Македонија
Мицкоски: Случајот „Адитив“ не е единствениот криминал во АД ЕСМ, ќе има и други случаи

Претседателот на Владата, Христијан Мицкоски на денешната собраниска седница за пратенички прашања истакна дека последниот случај во АД ЕСМ „Адитив“ не е единствен и нема да се заврши тука, ќе има и други случаи, јавноста ќе дознае кој е одговорен и кој ги крадел македонските граѓани и свесно уништувал, и одговорност мора да има.
„Тоа што се отпочна случај за адитивите кои се користени во АД ЕСМ, поранешно ЕЛЕМ во производниот процес можам да кажам како инженер, професор и човек кој одреден период поминал во таа институција за менаџирање на истата, не само што немало потреба толкава количина за набавка на истите, туку и цените се надвор како што велат правниците правило на испружена рака, нивната рака долго се испружувала и завршувала во џебови кај поединци“, изјави премиерот Мицкоски.
Премиерот Мицкоски истакна дека е убеден и за осомничениот кој не е достапен на органите на истрагата дека еден ден ќе биде достапен и ќе одговара, бидејќи како што посочи по седум години долгот е околу 5 милијарди денари, а нанесена е штета врз производниот енергетски систем со неспроведување на вистински ремонти туку со шпекулативни во смисла на нестручно и ненавремено.
„Би сакал да напоменам дека на тој начин што се несовесно се управувале производните комбинати во АД ЕСМ се нанесе и удар на суверенитетот на државата бидејќи ние не сме земја која има наоѓалишта на нафта или гас, со што директно се загрозија работни места на илјадници граѓани, и индиректни десетици илјади кои работат во компании кои соработуваат со АД ЕСМ“, рече премиерот Мицкоски.
Премиерот Мицкоски додаде дека изминатите 7 години воедно се намалил производниот капацитет од 209 мегавати електрична енергија на мрежа до 145-150, а нови проекти и немало.
„На владина седница одглавивме два проекти, сакам да ја истакнам втората фаза од ветерниот парк во Богданци, нешто што претставува квалитетен проект, вториот е сончевата централа во Битола. Овие два проекти се обезбедени од европски банки, вредноста е стотина милиони евра што ќе додаде вредност во производното портфолио. Најголем дел злоупотреби се правени во надворешна механизација за ископ на јаглен ако направите математика ќе дојдете до заклучок дека денот нема 24 часа, туку 36, а годината нема 365 дека туку 450 или 500 дена, се побивани законите на физиката и би сакал во доказна постапка ако се отвори случај да ги слушнам кои им се објаснувањата“, рече премиерот Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ме радува спојувањето на „Вреди“, им посакувам успех, ние најверојатно ќе одиме и со свои кандидати за градоначалници, вели Таравари

Министерот за здравство и лидер на едно од двете крила на Алијансата за Албанците, Арбен Таравари, им го честита спојувањето во една партија на досегашните коалициски партнери од „Вреди“ и најави дека, најверојатно, освен свои советнички листи, неговата партија ќе оди сама и со кандидати за градоначалници на локалните избори наесен.
„’Вреди’ се обедини. Им посакувам успех. Многу ме радува што се споија трите партии, подобро една партија отколку три. Им посакувам успех на изборите. Ние како Алијанса ќе излеземе со наши сопствени листи и, најверојатно, и со наши кандидати за градоначалници“, рече министерот Таравари.
Во партијата засега немаат одлука како ќе продолжат со работа петтемина пратеници од Алијансата за Албанците, кои се дел од коалицијата „Вреди“, но ако се иницира прашањето, Таравари вели дека тие се подготвени да продолжат со работа како една пратеничка група, а „Вреди“ да си има своја пратеничка група.
Таравари и денес рече дека е против предвремени парламентарни избори оти Владата и со нив и без нив има стабилно мнозинство, а дека целта им е да победат во што повеќе општини на локалните избори.
„ Јас не сум за предвремени избори. И нашата партија има таков став, не сме за предвремени избори. Владата има стабилно мнозинство, без разлика дали ние сме или не сме во Владата. Јас сметам дека треба да има локални избори, на сите нам како политички партии многу ни е битно да излеземе со што подобри резултати на локалните избори. Ова ни е целта – да победиме во што повеќе општини, нормално онаму каде што ќе можеме“, рече Таравари.
Таравари и денес рече дека со премиерот Христијан Мицкоски е во постојана комуникација и очекува да се сретнат деновиве. Немаат точен датум, но сигурно ќе се видат.
Македонија
МВР отвори нова канцеларија за издавање лични документи во Демир Капија

