Млади математичари од Централна и Источна Европа два дена престојуваат во Скопје каде се натпреваруваат на меѓународен математички турнир чиј домаќин е училиштето „Нова“. Основци од образовни институции од седум држави кои минале повеќе нивоа на селекција уште пред да се појават на натпреварот, денес и утре ќе решаваат комплицирани, логички математички задачи. Имињата на најдобрите, на најподготвените и најбрзите математичари ќе се знаат во сабота во попладневните часови, а победниците ќе добијат медали и дипломи.

Турнирот е дел од програмата и активностите на асоцијацијата CEESA во која членуваат меѓународни училишта од Централна и Источна Европа меѓу кои и „Нова“. Во Скопје престојуваат 60 млади математичари од повеќе од 22 националности кои се натпреваруваат индивидуално и тимски решавајќи различен тип на задачи.

Идејата зад асоцијацијата CEESA е да се разменуваат искуства со цел да се подобри квалитетот на работа, но воедно формирани се и лиги за повеќе спортови како и академски натпревари. Основци од Македонија постојано ги мерат силите со млади математичари од други земји, но овој пат се и домаќини на настанот.

„Задачите кои се решаваат на овие натпревари се исклучителни тешки, но идејата не е да се тестира колку формули или равенки знаат децата туку да се погледне како размислуваат. Тие треба да размислуваат логички, да употребат принципи и правила кои ги научиле во математиката за да стигнат до вистинскиот одговор. Искуството покажува дека голем дел од основците кои учествуваат на овие турнири понатаму продолжуваат да се дообразуваат и да се занимаваат со професии кои на некој начин се поврзани со математиката“, велат од „Нова“ посочувајќи дека наши млади математичари повеќе пати имаат учествувано на овој натпревар и имаат освоено злато и бронза како тим, а индивидуално вообичаено се пласираат помеѓу првите десет.

Во рамки на асоцијацијата CEESA паралелно се одржуваат голем број на натпревари, па така додека Скопје е домаќин на турнирот по математика за основци, во Москва се случува математички натпревар за средношколци, а во Загреб е турнирот во општи знаења кој е концепиран како квиз.

„Лани турнирот во општи знаења наречен CEESA Кnowledge Bowl се одржа во Македонија, кога бевме домаќини на екипи од повеќе земји. Тогаш нашите ученици ги освоија и првото и второто место. Се надеваме дека и овојпат ќе можеме да прикажеме солидни резултати“, завршуваат од „Нова“./крај/смф