Македонија
(Видео) Мицкоски: Зоран Заев продал државно земјиште кое завршило во рацете на Вице Заев
Зоран Заев во својство на градоначалник на Струмица продал државно земјиште кое завршило во рацете на Вице Заев, обвини во видеообраќање лидерот на ВМРО-ДПМНЕ, Христијан Мицкоски.
Тој тврди дека пред четири години било одржано јавно наддавање за отуѓување на градежно земјиште во Струмица, каде се јавил само еден понудувач – лицето Сашко Брндевски, од Струмица, бизнис-партнер во една од компаниите на братот на премиерот Зоран Заев, Вице Заев.
„На лицитацијата постигната е цена од 2300 денари за метар квадратен, а парцелата со намена за изградба на објект за колективно домување е со вкупна површина од 18462 метар квадратен.
Пред издавање одобрение за градење Општина Струмица, во тоа време, ќе повторам, водена од Зоран Заев, одобрува на продадената локација да се градат осум нови седумкатници со вкупна бруто изградена површина од 52850 м2.
Во февруари 2016 година Зоран Заев на Сашко Брндевски му издава одобрение за градење станбена зграда бр. 8. Во истиот месец во 2016 година лицето Сашко Брндевски склучува договор за пренесување право на градење на предметната парцела со правните лица ‘Тотал инженеринг’ – сопственост на Вице Заев и АД ‘Пелагонија Струмица’, во чиј управен одбор во тоа време пак е братучедот на Заев, Трајче Заев“, рече Мицкоски.
Претседателот на ВМРО-ДПМНЕ тврди дека како надоместок за тоа што им отстапил право на градење, лицето Сашко Брндевски добило стан од 40 квадратни метри.
„Потписници на овој документ се Вице Заев, Сашко Брндевски и управителот на АД „Пелагонија’, Јанев, каде член на управен одбор во тоа време е братучедот на Зоран Заев, Трајче Заев. Ова отвора сомнеж дека бизнис-партнерот на Заеви е само параванот, а потоа јасно се гледа дека зградите се градат токму од компанијата на братот на премиерот Зоран, Заев, Вице Заев. Во месец март 2016 година Зоран Заев носи решение за промена на инвеститор, каде што наместо Сашко Брндевски, нови инвеститори на станбената зграда се двете наведени фирми. Така што ова е документ каде јасно се гледа дека Зоран Заев, сега премиер, тогаш градоначалник на општина Струмица, се потпишува на решението каде стои фирмата на неговиот брат Вице Заев и фирмата каде неговиот прв братучед е член на управен одбор“, обвини Мицкоски.
Тој упати апел до јавното обвинителство да испита дали се работи за постапка каде што однапред се знае добитникот на парцелата, под кои услови е отстапено правото на градење, како и да се испита потеклото на парите на Брндевски, околу 700 илјади евра, кои се уплатени на сметката на Општината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).