Македонија
Муртезани – Туркменоглу: разгледани тековните и идните проекти во земјата

Министерот за европски прашања, Орхан Муртезани, денеска оствари средба со претставникот на Европската банка за обнова и развој (ЕБОР) во Северна Македонија, Фатих Туркменоглу, на која беа разгледани тековните и идните проекти на банката во земјата, со главен фокус на заедничките развојни приоритети, а со цел напредување на економската агенда на државата.
Во тој контекст, значаен дел од дискусијата беше посветен на нацрт-реформската агенда во пресрет на предвидените средства од планот за раст на ЕУ за регионот, од кои речиси половина ќе бидат наменети за проекти во рамките на Инвестициската рамка за Западен Балкан (WBIF). Муртезани нагласи дека клучните реформи ќе се фокусираат на подобрување на енергетскиот и дигиталниот сектор, образованието, јавната администрација и владеењето на правото, со цел забрзување на имплементацијата на инвестициските проекти до 2027 година.
На состанокот, на кој учествуваше и заменик-министерката за европски прашања, Викторија Трајков, беше потврдена усогласеноста на државата со приоритетите на актуелната стратегија на ЕБОР, која се фокусира на конкурентноста, регионалната интеграција и транзицијата кон зелена економија. Двете страни истакнаа дека овие цели се клучни за одржување на активната улога на земјата во глобалниот синџир на снабдување и за поддршка на националната конвергенција.
Муртезани го потенцира и придонесот на ЕБОР преку Климатскиот инвестициски фонд (CIF), кој ѝ помага на земјата во процесот на зелената и праведната транзиција, во намалувањето на зависноста од јаглен, обезбедувајќи обука за вработените и нивно подготвување за нови работни можности.
Беа разменети мислења и за соработката во рамките на Инвестициската рамка за Западен Балкан (WBIF) изразувајќи заемно задоволство од тековната соработка во подготовката и имплементацијата на проекти со кои се поддржува развојот на земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.