Љупчо Пренџов, пратеник од редовите на ВМРО-ДПМНЕ, на денешната расправа одржана во рамките на Комисијата за финансирање и Буџет во Собранието истакна дека кога се дискутира за бројки и парите на граѓаните мора да постои прецизност, бидејќи граѓаните од пратениците очекуваат информативен бенефит, што се случува во Македонија и каде се трошат нивните пари, а не на буџетска расправа да се ставаат теми кои не се поврзани со Буџетот.

Пренџов истакна дека во поглед на одбележување на Рамковниот договор, во рамки на Владата тоа постои секоја година и даде уверување дека тоа одбележување ќе биде на истото ниво и повисоко од тоа што било лани или пред 5 години. Пренџов дополни дека за време на владеењето на претходната власт, 7 години се трошеа огромни средства, пари на непродуктивни работи.

„Денеска, најголем дел од прославите се прават во рамки на „Клубот на пратеници“, и нормално е да тоа што е државно чини помалку од тоа што е приватно и кога вие се грижите за народните пари, нормално е да ги оптимизирате трошоците, да има се да биде достојно обележано и тоа да ги чини сите нас граѓаните помалку. Сите работи ќе си бидат испочитувани, изорганизирани на највисоко ниво“.

Пренџов, во понатамошниот дел од своето излагање упати апел да не се поистоветува спортот и наводните меѓуетнички тензии, при што истакна дека секоја држава и секоја нација треба да вложува во младите и спортот и укажа дека е поразително поранешен вицепремиер и актуелен пратеник да се обидува да го поистоветува спортот со меѓуетнички тензии.

„Јас немам проблем вие да побарате амандмани за било што, тоа е нормално тоа е демократија. Јас немам проблем да разговарате со граѓани коишто имаат реални потреби и тие реални потреби на граѓаните да ги артикулирате низ амандмани и овдека да ги дискутираме, но е нечесно да кажете на Македонија не и треба спорт, два пати тоа го спомнавте“.

Укажа дека во Македонија ќе има и спорт и одбележување на сите настани коишто ја одбележуваат Македонија, преку оптимизација на трошоците, бидејќи домаќинското и одговорно работење е императив на Владата предводена од ВМРО-ДПМНЕ.

Претседателот на Социјалдемократскиот сојуз на Македонија, Венко Филипче, на новинарско прашање категорично ги отфрли шпекулациите за каков било „скриен договор“ со ВМРО-ДПМНЕ, нагласувајќи дека опозициското делување и реторика на СДСМ е едно од клучните причини за значајниот пад на поддршката на владејачката партија.

„Во однос на некаков скриен договор со ВМРО-ДПМНЕ или тоа дека ние немаме доволно силна опозициска реторика во изминатиот период, сметам дека тоа што ВМРО-ДПМНЕ изгуби 140.000 гласови за година ипол, а тоа е третина од гласовите што ги добија пред година ипол, е заслуга во еден дел и на нашата опозициска реторика”, одговори Филипче.

Додаде дека СДСМ во континуитет ја разобличува, како што рече, лажната реторика и патриотизам на ВМРО-ДПМНЕ, објавувајќи низа скандали и незаконско работење на актуелната власт.

„Ние сме тие и бевме тие кои што ги разобличуваа нивните лаги, нивната лажна реторика и нивниот лажен патриотизам. Ги откривме скандалите, коруптивните шеми, мрежата на договорени тендери за кои што, за жал, нема никаква реакција. Скандалите во АНБ, тешката партизација на институциите и ќе продолжиме така, како силна опозиција уште позасилено да работиме во следниот период”, нагласи Филипче.

По повеќе од четири часа евиденција на сите присутни попладнево почна судењето за пожарот во кочанската дискотека „Пулс“ со 63 жртви и над 200 повредени.

Обвинителството кое го преставуваа 15-мина обвинители на денешното рочиште го даде воведниот збор.

Буре барут, безбедносна смртоносна стапица, колективно непостапување и неодговорност, не само кобната ноќ, туку од 2012 година навака, беа зборовите што провејуваа во воведот. Обвинителот Борче Јанев кажа дека доказите говорат за измината декада без контрола, без надзор и без постапување од сите надлежни институции. Тој рече дека се вратиле до 2012 година која за него вели дека е нулта точка и од таму почнува непостапувањето.

Потсети дека во 2012 година Дејан Јованов сопственикот на магацинот за текстил решил да го претвори во дискотека и направил прокет и првпат побарал лиценца но овој прв обид бил и единствениот кој бил одбиен од инстутициите. Јованов не ја добил лиценцата, но како што рече обвинителот, не седел со скрстени раце туку за две недели повторно побарал лиценца и ја добил.

