Македонија
Мицкоски од Гостивар: ДУИ ги злоупотребува Албанците, врз митот за права, направија милиони, ќе одат во опозиција и ќе одговараат за криминалот

Македонија се наоѓа пред сериозна одлука а изборите кои следат во себе не го носат изборот која партија ќе победи, туку каква иднина ќе се одбере, за себе и за своите семејства. Главниот проблем, е што државата е одземена од рацете на народот. Контролата е во стотина души кои управуваат со се во земјава, без одговорност, со многу криминал и корупција, изјави претседателот на ВМРО-ДПМНЕ, Христијан Мицкоски од митингот во Гостивар.
Мицкоски додаде дека нема поголем тендер од кој артановци, бујаровци, и зечевци не собираат процент.
– Тука во Гостивар на пола пат од Тетово се сликаа со лопатите, наместија бини, сечеа ленти за нови автопати дел од коридорите 8 и 10д, еве помина година дена, дупка не ископаа, не па автопат да изградат. Повеќе од 300 милиони евра исплатија во ветар. Таму подизведувач е омилената фирма на ДУИ, бидејќи ДУИ управува со државата наместо народот, потенцираше Мицкоски.
Мицкоски нагласи дека Артан, Бујар и Талат си се послужуваат со Македонија, затоа што имаме слаб СДСМ кој дозволувајќи го тоа скапо си ја купува власта, и деновите поминати во фотелја.
„И овие денови ги слушам оние обвинувања кои се редовен декор секогаш кога ДУИ е нападнато, поради криминал и корупција. Нападното е затоа што се фатени како ја ограбуваат Македонија. И не ги ограбуваат само Македонците. Ги ограбуваат сите, и Македонците и Албанците и Турците и Србите и Власите и Бошњаците, ја ограбуваат Македонија. Фатени во грабеж, обвинуваат дека сме имале против Албанците и затоа сме ги напаѓале“, изјави Мицкоски.
Посочи дека има против ДУИ кои ги злоупотребуваат, меѓу другото и Албанците и нивната мака.
– ДУИ која врз митот права за Албанците, и Артан, и Али направија милиони евра за себе, имаат имот како шеици од Саудиска Арабија, додека албанскиот народ гладува и се сели од Македонија. Најголемата злоупотреба овие дваесет години е состојбата со правата на Албанците кои овие криминалци од ДУИ се обидуваат кога се фатени во криминал да ја наметнат како тема. Секогаш кога тие зборат за ова, на своето конто си редат по уште еден милион народни пари, нагласи Мицкоски.
Оценио дека ДУИ тоа го прават затоа што се исплашени и знаат дека им доаѓа крајот на своето владеење.
– Ќе одат во опозиција, а таму ќе мора најпрвин да одговараат за криминалот, а потоа да се реформираат, рече тој.
Мицкоски нагласи дека бранот е создаден, иако работата не е завршена, мора да се излезе на гласање во вториот круг за да се победат сите сценарија на СДСМ и ДУИ заедно и дека таквите сценарија се победуваат само со голема излезност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Влада: Усвоена информација за склучување на договор за соработка помеѓу Железници инфраструктура и Јавното тело на Министерството за транспорт на Обединетото Кралство

Владата на денешната 114 редовна седница ја разгледа и усвои информацијата за склучување на договор за соработка помеѓу Јавното претпријатие за железничка инфраструктура- Скопје и Јавното тело на Министерството за транспорт на Владата на Обединетото Кралство Кросрејл Интернешнал Лимитед (Crossrail International Limited (CI)).
Со овој Договор за соработка се воспоставува рамка со која страните ја потврдуваат својата подготвеност и посветеност да соработуваат преку споделување на експертиза, искуства, добра практика и научени поуки во поддршката на проектите на ЈП ЖРСМ Инфраструктура- Скопје, со посебен акцент на брзата железница, како и товарен железнички сообраќај, сигнални и контролни системи, надградба на инфраструктурата, депоата и железничкиот возен парк. Договорот за соработка е во важност од 5 години со можност за продолжување од дополнителни пет години. Овој Договор произлегува од досега воспоставената соработка помеѓу македонската Влада и Владата на Обединетото Кралство на Велика Британија и Северна Ирска, во врска со партнерството за реализација на приоритетни инфраструктурни проекти.
Дополнително, Владата на денешната седница ја разгледа информацијата за потребата од субвенционирање на филтри на оџаци на домаќинствата и ја задолжи Канцеларијата на Претседателот на Владата во следниот период да подготви детална анализа која ќе ги предвиди условите, времетраењето и процедурата за објавување на оглас за субвенции на филтри за оџаци на домаќинствата кои користат греење со фосилни горива односно дрва.
Македонија
Николоски: Бележиме раст од 6,1 процент во транспортниот сектор

