Изминатите два дена 30 наши државјани го напуштија Израел, информираат од Министерството за надворешни работи.

Како што додаваат, преку разни транспортни канали уште десет наши државјани го напуштиле Израел, и тоа: четворица со лет до Атина, петмина до Подгорица, а едно лице со лет до Истанбул, со што заедно со оние што претходно тоа го сторија вкупната бројка надмина 30 наши државјани.

Од таму велат дека нашата Амбасада во Тел Авив, во тесна координација со кризниот штаб во Министерството за надворешни активно, работи на враќање на уште 100 наши државјани, кои побарале помош во напуштањето на Израел и кои во најголем дел се наоѓаат на безбедни локации.

„Дел од нив веќе има обезбедено билети преку редовните летови, кои се активни преку меѓународниот аеродром во Тел Авив, кој е во целосна функција. Други се наоѓаат во подрачја што беа опфатени со насилните дејства и се сметаат за небезбедни за што веќе е обезбеден внатрешен транспорт низ територијата на Израел за нивно префрлување на безбедна локација, од каде што би можеле да бидат упатени кон дома. Меѓу нив се и двајца наши државјани во Појасот Газа за чие извлекување е задолжена Амбасадата на Северна Македонија во Каиро, која е во директна комуникација со Министерството за надворешни работи на Египет.

Како што претходно објавивме, според процени на кризниот штаб, на територијата на Израел престојуваат до 200 наши државјани, од кои поголемиот дел е прецизно лоциран и редовно се одржува комуникација со нив сè до нивно враќање во Северна Македонија. Министерството за надворешни работи изготви информација за состојбите во Израел со проекција за наредните денови, која е доставена до Владата, која одлучува за наредните чекори.

Во меѓувреме, апелираме до нашите државјани во Израел да го следат националниот портал за итни случаеви (www.oref.org.il), односно т.н. Home Front Command, специјализиран за цивилна заштита, кој излезе со нови препораки до населението, како и да се почитуваат сите други упатства на надлежните институции на Израел“, велат од МНР.

Потсетуваат дека Министерството за надворешни работи на располагање ги има и двата СОС-дежурни телефона – 075/273 732 и 075/268 736, како и дежурниот телефон на Амбасадата во Тел Авив +972 54 926 7378.