Македонија
Мицкоски: Платите на наставниците и професорите во согласност со законот мора да бидат 36.700 денари

ВМРО-ДПМНЕ продолжува со рецензија за општеството, кое во изминатите три години е исполнето со примитивизам, декаденција и големи лаги, рече на прес-конференција претседателот на опозициската партија, Христијан Мицкоски, а главна тема во неговото денешно обрќање беше образованието.
„Најголемата политичка лага во делот за образованието, која беше презентирана пред граѓаните во 2016, е дека ќе вовеле задолжително едногодишно предучилишно образование. До овој момент нема никакви промени во системот на предучилишното образование. Понатаму, се обврзале дека ќе ги мотивираат најдобрите училишта. И тоа ќе ги мотивираат вработените во делот на месечните примања од една година, во 12 месеци, односно вработените ќе добивале 20 отсто поголема плата кај најдобрите 5 основни училишта на ниво на целата држава. И 10 отсто средни училишта на ниво на целата држава. Ова не само што не е реализирано, туку вакви средства не се предвидени ниту во буџетот за 2020 година“, нагласи Мицкоски.
Понатаму, тој зборуваше за ветувањето на СДСМ дека ќе издаваат поквалитетни учебници бидејќи, според нив, учебниците што ги затекнале не биле квалитетни.
„Каква е реалноста денеска? Нема никаква повратна информација од државните комисии што ги евоулирале учебниците што ги затекнале во основното образование. Да бидам попрецизен, нема нови учебници. Но, и тие што постојат доцнат со печатење и воопшто ги нема. Што значи дека и ова е уште една од сетот лаги“, порача лидерот на ВМРО-ДПМЕ.
Задржувајќи се на платите во образованието, тој нагласи дека најниската плата во моментот за наставниците е 21.660 денари, а во средното образование 22.500 денари, а просечната плата е на ниво од 25.270 денари.
„За жал, од ветената просечна плата од 500 евра нема ни трага ни глас“, додаде Мицкоски.
Според него, лажењето ќе продолжи и во периодот што следува, сè до организирањето на предвремените парламентарни избори.
„Во моментот просечната плата исплатена заклучно со октомври 2019 година во средното образование е приближно 23.680 денари, со предвиденото 10 отсто зголемување од 1 јануари 2020 година оваа плата ќе биде 26.000 денари. Но, кога не би имале работа со лажливци, тогаш можеби и би верувале дека навистина станува збор за зголемување на платата на наставниците и професорите. Имено, пред мене е колективниот договор што го имаат потпишано Синдикатот и Министерството за образование и наука во 2010 година. Во овој колективен договор јасно во членот 34 и членот 35 се дефинира што значи најниска плата во образованието и како се пресметуваат нето-платите на вработените во образованието вклучително и образовниот кадар, но и техничкиот персонал, кој е дел од образовниот процес“, рече Мицкоски.
Тој посочи дека со зголемувањето на минималната плата, која е во процедура во парламентот, на ниво од 14.500 денари, платата во согласност со Законот за минималната плата и во согласност со колективниот договор на професорите во основното и средното образование треба да биде 36.700 денари, односно 10.700 денари повеќе од тоа што во овој момент е предвидено со зголемувањето од 10 отсто.
„Оваа Влада во заминување ќе замине како најнеспособна, но доаѓа реформска влада, доаѓа обнова за Македонија, која ќе го почитува Законот за минималната плата и ќе го почитува колективниот договор“, истакна претседателот на ВМРО-ДПМНЕ на крајот од своето излагање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Светскиот ден на учителите МОН започнува кампања за истакнување на нивната незаменлива улога во општеството и поголема почит од заедницата

Со старт на кампања за подигнување на јавната свест за суштинската важност на знаењето и незаменливата улога на наставниците во општеството, Министерството за образование и наука го одбележува 5 Октомври – Светскиот ден на учителите. Почетокот на кампањата насловена „Магијата е во знаењето“ беше означен со две тематски панел дискусии посветени на институционалниот пристап кон образованието, статусот на наставниците, нивните предизвици и потреби, како и начинот на кој општеството ги вреднува нивната посветеност и влијание.
