Македонија
Мицкоски на средби со партиските членови и симпатизери во Куманово
Претседателот на ВМРО-ДПМНЕ, Христијан Мицкоски, денеска беше во посета на ОК ВМРО-ДПМНЕ Куманово, каде што оствари средба со голем број членови и симпатизери на партијата.
Мицкоски пред присутните истакна дека во моментот граѓаните се соочуваат со голем притисок и уцени од страна на актуелното раководство на Владата на СДСМ и Заев нарекувајќи ја непотистичка и криминална влада. Според него, нервозата кај Зоран Заев е поради стравот од губење на претседателските избори, кои ќе се одржат на 21 април.
„Од 21 април и формално почнува одбројувањето кога Зоран Заев, практично и СДСМ, ќе замине во политичката историја. Затоа, на 21 април ни е од исклучително значење за да можеме да ја вратиме Македонија онаму каде што припаѓа, а тоа е на вистинскиот колосек, а не на колосекот што ја движи државата во бездна“, вели претседателот Мицкоски.
Според него, целосен крах се случува не само на политички план туку и на економски потенцирајќи дека, за жал, граѓаните живеат во беда и сиромаштија поради неспособноста на криминалната влада на Заев и СДСМ. Претседателот Мицкоски рече дека со победа на претседателските избори, ќе се отвори патот ВМРО-ДПМНЕ да побара предвремени парламентарни избори, каде што пред граѓаните нема да ветуваат брда и долини, туку реални проекти што ќе ги решат проблемите на граѓаните.
„Нема, од една страна, да ги зголемуваме даноците, а од друга, да креираме лажна надеж меѓу нашите граѓани дека само што не дошол еден голем германски гигант да инвестира во Македонија. Не доаѓа тој со зголемени даноци. Нема да шетаме и да ги газиме дебелите килими по светските метрополи на балови, додека народот во државата едвај први со први скрпува. Немаме фирми, немаме семејни бизниси, немаме октоподи во рамките на семејството, имаме желба како Македонија да ја направиме честита, принципиелна, искрена и држава што ќе се темели на вредности. Тоа е нашиот завет пред луѓето“, нагласи Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„10 спрема 1 по освоени општини во првиот круг е соодносот на ВМРО-ДПМНЕ со СДС, граѓаните избраа работа и дела, наместо криминал и неспособност“, велат од ВМРО-ДПМНЕ
„Локалните избори беа одраз за тоа дека доколку работиш чесно, транспарентно и посветено, народот ќе го цени тоа и ќе те награди. ВМРО-ДПМНЕ го преслика успехот од парламентарните избори минатата година во процентуална вредност, а споредбено со минатите локални, имаме и раст во бројот на гласови, советнички места и градоначалници“, велат од ВМРО-ДПМНЕ.
„ВМРО-ДПМНЕ освои 550 советници низ државата и градот Скопје, додека СДС освои околу 230 советници. ВМРО-ДПМНЕ освои 12.000 гласови повеќе од минатите избори, додека СДС изгуби 111.000 гласови. ВМРО-ДПМНЕ доби 11 повеќе градоначалници во првиот круг, а СДС изгуби 6. Соодносот на ВМРО-ДПМНЕ и СДС по првиот круг е 10 спрема 1. Граѓаните направија вистински избор, избраа работа и дела, наместо криминал и неспособност.
Во вториот круг на 2 ноември, ВМРО-ДПМНЕ е асполутен фаворит во сите 26 општини. Затоа, ги повикуваме граѓаните, во вториот круг да го дадат својот глас на кандидатите на ВМРО-ДПМНЕ и масовно да го заокружат бројот 9.
Да ја запечатиме победата и да го направиме вистинскиот избор, со твојот човек, за твоето место, за твојата иднина!“, соопшти ВМРО-ДПМНЕ
Македонија
Неколку скопски општини денеска без струја
Од ЕВН Македонија АД известуваат дека денеска без електрична енергија ќе останат:
– од 08:30 до 14:00 часот, корисниците од дел од улиците: Полог и Кочанска, општина Кисела Вода;
– од 08:30 до 16:00 часот, корисниците од населените места и објектите од село Алдинци кон Солунска Глава, општина Студеничани;
– од 09:00 до 14:00 часот, корисниците од дел од ул. Македонско Косовска Бригада, општина Шуто Оризари;
– од 09:00 до 14:00 часот, корисниците од објектите во околината на зграда бр. 17 на бул. Партизански Одреди, општина Центар;
– од 09:30 до 13:00 часот, корисниците од ул. 6 во село Бардовци, општина Карпош.
Македонија
Непречен сообраќај по влажни коловози
Сообраќајот на државните патишта се одвива непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

