такви ќе бидат наредните генерации.
„Ќе одговарате за наполнетите кутии во Сарај, Струга, Бутел, каде што се обидовте да ја фалсификувате волјата на народот. Ќе дојде часот кога ќе треба да објасните како приватните броеви на граѓаните се најдоа во рацете на кол-центрите на СДСМ. Ќе одговарате што локални шерифи на СДСМ, директори и функционери на СДСМ, ги малтретираа граѓаните да излезат да гласаат“ , рече тој.
Додаде дека резултатот не е само поради договорот со Грција, туку и поради низата скандали што ја тресеа Владата изминативе месеци.
„Два месеца ширевте невистини, два месеца книжевте нарачани анкети. Колектива хипноза за народот. Велевте дека сте се договориле со мене, па дека ќе ме исфреле од белата палата итн. Еве, стојам и ви кажувам. Македонија ќе победи“, рече Мицкоски.
Македонскиот народ покажа мудрост и не дозволи да биде заведен, вели Мицкоски, кој додаде дека таа волја ВМРО-ДПМНЕ ќе ја следи. За членството во ЕУ и НАТО, тој рече дека тоа се стратешки приоритети, ама народот има други приоритети, како што е името на оваа држава.
„Името ни е големо, велеше Блаже Коневски. Македонија денес соопшти дека договорот не поминува. Имаме длабоко неуспешен референдум. Политиката на Зоран Заев и Владата доживеаја дебакл. Бројот на граѓани што не гласаа или гласаа против договорот е драстично поголем од оние граѓани што гласаа за договорот“, рече Христијан Мицкоски.
Лидерот на опозицијата рече дека изразот на Заев покажува дека му пропаднале тендерите и му пропаднала кариерата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова во Њујорк: Време е кормилото на ОН да му го довериме на жена

Во рамки на учеството на 80. Генерално собрание на Обединетите нации во Њујорк, претседателката Гордана Сиљановска-Давкова се обрати на состанок на високо ниво по повод 30-годишнината од Четвртата светска конференција за жените.
Во своето обраќање, Сиљановска-Давкова истакна дека иако Пекиншката декларација останува темел на борбата за родова еднаквост, напредокот е нееднаков, кревок и често реверзибилен.
„Насилството врз жените останува неказнето, фемицидот ја осквернува светоста на животот, а жените сè уште се соочуваат со бариери во пристапот до ресурси, лидерство и одлучување,“ рече таа.
Претседателката посочи и на кризата во Обединетите нации, институција основана за заштита на мирот, а денес исправена пред бројни конфликти низ светот. Таа апелираше на храбро лидерство од жени, велејќи:„Ако сме сериозни во врска со мирот, време е да го довериме кормилото на ОН на жена.“
Во нејзиниот говор таа подвлече дека родовата еднаквост не е феминистичка привилегија, туку хуманистички императив, потенцирајќи дека жените се носители на исцелување, сочувство и надеж.
Учесниците на состанокот ја потврдија потребата од посветеност, конкретни политики и ресурси за реализација на визијата од Пекинг и за создавање праведни и просперитетни општества.
Пекиншката декларација, како што потсети Сиљановска-Давкова, повикува на еднакви права и пристап за сите – жени и мажи, девојчиња и момчиња – и тој повик, рече таа, останува ургентен и денес.
Македонија
ДИК со податоци: Пет отфрлени листи за градоначалници

Според податоците добиени од Државната изборна комисија, за претстојните локални избори се потврдени вкупно 861 кандидатска листа – 303 за градоначалници и 558 за членови на советите на општините и на Град Скопје.
Во тек е постапка за отстранување на неправилности кај дел од листите во општините Куманово, Аеродром, Карпош и во Град Скопје.
Според податоците, 8 листи за градоначалници и 20 советнички листи се во постапка на дополнување и корекција по добиени забелешки од општинските изборни комисии.
Досега, се отфрлени 5 листи за градоначалници, по една во општините Бутел, Центар, Куманово, Аеродром и Град Скопје.
По завршувањето на процесот на потврдување, ќе следува ждрепка за утврдување на редоследот на кандидатите на гласачкото ливче. Ждрепката ќе се одржи на 25 септември 2025 година.
Македонија
Градоначалниците од Западен Балкан ја основаа алијансата Green mayors во Драч

Градоначалниците од 19 општини од Западен Балкан потпишаа заедничка декларација со која ја формираа Алијансата на „зелени“ градоначалници – регионална платформа за забрзување на зелената транзиција преку општинско лидерство и прекугранична соработка.
Потпишувањето се одржа во рамки на Форумот на „зелени“ градоначалници во Драч, организиран од OSF–WB (Фондација Отворено Општество – Западен Балкан). Настанот собра над 100 учесници – градоначалници, претставници на училишта, граѓански организации и експерти за енергетика.
Градоначалникот на Битола, Тони Коњановски, на панел-дискусијата истакна:
„Проектот ‘Сончеви училишта’ и слични иницијативи покажуваат како промените можат да започнат на локално ниво. Општината работи на повеќе зелени решенија, како воведување електричен јавен превоз и изолација на стари згради. Нашата цел е да ги подготвиме граѓаните за праведна и одржлива иднина.“
На конференцијата беше посочено дека Битола е меѓу водечките општини во регионот според бројот и квалитетот на реализирани проекти за енергетска ефикасност и зелени решенија.