Во присуство на 100тина претставници на академската и наставничката заедница, министерката за образование и наука проф. д-р Весна Јаневска, претставничката на УНИЦЕФ во Македонија, Лесли Милер, деканката на Педагошкиот факултет „Св. Климент Охридски“ во Скопје и претседателката на Сојузот на просветни работници на Македонија, Лидија Николовска-Георгиевска испратија порака дека токму наставниците се херои на нашето време. Тие не носат наметки, но секојдневно, со љубов, трпение и посветеност, ја создаваат вистинската магија – ја пренесуваат светлината на знаењето кон младите.
Честитајќи им го празникот празник на сите просветни работници, министерката Јаневска им порача дека се исклучително важни во обликувањето на иднината на нашите деца и на државата и токму затоа институциите заедно со партнерските организации се трудат да го подобрат нивниот општествен и економски статус и да го вратат дигнитетот на наставничката професија.
„Да бидеш наставник не е само обична професија. Наставникот е човекот кому родителите му го доверуваат највредното што го имаат, за да му ја обликува иднината, односно да му пренесе знаења и вештини кои се применливи, во чекор со времето, со науката, технологијата и потребите на пазарот на труд. И токму тука почнува улогата на образовните политики кои треба да обезбедат подготвен, мотивиран наставник, со морален и интелектуален авторитет, кој ќе успее да ја стекне довербата на учениците, да ги интригира и да им овозможи да го реализираат полниот потенцијал“, рече Јаневска.
Посочи дека Владата ќе продолжи посветено да ја поддржува наставничката заедница и да отвора нови можности за нивен, но и за развој и напредок на македонскиот образовен систем.
„Ќе потсетам дека во изминатите 15 месеци, платите на наставниците во училиштата пораснаа за 12%, на универзитетските професори за 14%, овозможивме кариерен напредок во звања советник и ментор и на наставниците и на стручните соработници. Спроведовме бројни обуки за професионална надградба и значително ги подобривме условите за работа со вложени над 67 милиони евра во унапредување на образовната инфраструктура“, потенцираше министерката, додавајќи дека ова се политики кои носат просперитет и подобри времиња за наставниците во Македонија и ќе продолжат да се имплементираат и надградуваат.
Во рамки на првиот настан од кампањата „Магијата е во знаењето“, Министерството за образование и наука и Сојузот на просветните работници на Македонија ги доделија и признанијата „Просветен работник на годината“ за учебната 2024/2025 година, кои, како што беше истакнато, претставуваат чин на јавно признание, но и симбол на поширока заложба за градење општество кое активно ја поддржува и вреднува улогата на воспитувачите, наставниците и стручните соработници.
Признанијата ги добија Елеонора Костоска Јованоска – воспитувач во ЈОУДГ „Наша Иднина“ во Прилеп, Фросина Ангелова – педагог во ЈОУДГ „Мајски цвет“ во Скопје, Сузана Ќелешоска – наставник по одделенска настава во ОУ „Мурат Лабуништи“ с. Лабуништа во Струга; Наташа Тодоровска – наставник по одделенска настава во ОУ „Ѓорѓи Сугарев“ во Битола, Маја Митевска Поцева – наставник по одделенска настава во ОУ „Браќа Миладиновци“ во Пробиштип, Павлинка Вељаноска – наставник по музичко образование во ОУ „Гоце Делчев“ во Неготино, Милица Патраклиева – наставник по географија во ОУ„Лазо Трповски“ во Скопје. Аница Б. Златевска – психолог во ОУ „Коле Канински“ во Битола и Јасмина Денковска – наставник по информатика во СОУ Гимназија „Гоце Делчев“ во Куманово.
Освен пораките што преку медиумите и социјалните мрежи ќе се споделуваат за важноста на наставниците и на знаењето кое го пренесуваат, во рамки на кампањата ќе се реализираат и повеќе стручни собири, панел дискусии и работилници низ кои МОН ќе допре до секој ученик, родител и наставник, а сите заедно ќе го вратиме сјајот и достоинството на најважната професија.
