Загрижувачко е слабото ниво на познавање на законите на техничката министерка за труд и социјална политика, Рашела Мизрахи. Со денешната прес-конференција таа уште еднаш потврди дека воопшто не го прочитала новиот Закон за социјалната заштита и начинот на кој функционираат 15 комисии, реагираат од Министерството за труд и социјална политика.

„Ако Мизрахи го прочита новиот Закон за социјалната заштита, ќе дознае дека рокот за постапување за предметите за помош и нега од друго лице е 60 дена, а не еден месец, како што тврди. Мизрахи во својата прес-конференција се повикува на погрешен закон, а тоа е Законот за општата управна постапка. Како за појаснување, рокот е утврден во членот 282 од Законот за социјалната заштита и тој е утврден на 60 дена.

За потсетување, оваа Влада изгради децентрализирани комисии за помош и нега од друго лице за разлика од едната централизирана комисија, која беше воспоставена во време на владеењето на ВМРО-ДПМНЕ и им наплаќаше 2.000 денари за поднесено барање.

Во интерес на граѓаните, сега поднесувањето барања за помош и нега од трето лице е бесплатно, а со тоа што сега функционираат 15 комисии во повеќе градови во државата, услугата е доближена до граѓаните. Ја повикуваме министерката да не наседнува на текстовите што ѝ ги пласираат од штабот на ВМРО-ДПМНЕ, туку самата да се информира за законите и измените што се направени“, се вели во реакцијата на МТСП.