Македонија
Младите охриѓани викендов ги чистea плажите во рамките на проектот „Чисто езеро – светла иднина“

Викендов, во Охрид се одржа голема екоакција за чистење на крајбрежјето на Охридското Езеро. На повеќе плажи младите од Охрид, помогнати од волонтерите од Црвниот крст од Охрид, собираа разновиден отпад во рамките на проектот „Чисто езеро – светла иднина“, што се реализира со поддршка на Министерството за животна средина и просторно планирање.
Од здружението на граѓаните „Нова порта“ велат дека ова е четврта акција за чистење на најкритичните места по должината на брегот на Охридското Езеро.
„Интересот кај младите за да се вклучат во акцијата е голем. Изминатиов месец на повеќе локации се собираше отпадот, а беше спроведена и креативна акција ‘Не фрљај ѓубре, смрдиТ’, на која преку типичен охридски дијалект беа изработени транспаренти со еколошки пораки за заштита на Охридското Езеро. Целта, пред сè, е подобрување на состојбата на животната средина и подигнување на свеста за зголемена заштита на Охридското Езеро и крајбрежјето“, велат од „Нова порта“.
Од таму додаваат дека вакви акции се исклучително потребни оти едукацијата и практичните примери се најважни во борбата за заштита на животната средина.
Претходно, во рамките на проектот се реализира и подводно чистење на езерото од страна на професионални нуркачи, а собраниот отпад беше презентиран пред младите, на кои им беше потенцирана штетноста врз ендемичниот свет, кој милиони години живее во Охридското Езеро.
„Најмалите преку вакви акции спознаваат за значењето на здравата животна средина. Во таа насока се организираа и едукативни екоработилници, како и екоакција заедно со нуркачите за расчистување на дното на езерото“, велат од невладината „Нова порта“.
За подигнување на еколошката свест, во рамките на проектот ќе биде изработен и видеоспот преку кој младите ќе испратат силни и јасни пораки за здрава и чиста животна средина, а исчистените плажи ќе бидат обележани со екознамиња како еколошко чисти плажи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Осомничен за трговија со дрога ја искинал наредбата за претрес во неговиот дом

Oбвинителството поведе истрага против едно лице за неовластено производство и пуштање во промет наркотични дроги. Тој е осомничен и за одземање или уништување службен печат или спис.
Осомничениот, во својот дом во Гевгелија, неовластено заради продажба држел 26,42 грама наркотична дрога кокаин. Дрогата и повеќе други предмети со траги од кокаин биле пронајдени на 1 август, при претрес во неговата јакна закачена во ходникот од семејната куќа.
При претресот, полициските службеници на осомничениот му ја предале и прочитале издадената наредба за претрес од судијата на претходна постапка при Основниот суд Гевгелија. Наредбата примена во МВР и со службен печат на МВР, тој ја зел и ја искинал пред службените лица и на тој начин оштетил спис кој припаѓа на државен орган, односно наредба издадена од Основен суд Гевгелија и примена од МВР ОВР Гевгелија.
Бидејќи постојат законски основи, надлежниот јавен обвинител до судијата на претходна постапка достави предлог за определување мерка притвор за осомничениот.
Македонија
Цела ноќ борба со огнот во велешката фабрика – изгореа магацин со фрижидери и канцеларии со документи

Пожарот што синоќа избувна во фабриката за прехранбени производи „Мирана“ во Велес бил целосно локализиран рано утрово, околу 4 часот. Според информациите од надлежните, огнот зафатил магацински простор и канцеларии, а на неколку места сè уште се забележува слабо чадење.
Пожарот бил пријавен околу 22 часот. Горел магацин каде што имало пластична амбалажа, фрижидери и друг материјал, како и канцелариски простории со документација.
Во гаснењето учествувале три противпожарни возила од ТППЕ Велес со екипи од три смени, возило од ЈКП „Дервен“, како и две специјални возила на Дирекцијата за заштита и спасување. На терен биле и шестмина полициски службеници од Велес.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.
Причините за избувнувањето на пожарот сè уште се испитуваат.
Македонија
Голем пожар во фабрика во Велес

Синоќа избувна голем пожар во фабриката за храна „Мирана“, лоцирана во индустрискиот блок на Велес, потврдија надлежните.
На барање на Територијалната противпожарна единица Велес, привремено беше исклучена електричната енергија во фабриката.
„Во Велес, кај индустрискиот блок, опожарена е фабриката ‘Мирана’. По барање на ТППЕ Велес, исклучена е струјата во фабриката. Единиците за гаснење на пожарот се на терен“, информираше директорот на ЦУК, Мухамед Али.
Директорот на ДЗС, Стојанче Ангелов, информираше доцна синоќа дека нема информации за повредени лица при пожарот.
Причините за избувнувањето сè уште не се познати.