Македонија
Мицкоски за можно помирување со СДСМ: Не забораваме, за криминалците во политиката помирување ќе има само кога ќе се соочат со одговорност

Претседателот на ВМРО-ДПМНЕ, Христијан Мицкоски, коментирајќи ги анкетите што излегоа во јавноста и одговарајќи на прашањето дали е можно помирување со СДСМ, истакна дека анкетите се јасни, а СДСМ, како што рече, наместо кукавички да бегаат, да излезат на избори и да се соочат со народот бидејќи тоа е најголемата анкета.
„Јасни се мерењата на јавното мислење дека ВМРО-ДПМНЕ има повеќе од два пати предност во однос на СДСМ. Историски најголема до сега тоа не се случило да опозициска партија има толкава разлика во однос на владејачка парија претпоставувам дел си има влијание и тоа што тие така измеќарски и поданички се однесуваат во однос на Демократската унија за интеграција па народот не гледа таму перспектива ниту пак визија. Јасна е разликата во квалитет, јасна е разликата во понуда и во испорака, е сега тоа што кај СДСМ предизвикува паника, па во паника креираат штапски анкети и има некои медиуми кои што тие штапски анкети блиски до СДСМ и ДУИ ги лиферуваат тоа е веќе нивен проблем. Јас често пати зборувам јавно, јасно и гласно дека наместо кукавички да бегаат, најголемата анкета е соочувањето со народот“, рече Мицкоски.
Можеби, како што рече, тие објективни јавни мерења не се точни „можеби тоа што тие го креираат штапски е точно, има еден начин да покажеме какви се вистинските бројки а вистинските бројки се кажуваат на избори“.
„Повторно ќе ги повикам кукавиците од СДСМ да се соочат јавноста да не се кријат и да излезат и од таа анкета нема бегање. Дали ние како ВМРО-ДПМНЕ или тие како СДСМ ќе го дознаат вистинскиот резултат и вистинските бројки. Што се однесува до помирувањето ние немаме проблем со никого да седнеме да разговараме. ВМРО-ДПМНЕ е демохристијанска партија подава рака секому, ние помниме, не забораваме но простуваме, но за криминалците во политиката помирување ќе има тогаш кога најпрвин ќе се соочат со одговорност за криминалот и за сето тоа што го направија на овој народ и на Македонија како држава. Дури кога ќе се соочат со таа одговорност може да седнеме и да разговараме за било какви понатамошни помирувања, до тогаш тоа е само желба на тие политички криминалци, кои што на грбот на овој народ станаа од под просечни бизнисмени, просечни бизнисмени па и милионери“, нагласи Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ѓорѓиевски : Љубљана ќе биде град-партнер за развојот на Скопје

Остваривме извонредна и пријателска средба со долгогодишниот градоначалник на Љубљана, господинот Зоран Јанковиќ, објави актуелниот градоначалник на Општина Кисела Вода и кандидат за градоначалник на Скопје, Орце Ѓорѓиевски.
Средбата, додава тој, поминала во пријателска атмосфера, при што биле разменети значајни искуства и визии за идната соработка помеѓу Скопје и Љубљана.
„Добив драгоцени совети и поддршка од градоначалникот Јанковиќ, со јасна определба Љубљана да биде град-партнер и вистински пример за развојот и модернизацијата на Скопје.
Посебен акцент ставивме на најголемите предизвици со кои се соочува нашиот град – јавниот превоз и чистотата.
Градоначалникот Јанковиќ ни даде ветување дека експертски тимови од Љубљана ќе бидат континуирана поддршка за Скопје, но не само во овие сфери, туку и во секоја област во која ќе побараме помош.
Договоривме интензивна соработка и зајакнување на капацитетите на градот Скопје во насока на креирање, планирање и спроведување европски проекти.
Верувам дека преку ова партнерство ќе изградиме поефикасен и поевропски град Скопје, достоен за своите граѓани.
Со задоволство го потврдивме статусот на побратимени градови и во таа насока упатив срдечна покана до господинот Јанковиќ за негова официјална посета на Скопје, град кој сака да учи од најдобрите“, вели Ѓорѓиевски.
Македонија
Божиновска: Секој рудар мора да се врати дома безбеден и горд, инспекциите се засилени, а казните построги од кога било

Министерката за енергетика, рударство и минерални суровини Сања Божиновска денеска по повод Денот на рударите присуствуваше на свечената манифестација во РЕК Битола, заедно со претседателот на Владата, Христијан Мицкоски, и раководството на АД ЕСМ. Настанот беше можност да се оддаде почит кон рударите и да се нагласи нивното значење за економијата на државата.
Во своето обраќање, Божиновска истакна дека рударите се економски столб кои секојдневно се соочуваат со предизвици за да обезбедат стабилност и иднина за државата.
„Секојдневна битка со длабочината и темнината за ресурси кои ја движат економијата. Наша цел е секој рудар да се враќа дома безбеден и горд. Министерството стои цврсто зад секој рудар – со современа опрема, безбедни услови за работа и фер стандарди за сите,“ порача министерката.
Таа испрати и јасна порака кон компаниите што работат во секторот:
„За оние што вложуваат во безбедноста на рударите и заштитата на животната средина, поддршката е целосна. Но за оние што мислат дека можат да ја заобиколат законската регулатива – нема компромиси. Инспекциите се засилени, контролите се редовни, а казните построги од кога било. Законот важи за сите – без исклучок“, нагласи Божиновска.
Македонија
Шаќири: Албанците во Македонија се одлучувачки и државотворен фактор

Албанците во Северна Македонија се одлучувачки и државотворен фактор, и затоа оваа улога мора да се гарантира и почитува во секоја институција и на секое ниво на одлучување, велат од Алијанса за Албанците.
„Нашата политичка платформа се раководи од три основни принципи: Традиција, Одговорност и Развој. Овие принципи се столбовите врз кои го градиме нашиот визион за функционална, ефикасна и правична држава, каде Албанците и Македонците заедно ја градат подобрата иднина.
Убедени сме дека дојде време за нов политички договор меѓу Македонците и Албанците, кој ќе се темели врз реална еднаквост, заемна почит и стратешко партнерство. Само така може да се изгради стабилно општество и модерна, европска држава еднаква за сите“.
Алијанса за Албанците, како што нагласи Њомза Шаќири, портпарол на партијата, е политичка сила, позиционирана десно од центарот, која го брани албанскиот идентитет, јазикот и националните традиции, промовирајќи како што велат, истовремено индивидуална слобода, приватна сопственост, пазарна економија и одржлив развој.
„Наш приоритет е локалниот економски развој и зајакнување на општините преку реална децентрализација. Поддршката за младите, семејствата и локалните бизниси е во центарот на нашето политичко ангажирање, бидејќи само така се гарантира еднаков развој и долгорочна стабилност.
Ќе се залагаме за активна вклученост на граѓаните во одлучувањето и за тесна соработка со албанската дијаспора, која останува драгоцено национално и економско богатство“.
Според неа, Алијанса за Албанците, е решена да биде гласот на вистинската еднаквост и гарант на албанскиот национален интерес.
„Со нашата платформа и со нов договор меѓу Македонците и Албанците, ја отвораме патеката кон еднаква, функционална и европска држава“.