Министерството за социјална политика, демографија и млади информира дека денеска започна исплатата на правата од социјална, детска и цивилна заштита за месец јуни 2024 година.

Корисниците на парични права коишто поседуваат дебитна картичка ќе можат да подигнат готовина на банкоматите на банките, да ги користат средствата за безготовински плаќања во продажната мрежа или преку електронско и мобилно банкарство од денеска, 05 јули 2024 година.

Со цел да се избегне метеж пред и во банките при исплата на правата, за корисниците кои не користат картички, исплатата ќе се спроведе во 2 групи во сите отворени филијали и експозитури на банките, согласно со утврдениот распоред по азбучен ред, според првата буква од презимето и тоа:

05.07.2024 – А, Б, В, Г, Д, Ѓ, Е, Ж, З, Ѕ, И, Ј, К, Л, Љ;
08.07.2024 – М, Н, Њ, О, П, Р С, Т, Ќ, У, Ф, Х, Ц, Ч, Џ, Ш.

„Убава е нивната позиција, секој месец да си земате плата, а да имате два проценти доверба кај граѓаните. Таа е најубавата позиција, комфорна, заседнати во дебели кожни фотелји со црвени килими и секој ден да доаѓате на работа, да броите илјадници евра месечна плата, а кај граѓаните да уживате само два проценти доверба. И нормално е кога некој сака инвазивно да делува, да направи реформа, веднаш од другата страна имаме одбранбен механизам којшто вели, не, не, ние сме против тоа, затоа што реформата којашто ние ја предвидувавме, предвидуваше да нема повеќе удобни фотелји, туку да има одговорност и отчетност, за да видиме што е тоа што тие сработиле до сега“, вели претседателот на Владата на Република Северна Македонија одговарајќи на новинарско прашање на денешната прес-конференција.

Премиерот Мицкоски потенцираше дека треба да им е срам што сè уште земаат народни пари, а уживаат доверба од само два проценти, наместо и самите да речат дека навистина треба да се променат работите, потенцирајќи дека Владата ќе продолжи да нуди решенија и да се промени нешто, односно како што рече да не биде како до сега, бидејќи заради тоа Македонија се празни.

„И сега нормално е дека ќе се појавуваат и таков тип експерти и таков тип на луѓе кои се дел од тие тела, коишто имаат доверба од два проценти. Јас би се засрамил да имам два проценти доверба. Веднаш ќе ја напуштам работата којашто ја работам и ќе се занимавам со нешто друго. А тие коишто најголемиот дел од нив видовме како таму се поставени, наместо да се засрамат и самите да речат дајте навистина нешто да направиме, тие продолжуваат и понатаму да ги трошат народните пари, па дури и уште испраќаат пораки во јавноста и се закануваат. Ние ќе продолжиме да нудиме решенија, ние тоа го знаеме, да нудиме решенија. Ако имаат тие подобри решенија нека дојдат да разговараме за да смениме нешто, да не биде како до сега. Затоа што како до сега, децата ни се иселија, Македонија се испразни“, вели премиерот.

Мицкоски нагласи дека борбата со криминалот и корупцијата, како и владеењето на правото биле носечки столбови на оваа Влада бидејќи и поради тоа добиле повеќе од 600.000 гласа.

„Ако оставиме ваков тип на функционери коишто уживаат народни пари, а ништо не прават со доверба од два проценти, како држава нема да одиме за долго. Како држава нема да одиме за долго, ако не направиме сериозни темелни структурни реформи. Тоа е суштината. А борбата со корупцијата и криминалот и владеењето на правото беа еден од носечки столбови за време на кампањата на оваа Влада за што добивме повеќе од 600.000 гласа“, дециден е премиерот.

„Соединетите Американски Држави се еден од најзначајните стратешки партнери на нашата држава, при што во делот на Царината силен фокус во соработката е сузбивањето на криминалот и корупцијата, како и зголемување на институционалните капацитети во наплатата на приходи“, беше истакнато на средбата помеѓу директорот на Царинската управа, Бобан Николовски, и шефот за економски прашања во амбасадата на САД, Рајан Милер.

На состанокот двете страни говореа за напредокот на работниот план со Трезорот на САД, каде што експерти од двете институции работат на развој на мерки што ќе придонесат за прибирање повеќе приходи во буџетот и сузбивање на сивата економија и корупцијата. Воедно, се говореше и за проектот за телесни камери за царинските службеници, како и за континуираните обуки на царинските службеници во рамките на Програмата за контрола на извозот и гранична безбедност при Амбасадата на САД.

Милер му честита на директорот за неговото назначување на оваа функција и му посака успех во работата.

Од страна на директорот беше изразена огромна благодарност до САД за нивната континуирана поддршка во развојот на Царинската управа.