Македонија
Мицкоски: Резолуцијата да биде прифатена од сите партии без изговори и условувања
Резолуцијата да биде прифатена од сите политички партии, без условувања, барање изговори, вели претседателот на ВМРО-ДПМНЕ, Христијан Мицкоски, одговарајќи на новинарско прашање пред денешниот настан „Промоции на политики – Македонија за сите луѓе“ во Карпош, во врска со резолуцијата што ја поднесе ВМРО-ДПМНЕ, а која треба да се најде во Собрание на дневен ред.
Мицкоски вели дека прифаќањето на резолуцијата од сите политички партии ќе значи единство кое ни е потребно за почеток на преговорите со Европската Унија, но пред сè ќе се зацврстат државните позиции на Македонија.
„Колку што имам информација резолуцијата ќе биде ставена на дневен ред во текот на утрешниот ден. Очекувам поддршка од сите политички партии во Парламентот, без условувања и без демагогии, без изговори, очекувам да се надминеме себеси и да покажеме единство коешто мислам дека во периодот кој следи ќе ни биде многу значајно во процесот на отпочнување преговори со ЕУ и тоа само ќе ги зајакне на позициите на Македонија како држава“, потенцираше Мицкоски.
Во однос на датумот за одржување на локалните избори истакна дека треба да се прекине со праксата да се крши уставот бидејќи датумот за локалните избори го дефинира Уставот.
„Околу датумот на избори тоа не е тема за којашто ние ќе зборуваме на зелен пазар, тоа е тема што ја дефинира Уставот и навистина треба да прекинеме со праксата да го кршиме уставот, како дефинира Уставот така ние треба да се однесуваме и тоа што го дефинира Уставот тоа треба и да го примениме. Ако Уставот вели дека мандатот на градоначалниците и советите е четири години, тогаш по четири години ние треба да го имаме првиот круг избор на градоначалници и советници. Така што ова не треба да биде тема за дневна политика, јасен е Уставот, го повикувам претседателот на Собранието Талат Џафери практично да ги распише изборите, онака како што се според Уставот дефинирани“, нагласи Мицкоски.
Тој беше прашан за став по однос на новиот изборен модел за претстојните локални избори при што е предвидено да има отворени листи за избор на општинските советници. Во таа насока, Мицкоски истакна дека овој предлог е предложен и е осмислен како да изгледа и како да се примени, токму од страна на ВМРО-ДПМНЕ, а не како што денеска тоа го презентираше Зоран Заев изразувајќи задоволство дека за ваков изборен модел се согласи ВМРО-ДПМНЕ.
Мицкоски посочи дека кога веќе Заев нема храброст тоа да го признае пред јавноста барем пред себеси да ја признае вистината околу концептот за отворените листи.
„Во делот на новиот концепт за отворени листи каде што изрази задоволство, што опозицијата го прифатила нивниот предлог за отворени листи, претпоставувам барем пред себе треба да си ја признае вистината околу концептот за отворени листи. Ако нема храброст тоа да го каже во јавноста, бидејќи ВМРО-ДПМНЕ не само што го прифати туку и ВМРО-ДПМНЕ го предложи концептот и начинот како би изгледало тоа законско решение иако тој вчера, како познат препишувач, кажа дека тоа било нивен предлог и дека ние како ВМРО-ДПМНЕ сме го прифатиле“, рече Мицкоски.
Напротив, додаде Мицкоски, предлогот е на ВМРО-ДПМНЕ а СДСМ и Зоран Заев го прифатија, но и тоа е ирелевантно.
Тој цени дека тоа е еден нов квалитет на политичката сцена, каде што индивидуи коишто се силно мотивирани, коишто ценат дека имаат и уживаат углед во средините од каде што потекнуваат, ќе имаат можност тоа, практично и да го покажат без разлика на кое место на листата на советници се наоѓаат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Герасимовски: Воведуваме „Центарска картичка“ со попусти за културни, спортски настани, локали и продавници
Кандидатот за градоначалник на Општина Центар, Горан Герасимовски, денеска најави дека се воведува „Центарска картичка“ со попусти за културни и спортски настани, локали и продавници.
„Секој центарец добива еднаш годишно бесплатна карта за театарска претстава, а за секоја следна купена карта добива 20% попуст. Со картичката, овоможуваме и 20% попуст за натпреварите на нашиот најтрофеен клуб „Работнички“, како и попусти за влез на базен. На нашите центарци, на децата и возрасните им овозможуваме подобри услови и поволности“, рече Герасимовски.
Македонија
Почина Агим Јонуз
Политичкиот анлитичар, Агим Јонуз, почина во Скопје на 63 години по боледување.
Јонуз беше активен во политичкиот живот во Македонија не само како аналитичар и колумнист, туку и како поранешен советник и портпарол на поранешниот претседател на Собранието, Лупчо Јордановски и на поранешниот премиер Бучковски.
Во 2021 година Јонуз беше носител на листа на советници за Град Скопје предложен од „Твоја Партија“.
Јавноста го познаваше како чест гостин во политичките дебатни емисии на телевизиите.
Погребот на Агим Јонуз ќе се одржи утре, 26 октомври 2025 година, на гробиштата во Бутел.
Македонија
ВМРО-ДПМНЕ веќе има 35 градоначалници, рече Мицкоски по повлекувањето на опонентите од Могила и Македонски Брод, очекува 59
Премиерот и претседател на ВМРО-ДПМНЕ, Христијан Мицкоски од денешниот митинг во Неготино изрази увереност дека кандидатката од ВМРО-ДПМНЕ која има предност пред нејзиниот опонент од СДСМ, ќе биде следниот градоначалник на општината.
Мицкоски нагласи дека граѓаните јасно ја изразиле својата волја и доверба кон ВМРО-ДПМНЕ и Коалицијата, која во првиот круг освоила 33 градоначалници, наспроти тројца од СДСМ, а во вториот круг влегла во 26 општини.
„Веќе во две општини противниците на нашите кандидати се откажаа – Македонски Брод и Могила – така што во овој момент коалицијата има 35 градоначалници и уште во 24 општини е во втор круг. Тоа се 59 потенцијални градоначалници“, рече Мицкоски, додавајќи дека тоа ќе биде историски најголем триумф на македонската политичка сцена.
Тој посочи дека ВМРО-ДПМНЕ е апсолутен победник на овие избори, имајќи мнозинство и во 58 општински совети, а го истакна и водството на кандидатот за градоначалник на Град Скопје, со предност од над три спрема еден во однос на противкандидатот.
Мицкоски ги повика граѓаните масовно да излезат на гласање на 2 ноември и да го заокружат бројот 9, за, како што рече, да се потврди „најголемата победа во историјата на Македонија“.