Бележиме раст од 6,1 % во секторот транспорт, што говори дека оваа индустрија се развива, но исто така говори дека се уште има простор за раст и развој. Преземаме краткорочни и долгорочни мерки што ја олеснуваат вашата работа, но реализираме и големи крупни капитални проекти кои директно влијаат врз развој на транспортниот сектор, се обрати вицепремиерот и министер за транспорт Александар Николоски, на денешниот состанок со транспортерите.
Планот на Владата, како што потенцираше вицепремиерот Николоски е да се искористи позицијата на Македонија како стратешка крстосница во регионот.
“Идејата е да Македонија да го искористи потенцијалот кој што го има како природна раскрсница на два Пан-Европски коридори, Коридорот 10 север-југ и Коридорот 8 исток-запад. Во таа насока развиеме силна патна и железничка мрежа кои што ќе ги опслужува овие два Коридори. Во делот на патната мрежа, на Коридорот 10 за следната година планираме реконструкција на целиот дел од автопатот кој што не е во состојба во каква што јас би сакал да биде, така што поголем дел од автопатот ќе подлежи на реконструкција со цел да биде во одлична состојба. Исто така следната година ќе одиме со реконструкција на обиколницата на Скопје како природна врска на Коридорот 10 и 8, а продолжуваме и со изведба на Коридорот 10-д кој што оди од Градско преку Дреново-Фариш-Прилеп до Битола и вториот граничен премин со Грција до Меџитлија. Во моментот активно се гради автопатот од Прилеп до Битола, веќе го пуштивме во фунција експресниот пат Градско-Дреново-Фариш, а многу скоро ќе донесеме одлука и за изградба на потегот од Фариш до Прилеп, што значи нашата цел е да имаме целосно или автопатско решенеи или експресен пат кој што ќе оди и ка Коридорот 10-д, односно исклучувањето кај Градско до границата со Грција да е покриено со автопат или експресен пат”- истакна вицепремиерот Николоски и додаде:
Во однос на Коридорот 8, го пуштивме во функција потекот од Страцин до Крива Паланка, во моментот работиме обиколница на Крива Паланка, исто така работиме на проширување на граничниот премин Деве Баир, на западната страна работиме на автопат Тетово-Гостивар, понатаму на автопат Гостивар-Букојчани или популарната Стража. За потегот од Букојчани-Кичево завршува повикот за доставување на понуди на 30 септември, значи за неколку дена, а Кичево-Охрид веќе пополека се става во функција после 11 години одлагање. Првите 34 км се ставени во функција, до крајот на следната година целосно ќе го завршиме и паралелно на тоа работиме на проширување и модернизација на граничниот премин Ќафасан”- потенцира вицепремиерот Николоски.
Тој најави дека Министерството активно работи на проектот за изградба на мултимодалниот јазол во Трубарево.
“Работиме на еден голем проект за мултимодуларен јазол кој што треба да се наоѓа во постојниот јазол кај Трубарево и во продолжение до пресекот на двата Коридори, кои што мислам дека за сите компани кои што се занимаваат со логистика е голема шанса за развој на бизнисот. Очекувам првата фаза да ја започнеме следната година, тоа е изведба на инфраструктура од страна на државата, а втората фаза година дена после тоа што ќе значи целосна реализација на проектот и проширување со цел практично да стане пристаниште на суво, односно целата роба што доаѓа од Атина, Солун кога ќе се реализира Коридорот 8-железнички и од таму, да се претоварат и да го земаме приматот кој што сега го имаат некои соседни држави и тука да биде сувото пристаниште за овој дел на Европа”- рече Николоски.
Средбата со транспортерите е во организација на МАКАМ ТРАНС на која се презентираа условите и критериумите за распределба на транаспортните дозволи.
Македонија
Гаши: Не е потребен глас кога срцата зборуваат на ист јазик

Претседателот на Собранието, Африм Гаши, денеска им се обрати на ученици, педагози и родители по повод Меѓународниот ден на знаковниот јазик, нагласувајќи дека овој ден е потсетник за инклузивност и почитување без бариери.
Гаши потсети дека Собранието од 2023 година организира курсеви за знаковен јазик за вработените и пратениците, со цел да се овозможи подобра комуникација и разбирање.
„Ова не е само технички чекор, туку симболичен чин во обидот да се слушнат и оние кои зборуваат поинаку, но имаат исто толку да кажат,“ истакна тој.
Додаде дека еден од неговите најважни приоритети како претседател на Собранието е изградба на отворена и инклузивна институција која ќе биде дом на секој граѓанин.
„Силата на човекот не се мери со зборовите што ги изговара, туку со срцето и духот што ги вложува секој ден,“ рече Гаши, честитајќи им на сите кои придонесуваат за оваа благородна мисија.
Обраќањето го заврши со убедувањето дека „Не е потребен глас кога срцата зборуваат на ист јазик,“ честитајќи им на присутните и на сите граѓани Меѓународен ден на знаковниот јазик.