Министерот за внатрешни работи Панче Тошковски денеска во Демир Капија присуствуваше на отворање на нова канцеларија на управните служби на министерството за внатрешни работи.
„Оваа е петта локација по ред отворена со цел да овозможиме полесен и побрз пристап на граѓаните до услугите на министерството за внатрешни работи. Канцеларијата располага со базна станица за сликање на сите лични документи и граѓаните ќе можат тука да ги извадат своите лични карти, возачки дозволи и пасоши. Со оваа канцеларија се овозможува пристап на околу 5000 жители на Демир Капија и околината за брзо и лесно вадење на лични документи. Сите македонски граѓани заслужуваат побрзи и поефикасни услуги од институциите кои постојат за нив“, потенцираше министерот Тошковски.
Канцеларијата ќе работи првично еден дел од неделата, секој понеделник од 08 до 16 часот.
Македонија
Партијата Левица со поддршка на првомајските протести

Во време кога капиталот ја гаси секоја искра на отпор, платите стагнираат, цените растат, а власта парче по парче ги крати работничките права и ја продлабочува социјалната неправда, време е за работничка солидарност. 1 Мај е денот кога работникот треба да покаже дека неговиот глас никогаш нема да биде замолчен, порачуваат од политичката партија Левица.
Од партијата велат дека владата на ДПМНЕ-ЗНАМ-ВРЕДИ со своите празни ветувања за обновување на „гордоста“, оставила работниците да се борат сами за своето егзистенцијално опстанување, додека постепено се губи достоинството на трудот.
„Партиите на олигархијата, исклучени од реалноста, за нецелосен мандат на власт, во повеќе наврати ја демонстрираа својата оттуѓеност од реалните потреби на работниците и наклонетоста кон интересите на капиталот, и бессрамно одбија реални решенија за подобрување на правата на работникот, додека тие уживаат во своите удобни фотељи. Така за само неколку месеци власт во работникот доби зголемена сиромаштија и институционализирана неправда која ги погодува најранливите во општеството.
Потсетуваме дека, додека Левица нудеше законски решенија за подобрување на работничките права – работникот да добива надоместок за патни трошоци, платата да ја добива навреме до 5-ти во месецот, избегнувајќи непотребни казнени камати за задоцнето плаќање, породилно отсуство за мајките од 18 месеци, владата на ДПМНЕ-ЗНАМ-ВРЕДИ јасно застана на страната на капиталот и ноншалантно ги одбиваше сите предлози кои значеа враќање на достоинството за работникот, а најлошо од сѐ – се изземаа од трипарттитниот договор со капиталистите, кадешто требаше да бидат гарант дека работниците ја имаат подршката од државата“, велат од Левица.
Затоа, велат од атаму, 1 Мај не е ден за тишина – 1 Мај е ден за отпор, за гласно, организирано не на капиталистичкиот систем што ги гази нашите животи.
„За систем што ќе служи на работникот, а не на профитот. Левица како единствена партија која се бори за подобар статус на работникот, го подржува протестот на ССМ за 1 Мај, и ги повикува сите работници на сплотеност и истрајност во борбата за работничките права“, се вели во соопштението на Левица.