Македонија
(Видео) Цаневска: Кога вложуваме во училиштата, вложуваме во иднината на Скопје

На Денот на просветните работници, носителката на советничката листа за Град Скопје, Катерина Цаневска, порача дека образованието е темелот врз кој се гради напреден град и дека иднината на Скопје се создава преку училиштата, наставниците и младите луѓе.
„Денес не сме тука само да им честитаме на наставниците, туку и да зборуваме за она што е суштината на секое напредно општество – образованието. Скопје ја гради својата иднина преку училиштата, преку наставниците и преку младите кои секојдневно учат и создаваат“, изјави Цаневска.
Во рамки на програмата „Образование и можности“, Цаневска најави повеќе проекти кои го ставаат образованието во центарот на развојот на градот. Еден од клучните приоритети е изградбата на нова гимназија во Општина Аеродром, општина со над 80.000 жители, која засега нема ниту едно средно училиште од тој тип.
„Новата гимназија ќе биде современо, енергетски ефикасно и пристапно училиште, со спортска сала, социјални простори и услови за вистинско образование од 21. век“, рече Цаневска, додавајќи дека тоа ќе биде инвестиција која ќе го поддржи растот на младата популација во овој дел од градот.
Во првата фаза од програмата „Образование и можности“, фокусот ќе биде ставен на:
• реновирање и опремување на постојната училишна инфраструктура,
• модернизација на наставните методи,
• воведување нови наставни содржини,
• поддршка на неформалното образование преку ревитализација на Планетариумот во Младинскиот културен центар.
Цаневска најави и зголемување на поддршката за младинските иницијативи за 300%, потенцирајќи дека младите не се само иднината, туку и сегашноста на градот.
„Во следната етапа ќе воспоставиме мрежа на младински центри во сите општини на Скопје, каде што младите ќе можат да се развиваат, поврзуваат и креираат заеднички проекти. Ќе развиваме партнерства меѓу училиштата и локалниот бизнис сектор, за наставата да се поврзе со реалниот живот преку менторски програми, практична обука и кариерно насочување“, објасни таа.
Во долгорочната рамка на програмата, визијата предвидува дигитална трансформација на наставата, изградба на нови училишта во брзорастечки населби и создавање на програмата „Млад граѓанин“, преку која младите ќе имаат активно учество во процесите на одлучување и креирање на градските политики.
„Кога вложуваме во училиштата, вложуваме во поконкурентна економија, во повисок квалитет на живот, во култура и во заедница што дише подобро и живее подобро“, истакна Цаневска.
Таа додаде дека 5 октомври е ден кога треба да им се оддаде признание на наставниците – „срцето на градот“ – но и ден кога сите треба да се обврзат дека ќе продолжат да создаваат град кој го вреднува нивниот труд и обезбедува еднакви можности за секое дете, без разлика каде живее.
„Скопје што вложува во своите училишта и ученици – вложува во сопствената иднина“, заврши Цаневска.
Македонија
Герасимовски: Поставуваме пристапни рампи во секој новоизграден објект, се грижиме за сите граѓани

Кандидатот за градоначалник на Општина Центар од редовите на СДСМ Горан Герасимовски, синоќа беше со жителите на Кале кадешто дискустираа за проектите што треба да се реализираат во новиот мандат. Граѓаните кои живеат на Кале му се заблагодарија на Герасимовски за поставувањето на ново игралиште кадешто децата и младите од оваа населба рекреираат и спортуваат.
Герасимовски, информираше дека за четири години инвестирани се над 13 милиони евра во Центар за подобрување на условите во градинките, во училиштата, за реконструкција на улици, за вложување во младите, за реконструкција на повеќе од 24 улици.
Тој, најави нови мерки со кои продолжува прогресот на општината.
„Еден од главните приоритети во новата програмата е изградба на нова градинка во близина на Клиничкиот центар, кадешто обезбедуваме простор за вработување на околу 25 воспитувачи. Планираме и набавка на две цистерни и пет метларки за да го подигнеме капацитетот на хигиена во сите општини. Во план е поставување на пристапна рампа за лицата со попречености во секој новоизграден објект, со ова покажуваме грижа кон сите граѓани. Како една од новините, исто така е и обезбедувањето на бесплатен училишен оброк за учениците во целодневна настава“, рече Герасимовски.