Македонија
Мијалков бара прекин на судскиот процес за апсењето на Бошкоски

Поранешниот директор на УБК, Сашо Мијалков, согласно одлуката на Врховниот суд, бара одбивателна пресуда за случајот „Тортура“, кој се однесува на апсењето на лидерот на ОМ, Љубе Бошкоски.
На денешното рочиште адвокатите кои го застапуваат Мијалков, Љупчо Шврговски и Петар Василев, истакнаа дека обвинението за предметот „Тортура“ е поднесено по истекот на рокот од 18 месеци на СЈО за поднесување обвиненија и врз основа на тоа бараат прекин на постапката.
„Ако судот изврши увид во предметот, ќе може да констатира дека јавниот обвинител му го предал предметот на СЈО на 4.12.2015-та година заедно со 28 други предмети. Исто така ќе може да утврди дека СЈО со решение од 9.12.2015 година воспоставил надлежност врз комплетниот предмет. Рокот за поднесување обвинение не подолг од 18 месеци завршил на 4.06.2017 година, а од приемниот печат кој се наоѓа на обвинителниот акт на предметот може да се утврди дека СЈО го поднел овој акт до судот на 29.06.2017 годнина, односно 25 дена вон рокот што е определен со закон“, образложи адвокатот Петар Василев.
Обвинителот од СЈО Љубомир Лапе, предложи да се одбие ова барање велејќи дека Основниот суд Скопје 1 – Скопје позитивно одлучил по обвинението што значи дека судот го прифатил СЈО како овластен тужител. Судот го одби ова барање на одбраната велејќи дека приговорот требал да биде поднесен во фаза кога се оценувало обвинението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре еден час помалку спиење – во два по полноќ почнува летното сметање на времето

Вечерва, сабота кон недела, почнува летното сметање на времето.
Тоа значи дека стрелките на часовникот во два часот наутро на 30 март ќе се поместат еден час нанапред и ќе биде три часот.
Летното сметање на времето завршува во последната недела во октомври, со поместување еден час наназад, кога три часот наутро ќе се брои како два часот по полноќ.
Летното сметање на времето е договореното правило за поместување на часовниците напролет, во последната недела од март. Овој систем во светот е стар повеќе од еден век. Предложен е 1905 од британскиот претприемач и градежник Вилијам Вилет, но бил прифатен во 1916 година со цел заштеда на јаглен.
Во Македонија летното сметање на времето е воведено во 1983 година, кога таква одлука била донесена на ниво на тогашната Сојузна федеративна република Југославија.
Македонија
Променливо облачно и нестабилно со повремени врнежи од дожд, особено попладне

Времето денеска, променливо облачно и нестабилно со повремени врнежи од дожд, особено попладне. Локално ќе има услови за појава на краткотрајно невреме со пообилен пороен дожд (за кратко време над 15 л/м2), појава на грмежи и засилен ветер. Минималната температура ќе биде во интервал од 3 до 9, а максималната ќе достигне од 12 до 18 степени.
Во Скопје ќе биде променливо облачно со повремен дожд. Попладне во делови од котлината ќе биде нестабилно со пороен дожд и грмежи. Минималната температура ќе се спушти до 8, а максималната ќе достигне до 17 степени.
И во наредните денови продолжува периодот на променливо облачно и нестабилно време со повремени врнежи од дожд, особено во попладневните часови.
Локално ќе има услови за појава на краткотрајно невреме со пообилен пороен дожд (за кратко време над 15 л/м2), појава на грмежи и засилен ветер.
Македонија
Големо невреме на автопатот Штип-Миладиновци, зголемен број на одрони

Големо невреме вечерва има на автопатот Штип-Миладиновци. Кај наплатната станица Кадрифаково покрај поројниот дожд имало и град.
Подружницата на „Македонија пат“, информира дека поради зголемен број одрони на патот Делчево-Пехчево-Берово, екипи на претпријатието работат на нивно чистење.
„Апелираме на претпазливо возење и почитување на сообраќајната сигнализација. Екипите остануваат на терен до целосно отстранување на одроните“, информираа од „Македонија пат“.