„Пропустите кај овој човек се шокантни. Со докази ќе покажеме што се бил спремен да направи за профит“, рече обвинителот Јанев.

Но овој човек, успешно вегетирал и опстојувал со години, како низ слалом ги нижел, заобиколувал и ги одстранувал сите институционални препреки, бариери и безбедносни правила.
Се што посакал тоа и го добивал, таму каде што знаел дека не можел да пробие и да го изигра законот, не се ни обраќал, немало потреба, сите документи кои морал да ги има, не ги обезбедувал затоа што никој не му ги барал.
Таму каде што требало да добие заштита и да ги прикрие криминалните потфати тоа и го имал, консултанти, доушници, логистичари.

Во најтесна закрила до него ги подредил неговиот кум, неговиот брат па дури и сопственото дете, сите впрегнати да работат и да кршат закони по негова замисла. И никој на овој човек, никогаш не му застанал на пат. последиците одамна имале опасен и хаотичен, но целосно предвидлив тек.
Во овој настан согледан во сиот обем уште во почетоците на неговото истражување, беше повеќе од јасно дека должноста молчела поради што последицата станала само прашање на време.
Во овој контекст, преку нормативна анализа се утврди дека во делот на должноста за постапување по однос на безбедносните правила и прописи секој од свој аспект на делување, директно биле повикани: локалната самоуправа односно Општина Кочани, Дирекцијата за заштита и спасување, Министерството за внатрешни работи, Државниот и пазарен инспекторат, Министерството за економија’, рече тој.

Оцени дека заедништвото во соизвршителските дејствија не мора да настапат истовремено и договорно, не мора ниту меѓусебе сторителите да се познаваат. Според него, во овој случај не затаиле само обвинетите кои биле на должност во време на настанување на последицата.

Станува збор, како што појасни Јанев за сукцесивно надоврзувани пропусти преку кои се огледа супстратот на заедништвото.

„Битен е обемот на пропустите и дали истиот има релевантен контекст и континуитет во непостапувањето. Ова обвинение е одраз на она што навистина се случувало. Безбедноста нема мандатна природа и истек на важност. Секој од овие обвинети е повикан на одговорност поради неделување во моментот кога имал правна должност тоа да го стори. Секој поинаков заклучок лесно западнува во невиден апсурд и во правен ќорсокак. Затоа ќе докажеме дека се апсолутно безмислени тезите дека овде на одгорност треба да биде повикан само оној во чие време се случила последицата. Немаме ниту морално ниту законско право одговорноста да ја бараме и да ја насочиме само кон тој во чие време се случила последицата. Тоа би значело дека треба да прифатиме дека обвинетите одговорни и службени лица кои не биле на должност во време на настапување на последицата, само поради тоа немаат вина. Иако се работи за исти повторувачки пропусти, меѓусебно надоврзувани во континуитет и доказите тоа јасно го покажуваат“.

Како што истакна „ако објектот ги исполнувал стандардите, ако вратите биле доволни и проодни,
ако плафонот и ѕидовите не биле обложени со отров што убива побрзо од пламен, ако имало функционална вентилација, ако постоеше противпожарен систем, ако имаше навремена контрола, надзор и санкција, пожарот сам за себе ќе се запаметеше како опасен инцидент, но не и како масовна гробница. Затоа денес бараме одговорност по име и презиме, бараме правда. На Дејан Јованов и на сите останати обвинети одговорни лица околу работењето на клубот Пулс, опасносите кои постоеле им биле добро познати“, додаде обвинителот.

Тврдиме како што рече, дека отсекогаш дискотеката „Пулс“ работела спротивно на секој стандард, на секој правилник, на секој Закон и на секоја здраворазумна логика и принцип на одговорност.

Дигиталната судница во КПУ „Идризово“ беше преполна, покрај 35 обвинети физички и три правни лица и нивните бранители и медиумите, првото судење го следеа некои од роднините на починатите.

Со длабоки и болни воздишки искажаа незадоволство кога бранителите на почетокот на судењето побараа одложување, оти обвинителството достави интегрирано обвиниение и нова ажурирана листа на докази откога судот ги спои постапките за пожарот и за сопственикот на Агенцијата за обезбедување „Рубикон“.

Обвинителот Јанев кажа дека обвинијата се исти а достави нова листа на докази од која се исфрлени вербалните докази кои се повторуваат. Бранителите на обвинетите тоа го искористија за веднаш на почетокот на судењето да побараат одлагање но судијката Дијана Груевска-Илиевска го прифати предлогот на обвинителството.

Роднините и родителите на загинатите по завршување на судењето со аплауз го поздравија воведниот дел од обвинителството и повеќе пати повторија со кои аргументи бранителите ќе ги бранат обвинетите.