Македонија
Мицкоски: Ромите биле, се и ќе останат значаен фактор во македонското мултикултурно општество

Најпрво дозволете ми во мое лично име и во име на ВМРО-ДПМНЕ на сите Роми, граѓани на Република Македонија да ви го честитам Меѓународниот ден на Ромите, 8 Април“, истакна претседателот на ВМРО-ДПМНЕ, Христијан Мицкоски на настан организиран по повод Меѓународниот ден на Ромите.
Мицкоски додаде дека Ромите биле, се и ќе останат значаен чинител на македонското мултикултурно општество и нивната културна, јазична и идентитетска посебност се дел од македонската ризница на различности, ризница по која Македонија е ценета и вреднувана во Европа и Светот.
„Македонија никогаш не била, ниту ќе биде држава во која некој бил принудуван на асимилација, туку напротив секогаш била светол пример на уважување на посебноста и етничката различност на секој нејзин граѓанин. Впрочем Македонија е можеби единствената земја во поширокото опкружување каде што мнозинство сочинуваат Ромите, а ромскиот јазик е службен јазик заедно со македонскиот. Ромите на Македонија и вратиле со огромен придонес во музиката, културата, спортот и политичкиот живот и за тоа и јас и секој граѓанин кој ја сака нашата татковина Македонија е неизмерно благодарен“, појасни тој.
Мицкоски посочи дека за жал Ромите долго време во Македонија, како и голем дел од другите граѓани, се соочуваат со сериозни егзистенцијални проблеми, сиромаштија и безнадежност. Огромен број се погодени од екстремна сиромаштија а неколкукратно повеќе живеат на работ на сиромаштијата до 2 до 3 евра на ден. И овој живот е подеднаков за сите граѓани.
„Тоа мораме да го признаеме е недозволиво. И за сето тоа власта не сака да чуе, туку напротив со своите розови очила насила ни наметнува нешто кое што никој од нас не може да го види. Власта на СДС и ДУИ како да не живеат со нас тука во Македонија, тие не сакаат да видат дека имаме една од највисоките стапки на инфлација која го разјадува животниот стандард, како да не сакаат да видат дека веќе немаме здравствен и образовен систем, не сакаат да видат дека масовно се празни Македонија и секој ден автобуси со Роми, Македонци, Албанци и сите останати заминуваат во странство“, нагласи претседателот на ВМРО-ДПМНЕ.
„Ние како ВМРО-ДПМНЕ ветуваме реформи. Тие реформи ќе ја кренат оваа држава и ќе овозможат напредок и опстанување на младите и на сите останати тука во Македонија. Предвидуваме многу работа и поддршка за сите оние проекти кои ќе го подобруваат животот на граѓаните. За еден мандат се предвидуваат стотици и стотици милиони евра како директна поддршка за сите општини кои ќе изготват проекти за подобар живот на своите граѓани. Да, средства кои ќе ги добијат и Шуто Оризари и Струмица, и Штип и Битола, и Тетово и Кичево и Охрид и Велес и било кое друго место. Во исто време ветуваме силна борба против корупцијата и многу силна контрола на секој народен денар како се троши“, порача тој на денешниот настан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Родителите на загинатите се пред МВР: И без душа и без дете, ние пеш дојдовме, сега нека излезе Тошковски место ние да влеземе

Родителите и роднините на загинатите во Кочани стигнаа пред Министерството за внатрешни работи. Решија да дојдат пред Министерството откога министерот Панче Тошковски ги известил дека ќе ги прими на средба. Измачени од маршот, кој почна пред три часа, тие застанаа пред Министерството.
„Кога ние можевме да дојдеме до тука, ако има храброст, нека излезе тој пред нас родителите. Ние толку голем пат поминавме до тука, нека излезе тој од почит кон нас родителите. Штом не знаеше со автомобилот да дојде пред Собранието, еве ние пеш дојдовме до тука и без душа, и без сила, и без дете. Сакаме да дојде тука пред нас“, рече една од мајките на загинатите и седна на асфалтот пред МВР.
Друга мајка предложи да влезат и да разговараат со министерот сами, како што направија во Обвинителството, но повеќето рекоа дека се исцрпени и чекаат министерот да покаже почит.
Пред Собранието пред родителите на загинатите излегоа лидерот на опозицискиот СДСМ, Венко Филипче, и неколкумина негови сопартијци пратеници, како и пратеници од партијата Левица. Кога Филипче им објасни дека институционално во Собранието се борат за неселективна правда, родителите на загинатите им рекоа да си депонираат оставки од функциите кај претседателот на Собранието оти нивната борба личи на борба во себе. Ги потсетија пратениците на СДСМ дека се многу поборбени кога се борат за да дојдат на власт, па прават шарени и какви ли уште не револуции.
Македонија
Обвинителите се сретнаа со семејствата на загинатите во пожарот во „Пулс“

Јавниот обвинител и тимот обвинители што постапуваат во предметот за пожарот во кочанската дискотека „Пулс“ денеска се сретнаа со семејствата на жртвите oд трагедијата.
Од Обвинителството, по средбата, соопштија дека семејствата биле информирани за досегашниот тек на истражната постапка.
„Одговарајќи на сите поставени прашања и дилеми на блиските на починатите, обвинителите ги уверија дека истрагата е сеопфатна и се земаат предвид сите аспекти на евентуална одговорност за трагичниот настан“, велат од Обвинителството.
На семејствата им била најавена и динамиката на претстојните распити на оштетените како следна фаза од истражниот процес.
Македонија
Тошковски ќе се сретне со семејствата на загинатите во Кочани, Мицевски вели: Нема простор за политичко профитерство

Денес, на 46-тата собраниска седница, на која се расправаше за интерпелацијата за министерот Панче Тошковски, од собраниската говорница се обрати и координаторот на пратеничката група на ВМРО-ДПМНЕ, Никола Мицевски.
„Побарав процедурално бидејќи сакав накусо да се обратам до сите пратеници, но и до целата македонска јавност. Нема да ги дозволиме политичките профитери од опозицијата да ја злоупотребат, вулгализираат и да ја пренесат на улица трагедијата од Кочани и да си поигруваат со тажната судбина на овие луѓе“, изјави Мицевски.
Тој истакна и дека единственото решение е институционално и брзо решавање на случајот и ја информира јавноста дека денес министерот за внатрешни работи Панче Тошковски ќе ги прими семејствата на загинатите од трагедијата во Кочани.
„Единственото решение е институционално и брзо решавање на овој случај. За тоа работиме, за тоа се залагаме. Сè друго е политичко некрофилство. Имено, ја информирам јавноста и вас пратениците дека министерот за внатрешни Панче Тошковски во 14.30 часот во Министерството ќе ги прими и ќе оствари средба со семејствата на загинатите од трагедијата во Кочани. Од овие причини барам 1 час пауза. А потоа ќе продолжиме со работа по интерпелацијата за која очигледно не ви е гајле бидејќи тој што ја поднесе прв замина и не е присутен на оваа пленарна седница“, прецизира Мицевски.